قازاقستاندا ءماسليحات دەپۋتاتتارىنىڭ كەزەكتەن تىس سايلاۋىن وتكىزۋگە قاجەتتى قاراجات ۇكىمەت رەزەرۆىنەن بولىنەدى. بۇل تۋرالى 13 قازاندا ورتالىق سايلاۋ كوميسسياسىنىڭ مۇشەسى ميحايل بورتنيك بريفينگتە ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، كەزەكتەن تىس سايلاۋعا جۇمسالاتىن شىعىندار رەسپۋبليكالىق بيۋدجەتتە الدىن الا قاراستىرىلماعان. سوندىقتان قاجەتتى قاراجات ۇكىمەت رەزەرۆىنەن بولىنەدى.
«سايلاۋعا جۇمسالاتىن شىعىنداردىڭ كولەمى، ەڭ الدىمەن، ىسكە تارتىلاتىن سايلاۋ كوميسسيالارىنىڭ سانىنا، سايلاۋ ناۋقانىنىڭ ۇزاقتىعىنا جانە داۋىس بەرۋدى ۇيىمداستىرۋعا بايلانىستى وزگە دە فاكتورلارعا بايلانىستى»، – دەپ ءتۇسىندىردى ميحايل بورتنيك.
ول سايلاۋعا ارنالعان جالپى شىعىنداردىڭ 75–80 پايىزى سايلاۋ كوميسسيالارى مۇشەلەرىنىڭ ەڭبەكاقىسىن تولەۋگە باعىتتالاتىنىن اتاپ ءوتتى. بۇعان دەيىنگى سايلاۋ ناۋقاندارىنداعىداي، بيۋدجەتتىڭ نەگىزگى بولىگى جالاقى تولەۋگە جۇمسالادى.
بورتنيكتىڭ ايتۋىنشا، سايلاۋ كوميسسيالارىنىڭ 86 مىڭنان استام مۇشەسىنىڭ ەڭبەكاقىسىن تولەۋگە قاراجات قاراستىرىلادى.
بۇدان بولەك، جۇمىسقا قوسىمشا 3 022 وكرۋگتىك سايلاۋ كوميسسياسى تارتىلىپ، ولاردىڭ قۇرامىنا تاعى 15 110 ادام كىرەدى. ولاردىڭ ەڭبەكاقىسىن تولەۋگە دە قوسىمشا قاراجات قاجەت بولادى.
ميحايل بورتنيكتىڭ ايتۋىنشا، زاڭنامادا كانديداتتاردى مەملەكەتتىك قاراجات ەسەبىنەن قارجىلاندىرۋعا كەپىلدىك بەرىلگەن. قارجىلاندىرۋ كولەمىن ورتالىق سايلاۋ كوميسسياسى جەكە ايقىنداپ، ءتيىستى قۇجاتتاردا كورسەتەدى.
«كانديداتتارعا قاجەتتى قاراجاتتى ەسەپتەۋ كەزىندە ولاردىڭ اراسىنداعى باسەكەلەستىك تە ەسكەرىلۋى كەرەك ەكەنىن اتاپ وتكىم كەلەدى. ءبىر ورىنعا بىرنەشە كانديدات ۇمىتكەر بولا الادى. الدىن الا مالىمەت بويىنشا، ۇمىتكەر بولۋعا نيەتتىلەر كوپ. ءبىر ورىنعا ۇشتەن ونعا دەيىن نەمەسە ودان دا كوپ ادام تالاسۋى مۇمكىن. ەگەر ولار تىركەۋدەن وتسە، سايلاۋالدى ۇگىت جۇمىستارىنا قاجەتتى قاراجاتتى بيۋدجەت جوباسىندا قاراستىرۋعا مىندەتتىمىز»، – دەدى وسك مۇشەسى.
ەسكە سالايىق، قازاقستاندا بارلىق دەڭگەيدەگى ءماسليحات دەپۋتاتتارىنىڭ كەزەكتەن تىس سايلاۋى 29 قاراشادا وتەدى. ەلدەگى 228 ماسليحاتقا بارلىعى 3 447 دەپۋتات سايلاۋ جوسپارلانىپ وتىر.
