پرەزيدەنت قاسىم-جومارت توقاەۆتىڭ باسشىلىعىمەن قازاقستان مەملەكەتتىك باسقارۋدى تسيفرلىق ترانسفورماتسيالاۋ مەن جاڭعىرتۋعا باسا دەن قويا وتىرىپ، حالىقارالىق ارەناداعى ءوز ۇستانىمىن دايەكتى تۇردە نىعايتىپ كەلەدى. World Population Review پلاتفورماسى جاريالاعان Most Powerful Countries 2026 رەيتينگىنە سايكەس، قازاقستان الەمدەگى ەڭ ىقپالدى 35 ەلدىڭ قاتارىنا كىرىپ، 100 مەملەكەتتىڭ اراسىندا 34-ءشى ورىنعا يە بولدى.
رەيتينگتى قۇرۋ كەزىندە ەكونوميكالىق جانە ساياسي ىقپالى، كوشباسشىلىق ورنى، حالىقارالىق وداقتاردا بولۋى جانە اسكەري الەۋەتى ەسكەرىلدى. بۇعان دەيىن جاساندى ينتەللەكت جونىندەگى كەڭەستىڭ وتىرىسىندا ءسوز سويلەگەن مەملەكەت باسشىسى تسيفرلىق تەحنولوگيالار مەن جي ەكونوميكانىڭ بارلىق سالالارى مەن ازاماتتاردىڭ ءومىر سالتىن تۇبەگەيلى وزگەرتەتىنىن، قازاقستان جاڭا تەحنولوگيالار مەن سەرۆيستەردى جەدەل دامىتۋى ءتيىس ەكەنىن اتاپ وتكەن بولاتىن.
رەيتينگتە قازاقستان ەكونوميكاسى بىرقاتار مىقتى ەلدەردى باسىپ وزدى. ول دانيا (36-شى), ءباا (37-ءشى), وڭتۇستىك افريكا (38-ءشى), نورۆەگيا (39-شى), ساۋد ارابياسى (40-شى), پاكىستان (42-ە) جانە يراندى (46-شى) ارتتا قالدىرىپ، ماجارستان (33-ءشى) مەن مىسىر (35-ءشى) مەملەكەتتەرىنىڭ اراسىنا ورنالاستى. پوستكەڭەستىك مەملەكەتتەر اراسىندا قازاقستان تەك رەسەيگە (11-ءشى ورىن) جول بەرىپ وتىر، بىراق ۋكراينادان (51-ءشى), ليتۆادان (56-شى), بەلارۋستان (57-ءشى), وزبەكستاننان (71-ءشى), لاتۆيادان (74-ءشى), ەستونيادان (75-ءشى), ارمەنيادان (80-ءشى) جانە گرۋزيادان (91-ءشى) وزىق تۇر. رەيتينگتىڭ العاشقى ءۇش جولىن قىتاي، اقش جانە ءۇندىستان يەلەندى.
مەملەكەتتىك قىزمەتتەردى تسيفرلاندىرۋ رەسپۋبليكانىڭ ۇستانىمىن نىعايتۋعا ەلەۋلى كومەك بولدى. رەسمي دەرەكتەر بويىنشا، مەملەكەتتىك قىزمەتتەردىڭ 90,3%-ى ەلەكتروندىق فورماتتا كورسەتىلەدى. وسىلايشا، ولاردىڭ سانى 2021 جىلى 657-دەن 2026 جىلى 1333-كە دەيىن ءوستى. بۇل رەتتە ەلدىڭ 97,5%-ى ينتەرنەتكە قول جەتكىزە الادى، بۇل تسيفرلىق ينفراقۇرىلىمدا ايتارلىقتاي ىلگەرىلەۋدى كورسەتەدى. قازاقستان ەلەكتروندىق ۇكىمەتتىڭ جاھاندىق رەيتينگىندە 24-ءشى ورىندا، ال EGOV GPT پلاتفورماسى ەڭ كوپ سۇرانىسقا يە 51 مەملەكەتتىك قىزمەتتى قامتيدى جانە ازاماتتاردىڭ سۇرانىستارىنىڭ شامامەن 30%-ىن وڭدەيدى. مەملەكەت باسشىسىنىڭ باستاماسى بويىنشا ىسكە اسىرىلاتىن «Digital Qazaqstan» ۇلتتىق ستراتەگياسى جەكەلەگەن پروتسەستەردى نۇكتەلىك تسيفرلاندىرۋدان بىرىڭعاي تەحنولوگيالىق ەكوجۇيەنى قۇرۋعا كوشۋدى قامتاماسىز ەتەدى.
رەيتينگتى باعالاۋ ادىستەمەسى دە ەرەكشە نازار اۋدارۋعا تۇرارلىق. باسقا ءداستۇرلى رەيتينگتەردەن ايىرماشىلىعى، 2026 جىلعى باعالاۋ U.S. News & World Report باسىلىمى BAV Group جانە پەنسيلۆانيا ۋنيۆەرسيتەتىنىڭ ۋورتون بيزنەس مەكتەبىمەن بىرلەسىپ جۇرگىزەتىن Best Countries زەرتتەۋىنە نەگىزدەلگەن. نەگىزگى كريتەريلەر – ەكونوميكالىق الەۋەت، ساياسي ىقپال، حالىقارالىق كوشباسشىلىق، اليانستارعا قاتىسۋ جانە اسكەري مۇمكىندىكتەر. بۇل ءتاسىل باعالاۋدى وبەكتيۆتى ەتەدى جانە باسقارۋ جانە ينستيتۋتسيونالدىق دامۋ سالاسىنداعى مەملەكەتتەردىڭ ناقتى جەتىستىكتەرىن دالىرەك كورسەتەدى.
بولاشاقتا قازاقستاننىڭ تسيفرلىق ستراتەگياسى ەلدىڭ حالىقارالىق پوزيتسيالارىن نىعايتۋدى جالعاستىرادى. 2026 جىل قازاقستاندا دا تسيفرلاندىرۋ جانە جاساندى ينتەللەكت جىلى بولىپ جاريالاندى، ال مەملەكەت ءۇش جىل ىشىندە تولىققاندى تسيفرلىق مەملەكەت قۇرۋدى ماقسات ەتىپ وتىر. تۇراقتى دەموگرافيالىق ءوسۋ، حالىقارالىق رەزەرۆتەردىڭ ارتۋى جانە وزىق تەحنولوگيالاردى بەلسەندى ەنگىزۋ ازاماتتاردىڭ ءومىر ءسۇرۋ دەڭگەيىن ودان ءارى ارتتىرۋ مەن قازاقستاننىڭ الەمدىك ارەناداعى سەنىمدى ارىپتەس رەتىندەگى ءرولىن كۇشەيتۋ ءۇشىن بەرىك نەگىز قالىپتاستىرادى.
