تۇركيا پرەزيدەنتى رەجەپ تايپ ەردوعان انكارا مەن ەر-رياد اراسىنداعى قارىم-قاتىناستاردىڭ ستراتەگيالىق سيپاتقا يە ەكەنىن مالىمدەپ، الداعى ۋاقىتتا ولاردىڭ ودان ءارى نىعايا تۇسەتىنىن ايتتى، دەپ حابارلايدى «ادىرنا» ءتىلشىسى Caliber-گە سىلتەمە جاساپ.
ونىڭ سوزىنشە، تاراپتار ىنتىماقتاستىقتى «الدەقايدا جوعارى دەڭگەيگە» كوتەرۋدى كوزدەپ وتىر.
ورمۇز بۇعازىنداعى جاعدايعا توقتالعان ەردوعان ونى الەمدىك ەكونوميكانىڭ نەگىزگى كۇرەتامىرلارىنىڭ ءبىرى دەپ اتاپ، وڭىردەگى شيەلەنىستىڭ جاقىن ارادا باسەڭدەۋىنە ءۇمىت ءبىلدىردى. ول بۇعاز حالىقارالىق كەمە قاتىناسىنىڭ قاۋىپسىز ءارى ۇزدىكسىز جۇمىسىن قايتا قامتاماسىز ەتۋى ءتيىس ەكەنىن ايتتى.
تۇركيا باسشىسى سونداي-اق تۇركيا، ساۋد ارابياسى جانە پاكىستان اراسىنداعى بىرلەسكەن قورعانىس جونىندەگى مەككە كەلىسىمى قانداي دا ءبىر ناقتى مەملەكەتكە قارسى باعىتتالماعانىن مالىمدەدى. ونىڭ ايتۋىنشا، قۇجات ۇجىمدىق تەجەۋ تەتىكتەرىن كۇشەيتىپ، وڭىرلىك قاۋىپسىزدىكتى نىعايتۋعا ارنالعان. ەردوعان بۇل مەحانيزمنىڭ باسقا دا «باۋىرلاس مەملەكەتتەردىڭ» قوسىلۋىنا اشىق ەكەنىن قوستى.
سونىمەن قاتار تۇركيا پرەزيدەنتى ءيزرايلدىڭ ليۆانعا جاساعان سوققىلارىن دەرەۋ توقتاتۋعا شاقىردى. ول انكارانىڭ سيريانىڭ اۋماقتىق تۇتاستىعىن قولداۋدى جالعاستىراتىنىن جانە ونىڭ اۋماعىندا تۇركيا قاۋىپسىزدىگىنە قاتەر ءتوندىرۋى مۇمكىن قۇرىلىمداردىڭ قالىپتاسۋىنا جول بەرمەيتىنىن مالىمدەدى.
