فوتو: Social Media/REUTERS
قازاقستاننىڭ سىرتقى ىستەر مينيسترلىگى ساۋد ارابياسىنىڭ ەر-رياد قالاسىنداعى كورول حاليد اتىنداعى حالىقارالىق اۋەجايعا جاسالعان شابۋىلدى قاتاڭ ايىپتادى. قازىرگى ۋاقىتتا وقيعا سالدارىنان قازا تاپقاندار مەن زارداپ شەككەندەردىڭ اراسىندا قازاقستان ازاماتتارىنىڭ بار-جوعى تەكسەرىلىپ جاتىر، دەپ حابارلايدى “ادىرنا”.
الدىن الا مالىمەت بويىنشا، ولاردىڭ اراسىندا قازاقستاندىقتار جوق.
ساۋد ارابياسىنىڭ ازاماتتىق اۆياتسيا باسقارماسىنىڭ مالىمەتىنشە، شابۋىل سالدارىنان 12 ادام قازا تاۋىپ، تاعى 309 ادام جاراقات العان. قازا تاپقاندار اراسىندا ساۋد ارابياسى، بانگلادەش، اقش، مىسىر، يوردانيا، سيريا، پالەستينا جانە سۋدان ازاماتتارى بار. زارداپ شەككەندەردىڭ كەيبىرىنىڭ جاعدايى اۋىر.
الدىن الا اقپاراتقا سايكەس، شابۋىلعا يەمەندەگى حۋسيتتەر جاۋاپكەرشىلىكتى ءوز موينىنا العان. سونداي-اق قاۋىپ تۋرالى ەسكەرتۋ جۇيەسى ىسكە قوسىلماعانى حابارلاندى.
بۇل – سوڭعى ءبىر اپتا ىشىندە ەر-رياد اۋەجايىنا جاسالعان ءۇشىنشى شابۋىل. وقيعادان كەيىن بىرقاتار رەيس باسقا اۋەجايلارعا باعىتتالىپ، اۋەجايدىڭ جۇمىسى ۋاقىتشا توقتاتىلعان.
قازاقستان سىرتقى ىستەر مينيسترلىگى حۋسيت جاساقتارىنىڭ ساۋد ارابياسىنداعى ازاماتتىق ينفراقۇرىلىم نىساندارىنا ادام شىعىنىنا اكەلگەن شابۋىلدارىن قاتاڭ ايىپتادى.
ۆەدومستۆونىڭ مالىمدەۋىنشە، مۇنداي ارەكەتتەرگە گۋمانيتارلىق تۇرعىدان جول بەرۋگە بولمايدى ءارى ولار حالىقارالىق قۇقىق نورمالارىن بۇزادى. مينيسترلىك شابۋىلدار يەمەندەگى احۋالدى تۇراقتاندىرۋعا باعىتتالعان كۇش-جىگەرگە نۇقسان كەلتىرىپ، قاقتىعىستى ساياسي جولمەن رەتتەۋگە كەدەرگى كەلتىرەتىنىن اتاپ ءوتتى.
«شابۋىلداردى دەرەۋ توقتاتۋعا جانە داعدارىستى تەك ساياسي-ديپلوماتيالىق قۇرالدار ارقىلى شەشۋگە شاقىرامىز»، –دەلىنگەن سىرتقى ىستەر مينيسترلىگىنىڭ مالىمدەمەسىندە.
سونىمەن قاتار قازاقستان ساۋد ارابياسىمەن ىنتىماقتاستىعىن راستاپ، كورولدىكتىڭ بۇۇ جارعىسىنا سايكەس ءوز ەگەمەندىگى مەن قاۋىپسىزدىگىن قورعاۋعا قۇقىلى ەكەنىن مالىمدەدى.
قازىرگى ۋاقىتتا قازاقستان ازاماتتارىنىڭ وقيعادان زارداپ شەككەندەر اراسىندا بار-جوعىن انىقتاۋ جۇمىستارى جالعاسىپ جاتىر. الدىن الا مالىمەت بويىنشا، قازا تاپقاندار مەن جارالانعانداردىڭ اراسىندا قازاقستان ازاماتتارى جوق.
