سىرتقى ىستەر مينيسترلىگىنىڭ رەسمي وكىلى ايبەك سمادياروۆ بۇگىندە قازاقستان ازاماتتارى ءۇشىن شەنگەن ۆيزاسىن الۋ قيىنداعانىن، وعان تۇرعىنداردىڭ ءجيى جالعان مالىمەت بەرەتىنى سەبەپ بولعانىن ايتتى، دەپ حابارلايدى “ادىرنا” ۇلتتىق پورتالى.
ۆەدومستۆو وكىلىنىڭ ايتۋىنشا، قازىر ءسىم ەۋرووداق وكىلدەرىمەن ۆيزالىق رەجيمدى جەڭىلدەتۋ بويىنشا جۇمىس جۇرگىزىپ جاتىر.
“ەۋروپا ەلدەرى كونسۋلدارىنىڭ اقپاراتىنا قاراعاندا قازاقستاندا جالعان قۇجاتتاردى ۇسىنۋ دەرەگى جيىلەپ كەتتى. بۇل ءوز كەزەگىندە شەنگەن ۆيزاسىن بەرۋدەن باس تارتۋ فاكتىلەرىنىڭ وسۋىنە الىپ كەلەد”ى، - دەدى ايبەك سمادياروۆ استانادا وتكەن ءباسپاسوز ءماسليحاتىندا.
سونداي-اق، ول ۆيزا الۋ ءۇشىن جالعان دەرەكتەرى بار قۇجاتتاردى ۇسىنۋ قازاقستان يميدجىنە ەلەۋلى زيان كەلتىرىپ، كەلىسسوز جۇرگىزۋدى قيىنداتاتىنىن ايتادى.
«بولاشاقتا ۆيزادان باس تارتۋ مۇمكىندىگىن كوبەيتە وتىرىپ، ازاماتتارىمىزدىڭ ۆيزالىق مالىمەتتەرىن ناشارلاتادى. مۇنداي جالعان قۇجاتتار مۇقيات تەكسەرىلەتىنىن ەسكەرسەك، ۆيزالىق وتىنىشتەردى قاراۋ مەرزىمىن ۇزارتادى. سالدارىنان ازاماتتاردىڭ ۆيزانى كەشىكتىرۋ تۋرالى شاعىمى جيىلەپ كەتتى. وسىعان بايلانىستى قاجەت قۇجاتتاردى ۇسىنۋ، ۆيزاعا ءوتىنىش بەرۋ، ءتيىستى الىمداردى تولەۋ پروتسەسىن مۇقيات باقىلاۋعا شاقىرامىز»، - دەدى ول.
ايبەك سمادياروۆ شەتەلگە بارعىسى كەلەتىن قازاقستاندىقتارعا ەسكەرتۋ جاسادى.
«قازاقستان ازاماتتارى كوبىنەسە جالعان مالىمەتتەردى بەرىپ، (شەتەلگە) شىقپاق تۇگىلى (ەلدەن) شىعا الماي جاتىر. وسى ماسەلە بولىپ تۇر. ارينە، ۆيزا بەرۋدەن باس تارتۋ پروتسەنتى ءوسىپ كەلە جاتىر. نەگە؟ سەبەبى، ءبىزدىڭ ازاماتتار جالعان مالىمەت بەرىپ جاتىر. ولار ۇشاق بيلەتىن جالعان برونعا قويادى نەمەسە قوناقۇيدىڭ جالعان دەرەكتەرىن كورسەتەدى، جۇمىس ىستەپ جاتقان ورىننان جالعان اقپارات الىپ كەلەدى: ايلىعى، بانكتەگى شوتى تۋرالى.
مۇنىڭ ءبارىن (شەتەلدىڭ) ۆيزالىق ورتالىعى كونسۋلمەن بىرگە تەكسەرەدى. بۇل ۋاقىت الادى. وسىدان «بىزگە نەگە ۆيزانى تەز بەرمەيدى؟» دەگەن سۇراق تۋىندايدى. ارينە، جالعان اقپارات بەرسەڭ (ۆيزا بەرۋ ءراسىمى دە) سوزىلادى. جالعان اقپاراتتى بەرگەن ادام ولاردىڭ ارنايى تىزىلىمىنە ەنگىزىلەدى. كەلەشەكتە وعان ۆيزا الۋ قيىن بولادى. سوندىقتان قازاقستاندىقتار اقپارات بەرەتىن بولسا، ناقتى اقپارات بەرۋى كەرەك. بۇل بارىنە اسەر ەتىپ جاتىر»، - دەپ ءسوزىن تۇيىندەدى ول.
