پرەزيدەنت قاسىم-جومارت توقاەۆتىڭ جارلىعىمەن ءۇش ماڭىزدى مەملەكەتتىك ورگاننىڭ باسشىلارى قايتا تاعايىندالدى، دەپ حابارلايدى "ادىرنا".
مەملەكەت باسشىسى جارلىعىمەن كونستيتۋتسيالىق سوتتى ەلۆيرا ءازىموۆا، ورتالىق سايلاۋ كوميسسياسىن نۇرلان ءابدىروۆ، ال جوعارى اۋديتورلىق پالاتانى ءاليحان سمايىلوۆ باسقاراتىن بولدى.
جاڭا باسشىلاردىڭ ارقايسىسىنىڭ مەملەكەتتىك قىزمەتتە مول تاجىريبەسى بار.
ەلۆيرا ءازىموۆا
ەلۆيرا ابىلحاسىمقىزى ءازىموۆا 1973 جىلعى 15 اقپاندا دۇنيەگە كەلگەن. 1996 جىلى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىن «حالىقارالىق زاڭگەر» ماماندىعى بويىنشا تامامداعان.
ەڭبەك جولىن شىمكەنت قالاسىنداعى دزەرجينسكي اۋداندىق ىشكى ىستەر بولىمىندە باسقارۋ ءپۋلتىنىڭ كەزەكشى وپەراتورى قىزمەتىنەن باستاعان.
1996-2013 جىلدارى ادىلەت مينيسترلىگىنىڭ جۇيەسىندە ءتۇرلى لاۋازىمداردا جۇمىس ىستەپ، 2013-2019 جىلدارى ادىلەت ءمينيسترىنىڭ ورىنباسارى قىزمەتىن اتقاردى.
2019-2022 جىلدارى قازاقستانداعى ادام قۇقىقتارى جونىندەگى ۋاكىل بولدى. سونداي-اق پرەزيدەنت جانىنداعى ادام قۇقىقتارى جونىندەگى كوميسسيا مەن ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قۇرامىندا جۇمىس ىستەدى.
2023 جىلعى 1 قاڭتاردان باستاپ كونستيتۋتسيالىق سوتتىڭ توراعاسى قىزمەتىنە تاعايىندالدى.
نۇرلان ءابدىروۆ
نۇرلان ءماجيتۇلى ءابدىروۆ 1961 جىلعى 12 قاڭتاردا دۇنيەگە كەلگەن. كسرو ءىىم قاراعاندى جوعارى مەكتەبىن جانە كسرو ءىىم بۇكىلوداقتىق عىلىمي-زەرتتەۋ ينستيتۋتىنىڭ كۇندىزگى اديۋنكتۋراسىن تامامداعان. زاڭ عىلىمدارىنىڭ دوكتورى، پروفەسسور.
1982-1997 جىلدارى قاراعاندى جوعارى مەكتەبىندە وقىتۋشى بولىپ ەڭبەك ەتتى. كەيىن ەسىرتكىنى باقىلاۋ جونىندەگى مەملەكەتتىك كوميسسيادا، ناشاقورلىققا جانە ەسىرتكى بيزنەسىنە قارسى كۇرەس اگەنتتىگىندە جانە ادىلەت مينيسترلىگىنىڭ بىرقاتار قۇرىلىمدارىندا باسشىلىق قىزمەتتەر اتقاردى.
2002-2009 جىلدارى قاۋىپسىزدىك كەڭەسى حاتشىلىعىندا ءتۇرلى لاۋازىمداردا جۇمىس ىستەدى. 2005-2009 جىلدارى قاۋىپسىزدىك كەڭەسى حاتشىسىنىڭ ورىنباسارى ءارى حاتشىلىق مەڭگەرۋشىسى بولدى.
2009-2020 جىلدارى ءماجىلىس دەپۋتاتى بولىپ، زاڭناما جانە سوت-قۇقىقتىق رەفورما كوميتەتىن باسقاردى. 2020 جىلى سەنات دەپۋتاتى بولىپ سايلانىپ، كەيىن سەنات توراعاسىنىڭ ورىنباسارى قىزمەتىن اتقاردى.
2022 جىلعى 25 قاڭتاردا پرەزيدەنت جارلىعىمەن ورتالىق سايلاۋ كوميسسياسىنىڭ توراعاسى بولىپ تاعايىندالعان.
ءاليحان سمايىلوۆ
ءاليحان اسحانۇلى سمايىلوۆ 1972 جىلعى 18 جەلتوقساندا الماتى قالاسىندا تۋعان.
1994 جىلى ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتىن «قولدانبالى ماتەماتيكا» ماماندىعى بويىنشا ءتامامدادى. 1996 جىلى قازاقستان رەسپۋبليكاسىنىڭ پرەزيدەنتى جانىنداعى قازاقستان مەنەدجمەنت، ەكونوميكا جانە بولجامداۋ ينستيتۋتىن ءبىتىرىپ، مەملەكەتتىك باسقارۋ ماگيسترى دارەجەسىن الدى.
ەڭبەك جولىندا ستاتيستيكا اگەنتتىگى، پرەزيدەنت اكىمشىلىگى جانە وزگە دە مەملەكەتتىك قۇرىلىمداردا ءتۇرلى قىزمەتتەر اتقاردى. 1999-2003 جىلدارى ستاتيستيكا اگەنتتىگىن باسقاردى.
كەيىن سىرتقى ىستەر جانە قارجى مينيسترلىكتەرى باسشىلىعى قۇرامىندا جۇمىس ىستەپ، «قازاگرو» ۇلتتىق حولدينگى» اق پرەزيدەنتى قىزمەتىن اتقاردى.
2018-2019 جىلدارى قارجى ءمينيسترى، 2019-2022 جىلدارى پرەمەر-ءمينيستردىڭ ءبىرىنشى ورىنباسارى – قارجى ءمينيسترى بولدى. 2022 جىلعى قاڭتاردان 2024 جىلعى اقپانعا دەيىن قازاقستان رەسپۋبليكاسىنىڭ پرەمەر-ءمينيسترى قىزمەتىن اتقاردى.
2024 جىلعى 1 ساۋىردەگى پرەزيدەنت جارلىعىمەن جوعارى اۋديتورلىق پالاتانىڭ توراعاسى بولىپ تاعايىندالعان.
