قازاقستان مەن بەلگيا اراسىنداعى ىنتىماقتاستىقتىڭ جاڭا باعىتتارى عىلىم مەن ءبىلىم سالاسىنداعى بايلانىستاردى نىعايتۋعا، وزىق تاجىريبە الماسۋعا جانە بىرلەسكەن عىلىمي جوبالاردى دامىتۋعا مۇمكىندىك بەرەدى. مەملەكەت باسشىسى قاسىم-جومارت توقاەۆتىڭ بەلگيا كورولى فيليپپپەن كەلىسسوزدەرى بارىسىندا عىلىم، يننوۆاتسيا جانە جوعارى ءبىلىم سالاسىنداعى ارىپتەستىك ماسەلەلەرىنە دە نازار اۋدارىلدى. بۇل باستامالار ەكى ەلدىڭ ۋنيۆەرسيتەتتەرى اراسىنداعى اكادەميالىق بايلانىستى كەڭەيتىپ، ۇزاق مەرزىمدى عىلىمي ىنتىماقتاستىققا جاڭا مۇمكىندىكتەر اشادى.
Namur ۋنيۆەرسيتەتىنىڭ رەكتورى اننيك كاستيو قازاقستان مەن بەلگيانىڭ جوعارى وقۋ ورىندارى اراسىنداعى سەرىكتەستىكتىڭ الەۋەتى، ماتەماتيكا مەن ينفورماتيكا سالالارىنداعى بىرلەسكەن جوبالار جانە جاساندى ينتەللەكتىنى دامىتۋ باعىتىنداعى ىنتىماقتاستىق تۋرالى پىكىر ءبىلدىردى. ونىڭ ايتۋىنشا، ۋنيۆەرسيتەتتەر اراسىنداعى ارىپتەستىك ستۋدەنتتەر الماسۋىمەن شەكتەلمەي، عىلىمي زەرتتەۋلەردى دامىتۋعا، تاجىريبە بولىسۋگە جانە ورتاق جوبالاردى جۇزەگە اسىرۋعا نەگىز بولۋى كەرەك.
سۇحبات بارىسىندا ۋنيۆەرسيتەتتەردىڭ قوعامنىڭ تەحنولوگيالىق جانە الەۋمەتتىك-ەكونوميكالىق دامۋىنا قوساتىن ۇلەسى، عىلىم مەن بيزنەستىڭ بايلانىسىن نىعايتۋ، جاساندى ينتەللەكتىنى جاۋاپكەرشىلىكپەن قولدانۋ جانە ءتورتىنشى بۋىن ۋنيۆەرسيتەتتەرىنىڭ جاڭا تۇجىرىمداماسى دا ءسوز بولدى. سونىمەن قاتار قازاقستان مەن بەلگيا اراسىنداعى اكادەميالىق ارىپتەستىكتىڭ ناتيجەلەرىن باعالاۋ، بىرلەسكەن عىلىمي باستامالاردى كەڭەيتۋ جانە ۋنيۆەرسيتەتتەردى مەملەكەتتىك ورگاندارمەن، كاسىپورىندارمەن بايلانىستىرۋ پەرسپەكتيۆالارى قاراستىرىلدى.
— پرەزيدەنت قاسىم-جومارت توقاەۆ قازاقستاننىڭ دامۋىنداعى عىلىم، يننوۆاتسيا جانە ۋنيۆەرسيتەتتەر اراسىنداعى حالىقارالىق ىنتىماقتاستىقتىڭ ماڭىزىن اتاپ ءوتتى. بۇل باعىتتار كورول فيليپپپەن وتكەن كەلىسسوزدەر بارىسىندا دا كوتەرىلدى. قازاقستاننىڭ ەۋروپا ۋنيۆەرسيتەتتەرىمەن ىنتىماقتاستىعىنىڭ كەڭەيۋىنە قالاي باعا بەرەسىز؟
— بۇگىندە الەمدىك دامۋ ۇدەرىسىندە ۋنيۆەرسيتەتتەر اراسىنداعى ىنتىماقتاستىقتىڭ ماڭىزى ارتىپ، ورتاق باستامالار مەن عىلىمي ىزدەنىستەرگە كەڭ جول اشىلۋدا. پرەزيدەنت قاسىم-جومارت توقاەۆتىڭ عىلىمدى، يننوۆاتسيانى جانە حالىقارالىق اكادەميالىق بايلانىستاردى دامىتۋعا باسىمدىق بەرۋى قازاقستاننىڭ جاھاندىق ءبىلىم مەن عىلىمي زەرتتەۋلەر كەڭىستىگىندەگى ورنىن نىعايتۋعا جول اشادى. مۇنداي ارىپتەستىك ستۋدەنتتەر الماسۋ باعدارلامالارىمەن شەكتەلمەي، ۇزاق مەرزىمدى عىلىمي جوبالار مەن تاجىريبە الماسۋدى دا قامتۋى قاجەت. ستۋدەنتتەردىڭ حالىقارالىق اكادەميالىق ۇتقىرلىعى ولاردىڭ دۇنيەتانىمىن كەڭەيتىپ، الەمدىك ۇدەرىستەردى تەرەڭىرەك تۇسىنۋىنە مۇمكىندىك بەرەدى.
سونىمەن قاتار ادامزات الدىنداعى كۇردەلى ماسەلەلەردى شەشۋ ءۇشىن ۋنيۆەرسيتەتتەر اراسىندا سەنىمدى بايلانىس ورناتىپ، عالىمدار مەن وقىتۋشىلاردىڭ تاجىريبە الماسۋىنا جاعداي جاساۋ ماڭىزدى. اسىرەسە بىرلەسكەن عىلىمي زەرتتەۋلەر جۇرگىزۋ، وزىق تاجىريبەلەردى ەنگىزۋ جانە ورتاق جوبالاردى جۇزەگە اسىرۋ ۇزاق مەرزىمدى ناتيجەلەرگە قول جەتكىزۋگە مۇمكىندىك بەرەدى. قازاقستاننىڭ شەتەلدىك جوعارى وقۋ ورىندارىمەن اكادەميالىق ارىپتەستىكتى كەڭەيتۋگە باعىتتالعان باستامالارى وتاندىق عىلىمنىڭ الەۋەتىن ارتتىرىپ، حالىقارالىق عىلىمي قاۋىمداستىقپەن بايلانىسىن نىعايتۋعا ىقپال ەتەدى.
قازاقستاننىڭ جوعارى وقۋ ورىندارىمەن جاسالعان كەلىسىمدەردىڭ نەگىزگى ماقساتى دا – وسىنداي بەرىك اكادەميالىق بايلانىستار ورناتىپ، عىلىم مەن ءبىلىم سالاسىنداعى ىنتىماقتاستىقتى ناقتى ناتيجەلەرگە باعىتتاۋ. مەنىڭ ويىمشا، مەملەكەت باسشىسىنىڭ حالىقارالىق ارىپتەستىكتى دامىتۋعا باعىتتالعان ساياساتى قازاقستاندىق ۋنيۆەرسيتەتتەردىڭ جاڭا مۇمكىندىكتەرگە قول جەتكىزۋىنە جانە ەلدىڭ عىلىمي الەۋەتىنىڭ ارتۋىنا نەگىز قالايدى.
— Wallonie-Bruxelles International ۇيىمىنىڭ مالىمەتىنشە، مەملەكەتتىك ساپار اياسىندا University of Namur مەن قازاقستاننىڭ جوعارى وقۋ ورىندارى اراسىندا جاڭا كەلىسىمدەرگە قول قويۋ جوسپارلانىپ وتىر. ءسىزدىڭ ويىڭىزشا، ءبىلىم بەرۋ مەن عىلىمي زەرتتەۋلەردىڭ قاي باعىتتارى مۇنداي ارىپتەستىكتى دامىتۋ ءۇشىن بارىنشا پەرسپەكتيۆالى؟
— بۇعان دەيىن KBTU-مەن ەكونوميكا باعىتى بويىنشا ىنتىماقتاستىق ورناتىپ، ستۋدەنتتەر الماسۋ باعدارلامالارىن جۇزەگە اسىردىق. بۇل باستاما قازاقستاندىق ستۋدەنتتەرگە بەلگيادا ءبىلىم الىپ، ەۋروپالىق ءبىلىم بەرۋ تاجىريبەسىمەن تانىسۋعا، كاسىبي جانە اكادەميالىق كوكجيەگىن كەڭەيتۋگە مۇمكىندىك بەردى. وسى وڭ تاجىريبەنى نەگىزگە الا وتىرىپ، ءبىز ارىپتەستىك اياسىن كەڭەيتىپ، جاڭا اكادەميالىق باعىتتاردى قامتۋ تۋرالى شەشىم قابىلدادىق.
جاقىندا قول قويىلعان كەلىسىم ماتەماتيكا سالاسىنداعى ىنتىماقتاستىقتى دامىتۋعا باعىتتالعان. سونىمەن قاتار، ينفورماتيكا بويىنشا دا بىرلەسكەن جوبالار جۇزەگە اسىرىلىپ كەلەدى. الداعى ۋاقىتتا وسى باعىتتارداعى بايلانىستى نىعايتىپ، باسقا دا عىلىم مەن ءبىلىم سالالارىندا جاڭا مۇمكىندىكتەردى قاراستىرۋعا بولادى. بۇل قازاقستاندىق جانە بەلگيالىق ۋنيۆەرسيتەتتەردىڭ عىلىمي الەۋەتىن ۇشتاستىرىپ، وقىتۋشىلار مەن زەرتتەۋشىلەردىڭ تاجىريبە الماسۋىنا، ستۋدەنتتەردىڭ حالىقارالىق ءبىلىم بەرۋ كەڭىستىگىندەگى مۇمكىندىكتەرىن كەڭەيتۋگە جول اشادى.
اكادەميالىق ارىپتەستىكتىڭ بەرىك نەگىزى – سەنىم، كاسىبي بايلانىس جانە ورتاق مۇددە. ۋنيۆەرسيتەت وكىلدەرى ءبىر-ءبىرىن جاقىنىراق تانىپ، تاجىريبەلەرىمەن بولىسكەن سايىن، بىرلەسكەن عىلىمي زەرتتەۋلەر جۇرگىزۋگە جانە ءبىلىم بەرۋ سالاسىنداعى جاڭا باستامالاردى جۇزەگە اسىرۋعا قولايلى جاعداي قالىپتاسادى. مۇنداي جوبالار ەكى ەلدىڭ دە عىلىمي جانە ءبىلىم بەرۋ جۇيەسىنە پايدا اكەلىپ، ۇزاق مەرزىمدى ناتيجەلەرگە قول جەتكىزۋگە ىقپال ەتەدى.
قازاقستان مەن بەلگيا ۋنيۆەرسيتەتتەرى اراسىنداعى كەلىسىمدەر وسى باعىتتاعى ىنتىماقتاستىقتى تەرەڭدەتۋگە نەگىز بولادى. الداعى ۋاقىتتا ستۋدەنتتەر مەن عالىمدارعا ارنالعان جاڭا مۇمكىندىكتەر قالىپتاستىرىپ، بىرلەسكەن زەرتتەۋلەردى دامىتۋ جانە اكادەميالىق بايلانىستاردى نىعايتۋ ارقىلى ەكى ەل اراسىنداعى ءبىلىم مەن عىلىم سالاسىنداعى سەرىكتەستىكتىڭ اياسىن كەڭەيتۋگە بولادى.
— پرەزيدەنت قاسىم-جومارت توقاەۆتىڭ باسشىلىعىمەن قازاقستان Alem.AI سياقتى باستامالاردى قامتيتىن جاساندى ينتەللەكت ەكوجۇيەسىن دامىتىپ، تەحنولوگيالىق جاڭعىرتۋعا جانە ۇلتتىق عىلىمي الەۋەتتى ارتتىرۋعا باسىمدىق بەرىپ كەلەدى. University of Namur رەكتورى رەتىندە بۇل باعىتتاعى باستامالاردىڭ الەۋەتىن قالاي باعالايسىز؟
— جاساندى ينتەللەكت مەملەكەتتىك باسقارۋ جۇيەسىندەگى اكىمشىلىك ۇدەرىستەردى وڭتايلاندىرۋعا، سونداي-اق ۋنيۆەرسيتەتتەردىڭ نەگىزگى قىزمەت باعىتتارى – عىلىمي زەرتتەۋلەر مەن ءبىلىم بەرۋ ساپاسىن ارتتىرۋعا كەڭ مۇمكىندىكتەر اشادى. بۇل رەتتە جاساندى ينتەللەكتىنى ءتيىمدى پايدالانۋ، ونىڭ ادام كاپيتالىنىڭ دامۋىنا ىقپالىن ارتتىرۋ جانە تەحنولوگيالىق جاڭاشىلدىقتاردى قوعام يگىلىگىنە باعىتتاۋ ماڭىزدى. پرەزيدەنت قاسىم-جومارت توقاەۆتىڭ قازاقستاندا جاساندى ينتەللەكتىنى دامىتۋعا، تسيفرلىق ترانسفورماتسيانى جەدەلدەتۋگە جانە زاماناۋي تەحنولوگيالاردى ءبىلىم مەن عىلىم سالاسىنا ەنگىزۋگە باسىمدىق بەرۋى وسى باعىتتاعى جاڭا مۇمكىندىكتەرگە جول اشىپ وتىر.
قازاقستان مەن بەلگيا ۋنيۆەرسيتەتتەرى اراسىنداعى ىنتىماقتاستىق جاساندى ينتەللەكت تەحنولوگيالارىن جەتىلدىرۋمەن قاتار، ولاردىڭ قوعامعا اسەرىن كەشەندى زەرتتەۋگە دە مۇمكىندىك بەرەدى. اتاپ ايتقاندا، گۋمانيتارلىق جانە الەۋمەتتىك عىلىمدار سالاسىنداعى عالىمداردىڭ بىرلەسكەن جۇمىسى جاساندى ينتەللەكتىنى جاۋاپكەرشىلىكپەن قولدانۋ قاعيداتتارىن قالىپتاستىرۋعا، ەتيكالىق نورمالاردى ازىرلەۋگە جانە تەحنولوگيالاردىڭ قورشاعان ورتاعا اسەرىن ەسكەرۋگە ۇلەس قوسا الادى. سونىمەن بىرگە زياتكەرلىك مەنشىكتى قورعاۋ، جەكە دەرەكتەردىڭ قاۋىپسىزدىگىن قامتاماسىز ەتۋ جانە عىلىمي زەرتتەۋلەردىڭ ادالدىعىن ساقتاۋ ماسەلەلەرىنە دە نازار اۋدارۋ قاجەت.
جاساندى ينتەللەكتىنىڭ الەۋەتىن تولىق پايدالانۋ ءۇشىن ونى ادامنىڭ مۇمكىندىكتەرىن كەڭەيتەتىن ءتيىمدى قۇرال رەتىندە قاراستىرعان ءجون. اسىرەسە ءبىلىم بەرۋ سالاسىندا جاستاردىڭ سىني ويلاۋ، شىعارماشىلىق، دەربەس شەشىم قابىلداۋ جانە تالداۋ جاساۋ داعدىلارىن دامىتۋ ماڭىزدى. بۇل قابىلەتتەردى جاڭا تەحنولوگيالارمەن ۇشتاستىرۋ ءبىلىم ساپاسىن ارتتىرىپ، بولاشاق مامانداردىڭ كاسىبي الەۋەتىن نىعايتۋعا مۇمكىندىك بەرەدى.
وسى تۇرعىدان العاندا، قازاقستان مەن بەلگيا ۋنيۆەرسيتەتتەرىنىڭ بىرلەسكەن زەرتتەۋلەرى ادام مەن تەحنولوگيا اراسىنداعى ءتيىمدى بايلانىستى قالىپتاستىرۋعا، جاساندى ينتەللەكتىنى قاۋىپسىز ءارى جاۋاپتى پايدالانۋدىڭ وزىق تاجىريبەلەرىن ازىرلەۋگە جول اشادى. پرەزيدەنت قاسىم-جومارت توقاەۆتىڭ تەحنولوگيالىق جاڭعىرۋ مەن عىلىمي الەۋەتتى ارتتىرۋعا باعىتتالعان باستامالارى اياسىندا مۇنداي حالىقارالىق ارىپتەستىك قازاقستاننىڭ جاساندى ينتەللەكت سالاسىنداعى مۇمكىندىكتەرىن كەڭەيتىپ، عىلىم مەن ءبىلىمنىڭ دامۋىنا جانە تەحنولوگيالاردىڭ ادام يگىلىگىنە قىزمەت ەتۋىنە ىقپال ەتە الادى.
— ءسىز University of Namur جانىنان يننوۆاتسيالىق ەكوجۇيەلەردى، تسيفرلىق ترانسفورماتسيانى جانە جاڭا تەحنولوگيالاردىڭ قوعامعا اسەرىن زەرتتەيتىن شىعارماشىلىق پەن يننوۆاتسيالاردى زەرتتەۋ ورتالىعىن قۇردىڭىز. قازاقستان ۋنيۆەرسيتەتتىك عىلىمدى كاسىپكەرلىكپەن، ونەركاسىپپەن جانە تەحنولوگيالىق دامۋ ۇدەرىستەرىمەن تىعىز بايلانىستىرۋعا ۇمتىلىپ وتىر. ءسىزدىڭ تاجىريبەڭىزدىڭ قاي قىرلارى قازاقستاندىق جوعارى وقۋ ورىندارى ءۇشىن پايدالى بولۋى مۇمكىن؟ عىلىمي زەرتتەۋلەردىڭ ناقتى ەكونوميكالىق جانە الەۋمەتتىك ناتيجەلەرگە اينالۋى ءۇشىن قانداي جاعدايلار قاجەت؟
— ۋنيۆەرسيتەتتەر وزدەرى ورنالاسقان وڭىرلەردىڭ الەۋمەتتىك-ەكونوميكالىق جانە يننوۆاتسيالىق دامۋىنا ىقپال ەتەتىن ماڭىزدى ينستيتۋتتاردىڭ ءبىرى. ولاردىڭ الەۋەتىن تولىق پايدالانۋ ءۇشىن ءبىلىم بەرۋ مەن عىلىمي زەرتتەۋلەردى ەكونوميكالىق سەكتوردىڭ، مەملەكەتتىك ورگانداردىڭ جانە ازاماتتىق قوعامنىڭ قاجەتتىلىكتەرىمەن ۇشتاستىرۋ قاجەت. وسىنداي سەرىكتەستىك ورتاق ماقساتتاردى ايقىنداۋعا، تاجىريبە مەن مۇمكىندىكتەردى بىرىكتىرۋگە، بولاشاق قوعامنىڭ دامۋىنا قاجەتتى جاڭا يدەيالار مەن شەشىمدەردى بىرلەسىپ ازىرلەۋگە جول اشادى. بۇل اسىرەسە تسيفرلىق ترانسفورماتسيا جانە اۋقىمدى تەحنولوگيالىق وزگەرىستەر كەزەڭىندە ايرىقشا ماڭىزعا يە.
پرەزيدەنت قاسىم-جومارت توقاەۆتىڭ عىلىمدى، يننوۆاتسيانى جانە تسيفرلاندىرۋدى دامىتۋعا باسىمدىق بەرۋى ۋنيۆەرسيتەتتەردىڭ عىلىمي الەۋەتىن ەل يگىلىگىنە باعىتتاۋعا جانە عىلىمي جەتىستىكتەردى ەكونوميكانىڭ ناقتى قاجەتتىلىكتەرىمەن بايلانىستىرۋعا مۇمكىندىك بەرەدى. مەملەكەتتىك ورگاندار، بيزنەس، عىلىمي قاۋىمداستىق جانە ازاماتتىق قوعام اراسىنداعى ارىپتەستىك جاڭا تەحنولوگيالاردى ەنگىزۋگە، بىلىكتى ماماندار دايارلاۋعا جانە قازاقستاننىڭ ۇزاق مەرزىمدى دامۋىنا ۇلەس قوسادى. بۇل رەتتە ۋنيۆەرسيتەتتەر عىلىمي ءبىلىم مەن پراكتيكالىق تاجىريبەنى ۇشتاستىراتىن، جاڭا باستامالارعا سەرپىن بەرەتىن ماڭىزدى الاڭ رەتىندە كورىنەدى.
ءار سالانىڭ وزىندىك مىندەتتەرى، ماقساتتارى مەن جۇمىس مادەنيەتى بار. وسى ەرەكشەلىكتەردىڭ ۇيلەسۋى جاڭا يدەيالاردىڭ تۋىنداۋىنا جانە تىڭ شەشىمدەردىڭ قالىپتاسۋىنا نەگىز بولادى. ۋنيۆەرسيتەتتەر، مەملەكەتتىك ورگاندار، كاسىپكەرلىك قۇرىلىمدار مەن ازاماتتىق قوعام وكىلدەرى بىرلەسىپ جۇمىس ىستەگەن كەزدە، ولاردىڭ تاجىريبەسى مەن كوزقاراستارى ءبىرىن-ءبىرى تولىقتىرىپ، ورتاق مىندەتتەردى شەشۋدىڭ جاڭا جولدارىن ۇسىنادى. مۇنداي بايلانىستار عىلىمي جاڭالىقتاردى تاجىريبەدە قولدانۋعا، يننوۆاتسيالىق جوبالاردى جۇزەگە اسىرۋعا جانە قوعامنىڭ سۇرانىسىنا ساي باستامالاردى دامىتۋعا مۇمكىندىك بەرەدى. سوندىقتان زاماناۋي ۋنيۆەرسيتەتتەردىڭ ميسسياسى ءبىلىم مەن عىلىمدى دامىتۋمەن قاتار، قوعامنىڭ ءتۇرلى سالالارى اراسىنداعى بايلانىستى نىعايتىپ، ورتاق دامۋعا بەلسەندى ۇلەس قوسۋدى دا قامتيدى.
قازىرگى ۋاقىتتا مەن ءتورتىنشى بۋىن ۋنيۆەرسيتەتتەرىنىڭ جاڭا تۇجىرىمداماسىن زەرتتەپ ءجۇرمىن. بۇل مودەل ۋنيۆەرسيتەتتەردىڭ قوعاممەن بايلانىسىن تەرەڭدەتۋگە، عىلىمي ءبىلىمدى پراكتيكالىق مىندەتتەردى شەشۋگە باعىتتاۋعا جانە ءتۇرلى سالالاردىڭ الەۋەتىن بىرىكتىرۋگە نەگىزدەلگەن. وتكەن اپتادا ەيندحوۆەن تەحنولوگيالىق ۋنيۆەرسيتەتىندە وسى تاقىرىپقا ارنالعان العاشقى فورۋم ءوتتى. باسقوسۋ ۋنيۆەرسيتەتتەردىڭ بولاشاقتاعى دامۋ باعىتىن تالقىلاۋعا، جاڭا يدەيالارمەن بولىسۋگە جانە حالىقارالىق تاجىريبەنى زەردەلەۋگە مۇمكىندىك بەردى.
قازاقستاندىق ارىپتەستەرىممەن وسى تۇجىرىمدامانى تالقىلاۋعا، تاجىريبە الماسۋعا جانە ونى قازاقستاننىڭ عىلىمي-ءبىلىم بەرۋ جۇيەسىنىڭ ەرەكشەلىكتەرىنە سايكەس دامىتۋ جولدارىن قاراستىرۋعا قۋانا قاتىسار ەدىم. قازاقستان مەن بەلگيا ۋنيۆەرسيتەتتەرى اراسىنداعى كاسىبي ديالوگ بىرلەسكەن عىلىمي باستامالاردى دامىتۋعا، يننوۆاتسيالىق جوبالاردى جۇزەگە اسىرۋعا جانە جوعارى وقۋ ورىندارىنىڭ قوعام دامۋىنداعى ءرولىن نىعايتۋعا ىقپال ەتەدى دەپ سەنەمىن. مۇنداي ىنتىماقتاستىق ءبىلىم مەن عىلىمنىڭ مۇمكىندىكتەرىن كەڭەيتىپ، بولاشاق ۇرپاق ءۇشىن جاڭا دامۋ پەرسپەكتيۆالارىن قالىپتاستىرۋعا نەگىز بولادى.
— پرەزيدەنت قاسىم-جومارت توقاەۆ حالىقارالىق ىنتىماقتاستىقتىڭ ناقتى ناتيجەلەرگە باعىتتالۋى ماڭىزدى ەكەنىن اتاپ ءوتتى. وسى تۇرعىدان العاندا، قازاقستان مەن بەلگيا اراسىنداعى اكادەميالىق ارىپتەستىكتى الداعى بىرنەشە جىلدا قانداي ناقتى جەتىستىكتەر ارقىلى باعالاۋعا بولادى؟
— اتالعان كورسەتكىشتەر قازاقستان مەن بەلگيا اراسىنداعى ىنتىماقتاستىقتىڭ دامۋ قارقىنىن باعالاۋعا جانە بىرلەسكەن جەتىستىكتەرىمىزدى ايقىنداۋعا مۇمكىندىك بەرەدى. سونىمەن قاتار، الدىڭعى سۇراقپەن ساباقتاستىرا قاراستىرساق، ۋنيۆەرسيتەتتەردى، كاسىپورىنداردى جانە مەملەكەتتىك ورگانداردى بىرىكتىرەتىن قازاقستاندىق-بەلگيالىق ارىپتەستىكتىڭ قالىپتاسۋى دا ماڭىزدى كورسەتكىشتەردىڭ ءبىرى بولا الادى.
مۇنداي سەرىكتەستىك عىلىم، ءبىلىم جانە ەكونوميكا سالالارى اراسىنداعى بايلانىستى نىعايتىپ، بىرلەسكەن زەرتتەۋلەردى دامىتۋعا، يننوۆاتسيالىق جوبالاردى جۇزەگە اسىرۋعا جانە ەكى ەلگە دە پايدا اكەلەتىن جاڭا باستامالاردى ىسكە اسىرۋعا جول اشادى. بۇل قازاقستان مەن بەلگيا اراسىنداعى ىنتىماقتاستىقتىڭ اياسىن كەڭەيتىپ، ونىڭ ناقتى ناتيجەلەرمەن تولىعۋىنا ىقپال ەتەدى.
