Şengen vizasyn alu qiyndap kettı - SIM

Syrtqy ıster ministrlıgınıŋ resmi ökılı Aibek Smadiiarov bügınde Qazaqstan azamattary üşın Şengen vizasyn alu qiyndaǧanyn, oǧan tūrǧyndardyŋ jiı jalǧan mälımet beretını sebep bolǧanyn aitty, dep habarlaidy “Adyrna” ūlttyq portaly. Vedomstvo ökılınıŋ aituynşa, qazır SIM EuroOdaq ökılderımen vizalyq rejimdı jeŋıldetu boiynşa jūmys jürgızıp jatyr. “Europa elderı konsuldarynyŋ aqparatyna qaraǧanda Qazaqstanda jalǧan qūjattardy ūsynu deregı jiılep kettı. Būl öz kezegınde Şengen vizasyn beruden bas tartu faktılerınıŋ ösuıne alyp keled”ı, - dedı Aibek Smadiiarov Astanada ötken baspasöz mäslihatynda. Sondai-aq, ol viza alu üşın jalǧan derekterı bar qūjattardy ūsynu Qazaqstan imidjıne eleulı ziian keltırıp, kelıssöz jürgızudı qiyndatatynyn aitady. «Bolaşaqta vizadan bas tartu mümkındıgın köbeite otyryp, azamattarymyzdyŋ vizalyq mälımetterın naşarlatady. Mūndai jalǧan qūjattar mūqiiat tekserıletının eskersek, vizalyq ötınışterdı qarau merzımın ūzartady. Saldarynan azamattardyŋ vizany keşıktıru turaly şaǧymy jiılep kettı. Osyǧan bailanysty qajet qūjattardy ūsynu, vizaǧa ötınış beru, tiıstı alymdardy töleu prosesın mūqiiat baqylauǧa şaqyramyz», - dedı ol. Aibek Smadiiarov şetelge barǧysy keletın qazaqstandyqtarǧa eskertu jasady. «Qazaqstan azamattary köbınese jalǧan mälımetterdı berıp, (şetelge) şyqpaq tügılı (elden) şyǧa almai jatyr. Osy mäsele bolyp tūr. Ärine, viza beruden bas tartu prosentı ösıp kele jatyr. Nege? Sebebı, bızdıŋ azamattar jalǧan mälımet berıp jatyr. Olar ūşaq biletın jalǧan bronǧa qoiady nemese qonaqüidıŋ jalǧan derekterın körsetedı, jūmys ıstep jatqan orynnan jalǧan aqparat alyp keledı: ailyǧy, banktegı şoty turaly. Mūnyŋ bärın (şeteldıŋ) vizalyq ortalyǧy konsulmen bırge tekseredı. Būl uaqyt alady. Osydan «Bızge nege vizany tez bermeidı?» degen sūraq tuyndaidy. Ärine, jalǧan aqparat berseŋ (viza beru räsımı de) sozylady. Jalǧan aqparatty bergen adam olardyŋ arnaiy tızılımıne engızıledı. Keleşekte oǧan viza alu qiyn bolady. Sondyqtan qazaqstandyqtar aqparat beretın bolsa, naqty aqparat beruı kerek. Būl bärıne äser etıp jatyr», - dep sözın tüiındedı ol.