پرەزيدەنت قىلمىستىق جولمەن الىنعان كىرىستەردى زاڭداستىرۋعا قاراستى بىرقاتار جارلىقتارعا وزگەرىس ەنگىزدى، دەپ حابارلايدى "ادىرنا" ۇلتتىق پورتالى.
مەملەكەت باسشىسىنىڭ جارلىعىمەن قارجى نارىعىن رەتتەۋ جانە دامىتۋ اگەنتتىگىنىڭ، باسەكەلەستىكتى قورعاۋ جانە دامىتۋ اگەنتتىگىنىڭ جانە قارجىلىق مونيتورينگ اگەنتتىگىنىڭ فۋنكتسيالارى كەڭەيتىلىپ، ناقتىلاندى.
قۇجاتقا سايكەس، قارجى نارىعىن رەتتەۋ جانە دامىتۋ اگەنتتىگىنىڭ قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى زاڭناما تالاپتارىنىڭ ساقتالۋىنا باقىلاۋ جانە قاداعالاۋ جونىندەگى وكىلەتتىكتەرى ناقتىلاندى. اگەنتتىكتىڭ باقىلاۋ اياسىنا قازاقستاننىڭ ەكسپورتتىق-كرەديتتىك اگەنتتىگى، بەيرەزيدەنت بانكتەر مەن ساقتاندىرۋ ۇيىمدارىنىڭ فيليالدارى، بەيرەزيدەنت ساقتاندىرۋ بروكەرلەرى، سونداي-اق ۇلتتىق پوشتا وپەراتورى ەنگىزىلدى.
سونىمەن قاتار باسەكەلەستىكتى قورعاۋ جانە دامىتۋ اگەنتتىگىنىڭ فۋنكتسيالارىنا دا وزگەرىستەر ەنگىزىلدى. اگەنتتىككە تاۋار بيرجالارىنىڭ، بيرجالىق بروكەرلەردىڭ، كليرينگتىك ورتالىقتاردىڭ قىلمىستىق جولمەن الىنعان كىرىستەردى زاڭداستىرۋعا، تەرروريزمدى جانە جاپپاي قىرىپ-جويۋ قارۋىن تاراتۋدى قارجىلاندىرۋعا قارسى زاڭناما تالاپتارىن ساقتاۋىنا باقىلاۋ جاساۋ مىندەتى جۇكتەلدى. سونداي-اق بۇل سالاداعى ىشكى باقىلاۋ قاعيدالارىنا قويىلاتىن تالاپتاردى بەكىتۋ قۇزىرەتى بەرىلدى.
قارجىلىق مونيتورينگ اگەنتتىگى تۋرالى ەرەجەگە ەنگىزىلگەن وزگەرىستەرگە سايكەس، اگەنتتىك كۇماندى دەپ تانىلعان جەكە جانە زاڭدى تۇلعالار تۋرالى اقپاراتتى قۇقىق قورعاۋ جانە ارنايى مەملەكەتتىك ورگاندارعا جولداپ، بۇل جونىندە باس پروكۋراتۋرانى حاباردار ەتەدى. سونىمەن قاتار جاريا لاۋازىمدى تۇلعالاردىڭ، ولاردىڭ جۇبايلارى مەن جاقىن تۋىستارىنىڭ تىزبەسىن جۇرگىزۋ قۇزىرەتى بەرىلدى.
بۇدان بولەك، قىلمىستىق جازاسىن وتەپ شىققان، بىراق سوتتىلىعى الىنباعان ادامداردى تەرروريزم مەن ەكسترەميزمدى قارجىلاندىرۋعا بايلانىستى تۇلعالار تىزىمىنەن شىعارۋ ءتارتىبى ناقتىلاندى.
اگەنتتىكتىڭ فۋنكتسيالارى كولەڭكەلى ەكونوميكاعا قارسى ءىس-قيمىل شارالارىن قابىلداۋ، قارجىلىق مونيتورينگ سالاسىنداعى تاۋەكەلدەردى باعالاۋ جانە ولاردى تومەندەتۋ جۇمىستارىمەن تولىقتىرىلدى. سونداي-اق قارجىلىق مونيتورينگ سۋبەكتىلەرىنە مەملەكەتتىك باقىلاۋ جۇرگىزۋ جانە ۇكىمەتكە ۇسىنىستار ەنگىزۋ وكىلەتتىكتەرى بەرىلدى.
اتالعان جارلىق قولدانىسقا ەنگىزىلدى.
