جەتىسۋ وبلىسىندا ەكى مارتە سوتسياليستىك ەڭبەك ەرى نۇرمولدا الدابەرگەنوۆتىڭ 120 جىلدىعى اتالىپ ءوتتى. قايراتكەردىڭ ونەگەلى ءومىر جولىنا ارنالعان عىلىمي-مەرەيتويلىق كونفەرەنتسيا ۇيىمداستىرىلىپ، سپورتتىق جارىستار وتكىزىلدى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
ەسكەلدى اۋدانى نۇرمولدا الدابەرگەنوۆ اۋىلىندا وتكەن سالتاناتتى ءىس-شارا الدىمەن باتىرلار اللەياسىنا گۇل شوقتارىن قويۋ راسىمىنەن باستالىپ، ارى قاراي «ەلگە قىزمەت – ەرگە مۇرا» اتتى عىلىمي-مەرەيتويلىق كونفەرەنتسيامەن جالعاستى. جيىنعا عالىمدار، زيالى قاۋىم وكىلدەرى، ارداگەرلەر، جاستار جانە اۋدان تۇرعىندارى قاتىستى.
وبلىس اكىمىنىڭ اتىنان كونفەرەنتسياعا قاتىسۋشىلاردى قۇتتىقتاعان وبلىس اكىمىنىڭ ورىنباسارى دياس ەسداۋلەتوۆ الدىمەن كوپشىلىككە مەملەكەت باسشىسى قاسىم-جومارت توقاەۆتىڭ جولداعان قۇتتىقتاۋ حاتىن وقىپ بەردى.
«نۇرمولدا الدابەرگەنوۆ اۋىل شارۋاشىلىعى سالاسىندا ۇزاق جىلدار بويى تابىستى جۇمىس ىستەپ، جەتىسۋ ءوڭىرىن كوركەيتۋگە ولشەۋسىز ۇلەس قوستى. ول ءوزى باسقارعان شارۋاشىلىقتاردى وركەندەتۋگە زور ەڭبەك ءسىڭىرىپ، ۇلت مۇددەسىنە قالتقىسىز قىزمەت ەتۋدىڭ وزىق ۇلگىسىن كورسەتتى. سونىڭ ارقاسىندا سوتسياليستىك ەڭبەك ەرى اتاعىن ەكى مارتە يەلەندى. قوعام قايراتكەرىنىڭ ەسىمى ەل ىشىندە «دالا اكادەميگى» دەگەن ارداقتى اتپەن تانىلدى. حالقىمىزدىڭ وسىنداي قادىرلى پەرزەنتتەرىن جۇرت جادىندا ساقتاۋ – بارشامىزدىڭ ورتاق مىندەتىمىز. ءبىز ءبىر ەل بولىپ قابىلداعان كونستيتۋتسيادا ەڭبەكقورلىق قۇندىلىعىن ورنىقتىرۋ مەملەكەتىمىزدىڭ مىزعىماس قاعيداتتارىنىڭ ءبىرى رەتىندە بەكىتىلدى. سوندىقتان ادال ەڭبەگىمەن جۇرتقا ونەگە كورسەتكەن تۇلعالاردىڭ جاسامپاز ىستەرىن جان-جاقتى دارىپتەۋ ايرىقشا ماڭىزدى»، - دەلىنگەن قۇتتىقتاۋدا.
د. ەسداۋلەتوۆ ءوز سوزىندە نۇرمولدا الدابەرگەنوۆتىڭ ەسىمىن ۇلىقتاۋ ماقساتىندا وبلىستا اتقارىلعان شارالارعا توقتالىپ، ونىڭ ونەگەلى ءومىرىنىڭ جاس ۇرپاقتىڭ تاربيەسىنە تيگىزەر ىقپالىن ەرەكشە اتاپ ءوتتى.
مۇنان سوڭ ن. الدابەرگەنوۆتىڭ عيبراتتى عۇمىر جولى تۋرالى قىسقا مەتراجدى دەرەكتى فيلم كورسەتىلدى.
سالتاناتتى شارادا اۋىل شارۋاشىلىعى عىلىمدارىنىڭ دوكتورى تىنىشباي دوسىمبەكوۆ، وبلىستىق ارداگەرلەر كەڭەسىنىڭ توراعاسى ەرمەك كەلەمسەيىت، ەسكەلدى اۋدانىنىڭ قۇرمەتتى ازاماتى تولەگەن مۇساپيروۆ، ەڭبەك ارداگەرى شايبالا تەرگەۋوۆا، قوعام قايراتكەرىنىڭ قىزى رابيعا الدابەرگەنوۆا مازمۇندى باياندامالار جاساپ، جىلى ەستەلىكتەر ايتتى.
- مەنىڭ اكەم كەڭ جۇرەكتى، سابىرلى، بايسالدى جان ەدى. ەڭبەكقورلىعىمەن قاتار ءوزىنىڭ ادامگەرشىلىك قاسيەتىمەن دە كوپكە ۇلگى بولدى. جاس ۇرپاق اكەمدەي حالىق ءۇشىن ەڭبەك ەتەتىن پاتريوت، ەلىمىزدىڭ قالاۋلى پەرزەنتى بولسىن. ەڭبەك ەتكەن ادام ەشقاشان ەلەۋسىز قالمايدى. بۇگىنگى مەرەيتويلىق شاراعا اتسالىسقان بارشا ازاماتتارعا العىس ايتامىن، - دەدى رابيعا الدابەرگەنوۆا.
وسى كۇنى مەرەيتوي اياسىندا سپورتتىق ءىس-شارالار دا ۇيىمداستىرىلىپ، ۆولەيبولدان، فۋتبولدان جارىستار وتكىزىلدى.
اتاپ وتسەك، قوعام قايراتكەرىنىڭ ەسىمىن ەستە قالدىرۋ ماقساتىندا 2023 جىلى تالدىقورعاندا ەسكەرتكىش-بيۋست ورناتىلدى. بيۋست اعاش ەگىلىپ، گۇلزار وسىرىلگەن سكۆەردىڭ ىشىنە قويىلدى. سونداي-اق الدابەرگەنوۆ اۋىلىندا ورنالاسقان مۋزەيىنىڭ عيماراتىنا اعىمداعى جوندەۋ جۇرگىزىلىپ، نىسان اۋماعى اباتتاندىرىلدى.
ەسكە سالساق، نۇرمولدا الدابەرگەنوۆ كەربۇلاق اۋدانىندا تۋعان. قازاقستانداعى العاش كولحوز قۇرۋشىلاردىڭ ءبىرى. جەتىسۋ وڭىرىندە بىرنەشە كولحوزدى باسقارعان بىلىكتى ۇيىمداستىرۋشى. ول اۋىل شارۋاشىلىعىندا ەگىنشىلىك مادەنيەتىن ارتتىرۋ جانە مال تۇقىمىن اسىلداندىرۋ ىسىندە عىلىم جاڭالىقتارى مەن وزات تاجىريبەنى وندىرىسكە باتىل ەنگىزىپ، جوعارى ونىمگە قول جەتكىزدى، ءسويتىپ ۇجىم ەكونوميكاسىن كۇرت جوعارى كوتەردى. ۇجىمشاردا وزات تاجىريبە مەكتەبى تۇراقتى جۇمىس ىستەدى، اسىل تۇقىمدى مال فەرمالارى قۇرىلدى، اۋىلدا قالا ۇلگىسىندە قۇرىلىس سالۋ تۇڭعىش جۇزەگە اسىرىلدى. ونىڭ ەڭبەگى لايىقتى باعالانىپ، ەكى مارتە سوتسياليستىك ەڭبەك ەرى اتاندى.
