فوتو: Moscow City Court Press Service/ Reuters
2022 جىلى ۋكراينادا رەسەي اسكەري كۇشتەرى ۇستاعان اقش ازاماتى ستيۆەن حاببارد بوساتىلدى. بۇل تۋرالى رەسەي پرەزيدەنتى ۆلاديمير پۋتين 21 قازاندا سانكت-پەتەربۋرگتە اقش پرەزيدەنتىنىڭ ارنايى وكىلى ستيۆەن ۋيتكوففپەن كەزدەسۋى كەزىندە مالىمدەدى، دەپ حابارلايدى «ادىرنا» ۇلتتىق پورتالى DW-گە سىلتەمە جاساپ.
رەسەي باسشىسىنىڭ ايتۋىنشا، 73 جاستاعى حاببارد قازىر سانكت-پەتەربۋرگتەگى پۋلكوۆو اۋەجايىندا ءجۇر.
كەزدەسۋ بارىسىندا ستيۆەن ۋيتكوفف حابباردتىڭ بوساتىلعانى ءۇشىن اقش پرەزيدەنتى دونالد ترامپتىڭ جانە امەريكا قۇراما شتاتتارىنىڭ اتىنان پۋتينگە العىس ءبىلدىردى. ونىڭ سوزىنشە، بىرنەشە كۇن بۇرىن ول حابباردتىڭ ۇلىمەن كەزدەسكەن. ول شىركەۋدە ءدىن قىزمەتكەرى بولىپ جۇمىس ىستەيدى.
بۇعان دەيىن دونالد ترامپ جۋرناليستەرگە رەسەي پرەزيدەنتىنەن امەريكالىق ازاماتتى بوساتۋدى سۇراعانىن راستاعان. سونداي-اق ول حاببارد ماسەلەسى بويىنشا بۇعان دەيىن دە كۇش سالىنعانىن ايتىپ، بۇل ءىستى شەشۋدە ءوز ۇلەسى بار ەكەنىن مالىمدەگەن.
«ماعان سەنىڭىزدەر. بۇل تۋرالى ايتقىم كەلمەيدى. حابباردتى بوساتۋ ءۇشىن مەن قىزمەتكە كەلگەنگە دەيىن-اق ۇزاق ۋاقىت بويى كۇش سالىنعان. مەن باسقالار ىستەي المايتىن نارسەنى ىستەپ ءجۇرمىن»، – دەدى ترامپ.
ستيۆەن حاببارد – زەينەتكەر، بۇرىن ءارتۇرلى ەلدەردە جۇمىس ىستەگەن اعىلشىن ءتىلى مۇعالىمى. ول 2014 جىلدان باستاپ ۋكراينانىڭ يزيۋم قالاسىندا تۇرعان.
رەسەي تەرگەۋىنىڭ مالىمەتىنشە، ۋكرايناداعى تولىق اۋقىمدى سوعىس باستالعاننان كەيىن حاببارد تابىس تابۋ ماقساتىندا قالالىق اۋماقتىق قورعانىس باتالونىنا قوسىلعان. الايدا كەيىن ءوز ومىرىنە قاۋىپ تونگەندىكتەن، بولىمنەن كەتكەن.
2022 جىلعى ساۋىردە ونى رەسەي اسكەري كۇشتەرى ۇستاعان. ال 2024 جىلعى قازاندا سوت ونى جالدامالىلىق بابى بويىنشا التى جىل ون ايعا جالپى رەجيمدەگى كولونياعا قاماۋ تۋرالى ۇكىم شىعارعان.
سوتتا حاببارد كىناسىن مويىنداعانىمەن، كەيىن اۋماقتىق قورعانىس قۇرامىندا نەمەسە باسقا دا قارۋلى بولىمشەلەردە ەشقاشان قىزمەت ەتپەگەنىن مالىمدەگەن. «ساياسي تۇتقىنداردى قولداۋ. مەموريال» قۇقىق قورعاۋ جوباسىنىڭ حابارلاۋىنشا، ونىڭ اسكەري بولىمدەردە قىزمەت ەتكەنىن راستايتىن دەرەكتەر تابىلماعان. ۋكراينا بيلىگى دە مۇنداي قىزمەتتى راستايتىن دالەلدەر انىقتاماعان.
AFP اگەنتتىگىنىڭ حابارلاۋىنشا، حاببارد تۇرمەدە «ۇنەمى سوققىعا جىعىلعان». اقش-تىڭ بۇرىنعى پرەزيدەنتى دجو بايدەننىڭ اكىمشىلىگى كەزىندە امەريكالىق بيلىك رەسەي ازاماتقا كونسۋلدىق كومەك كورسەتۋدەن باس تارتتى دەپ ايىپتاعان.
