Jetısu oblysynda ekı märte Sosialistık Eŋbek Erı Nūrmolda Aldabergenovtıŋ 120 jyldyǧy atalyp öttı. Qairatkerdıŋ önegelı ömır jolyna arnalǧan ǧylymi-mereitoilyq konferensiia ūiymdastyrylyp, sporttyq jarystar ötkızıldı, dep habarlaidy Jetısu oblysy äkımınıŋ baspasöz qyzmetı.
Eskeldı audany Nūrmolda Aldabergenov auylynda ötken saltanatty ıs-şara aldymen Batyrlar alleiasyna gül şoqtaryn qoiu räsımınen bastalyp, ary qarai «Elge qyzmet – erge mūra» atty ǧylymi-mereitoilyq konferensiiamen jalǧasty. Jiynǧa ǧalymdar, ziialy qauym ökılderı, ardagerler, jastar jäne audan tūrǧyndary qatysty.
Oblys äkımınıŋ atynan konferensiiaǧa qatysuşylardy qūttyqtaǧan oblys äkımınıŋ orynbasary Dias Esdäuletov aldymen köpşılıkke Memleket basşysy Qasym-Jomart Toqaevtyŋ joldaǧan qūttyqtau hatyn oqyp berdı.
«Nūrmolda Aldabergenov auyl şaruaşylyǧy salasynda ūzaq jyldar boiy tabysty jūmys ıstep, Jetısu öŋırın körkeituge ölşeusız üles qosty. Ol özı basqarǧan şaruaşylyqtardy örkendetuge zor eŋbek sıŋırıp, ūlt müddesıne qaltqysyz qyzmet etudıŋ ozyq ülgısın körsettı. Sonyŋ arqasynda Sosialistık Eŋbek Erı ataǧyn ekı märte ielendı. Qoǧam qairatkerınıŋ esımı el ışınde «Dala akademigı» degen ardaqty atpen tanyldy. Halqymyzdyŋ osyndai qadırlı perzentterın jūrt jadynda saqtau – barşamyzdyŋ ortaq mındetımız. Bız bır el bolyp qabyldaǧan Konstitusiiada eŋbekqorlyq qūndylyǧyn ornyqtyru memleketımızdıŋ myzǧymas qaǧidattarynyŋ bırı retınde bekıtıldı. Sondyqtan adal eŋbegımen jūrtqa önege körsetken tūlǧalardyŋ jasampaz ısterın jan-jaqty därıpteu airyqşa maŋyzdy», - delıngen qūttyqtauda.
D. Esdäuletov öz sözınde Nūrmolda Aldabergenovtıŋ esımın ūlyqtau maqsatynda oblysta atqarylǧan şaralarǧa toqtalyp, onyŋ önegelı ömırınıŋ jas ūrpaqtyŋ tärbiesıne tigızer yqpalyn erekşe atap öttı.
Mūnan soŋ N. Aldabergenovtıŋ ǧibratty ǧūmyr joly turaly qysqa metrajdy derektı film körsetıldı.
Saltanatty şarada auyl şaruaşylyǧy ǧylymdarynyŋ doktory Tynyşbai Dosymbekov, oblystyq ardagerler keŋesınıŋ töraǧasy Ermek Kelemseiıt, Eskeldı audanynyŋ Qūrmettı azamaty Tölegen Mūsapirov, eŋbek ardagerı Şaibala Tergeuova, qoǧam qairatkerınıŋ qyzy Rabiǧa Aldabergenova mazmūndy baiandamalar jasap, jyly estelıkter aitty.
- Menıŋ äkem keŋ jürektı, sabyrly, baisaldy jan edı. Eŋbekqorlyǧymen qatar özınıŋ adamgerşılık qasietımen de köpke ülgı boldy. Jas ūrpaq äkemdei halyq üşın eŋbek etetın patriot, elımızdıŋ qalauly perzentı bolsyn. Eŋbek etken adam eşqaşan eleusız qalmaidy. Bügıngı mereitoilyq şaraǧa atsalysqan barşa azamattarǧa alǧys aitamyn, - dedı Rabiǧa Aldabergenova.
Osy künı mereitoi aiasynda sporttyq ıs-şaralar da ūiymdastyrylyp, voleiboldan, futboldan jarystar ötkızıldı.
Atap ötsek, qoǧam qairatkerınıŋ esımın este qaldyru maqsatynda 2023 jyly Taldyqorǧanda eskertkış-biust ornatyldy. Biust aǧaş egılıp, gülzar ösırılgen skverdıŋ ışıne qoiyldy. Sondai-aq Aldabergenov auylynda ornalasqan muzeiınıŋ ǧimaratyna aǧymdaǧy jöndeu jürgızılıp, nysan aumaǧy abattandyryldy.
Eske salsaq, Nūrmolda Aldabergenov Kerbūlaq audanynda tuǧan. Qazaqstandaǧy alǧaş kolhoz qūruşylardyŋ bırı. Jetısu öŋırınde bırneşe kolhozdy basqarǧan bılıktı ūiymdastyruşy. Ol auyl şaruaşylyǧynda egınşılık mädenietın arttyru jäne mal tūqymyn asyldandyru ısınde ǧylym jaŋalyqtary men ozat täjıribenı öndırıske batyl engızıp, joǧary önımge qol jetkızdı, söitıp ūjym ekonomikasyn kürt joǧary köterdı. Ūjymşarda ozat täjıribe mektebı tūraqty jūmys ıstedı, asyl tūqymdy mal fermalary qūryldy, auylda qala ülgısınde qūrylys salu tūŋǧyş jüzege asyryldy. Onyŋ eŋbegı laiyqty baǧalanyp, ekı märte Sosialistık Eŋbek Erı atandy.
