اقش پرەزيدەنتى دونالد ترامپ قىزمەتىندەگى مەرزىمى اياقتالعانعا دەيىن اتلانت نەمەسە تىنىق مۇحيتتارىنىڭ ءبىرىنىڭ اتاۋىن وزگەرتىپ، ونى «ترامپ مۇحيتى» نە «امەريكا مۇحيتى» دەپ اتاۋدى قاراستىرىپ ءجۇر. بۇل تۋرالى تاسس اگەنتتىگى جازدى، دەپ حابارلايدى “ادىرنا”.
«بىزگە مۇحيت كەرەك. سوندىقتان اتلانت مۇحيتىن نەمەسە تىنىق مۇحيتىن وزگەرتۋدى ويلاپ ءجۇرمىن. ونى «ترامپ مۇحيتى» نەمەسە «امەريكا مۇحيتى» دەپ اتايمىز. شامامەن وسىنداي اتاۋ بولادى. مۇنى مەن قىزمەتىمنەن كەتپەي تۇرىپ جاساۋىمىز كەرەك. مەنىڭ ويىمشا، بىزگە ءوز مۇحيتىمىز كەرەك، سونداي-اق ۇلى وزەنىمىز دە بولۋى قاجەت. بىراق ميسسيسيپي وزەنىنىڭ اتاۋىن وزگەرتپەيمىن. ماعان ميسسيسيپي ۇنايدى»، – دەدى ول.
سونىمەن قاتار اق ءۇي باسشىسى ورمۋز بۇعازىنىڭ اتاۋىن «ترامپ بۇعازى» دەپ وزگەرتۋ مۇمكىندىگىن دە قايتا كوتەردى.
ايتا كەتەيىك، بۇعان دەيىن دونالد ترامپ مەكسيكا شىعاناعىن «امەريكا شىعاناعى»، ال ونتاريو كولىن «امەريكا كولى» دەپ قايتا اتاۋعا قاتىستى جارلىقتارعا قول قويعان بولاتىن. بۇل قۇجاتتار فەدەرالدىق ۇكىمەتتىڭ رەسمي قۇجاتتارى مەن كارتالارىندا قولدانىلاتىن اتاۋلاردى وزگەرتۋگە باعىتتالعان.
الايدا اتالعان وزگەرىستەردىڭ بولاشاعى كەيىنگى اكىمشىلىكتىڭ شەشىمىنە بايلانىستى بولۋى مۇمكىن. ترامپتان كەيىنگى پرەزيدەنت ءتيىستى اتقارۋشىلىق جارلىقتارعا قول قويىپ، بۇل اتاۋلاردى قايتا وزگەرتۋگە قۇقىلى.
