بۇرىنعى ءماجىلىس دەپۋتات سامات نۇرتازا 123 كۇننەن بەرى جۇمىسسىز جۇرگەنىن ايتتى، دەپ حابارلايدى «ادىرنا» ءتىلشىسى.
«جۇمىسسىز جاتقانىما 123 كۇن بولدى. بۇرىن باتارەيكاسى تەز وتىراتىن سمارتفونىم، قازىر ءلام-ميم تىنىش، 2 كۇنگە قۋاتتىلىعى جەتىپ جاتىر. ءھام ادامي كەيىپ ساقتاپ قالعان 7-8 ادامنان باسقا ەشكىم حابارلاسپايدى. ءوزىم حابارلاسسام، تۇتقانى كوتەرەتىن ارىپتەستەر مەن شەنەۋنىكتەر تەلەفون كوتەرمەيتىن بولدى. قىزىق ءبىر جاعىنان. سولاي بولاتىنىن دا بىلگەم. بىراق “كىم وزگەرسە دە، ءدال وسى ادام وزگەرمەيد-اۋ” دەگەن ادامدار وزگەرىپ كەتكەنىنە كۋا بولىپ وتىرمىن. “سەم، براتان!”، “ۆ ليۋبوە ۆرەميا، ساكە!”، “ۆسەگدا نا سۆيازي، سامات رۋسلانوۆيچ!” دەپ قورقورعا شاقىراتىن ۆيتسە-مينيسترلەر ءلام-ميم عايىپ بولدى»،–دەدى ول.
ساياساتكەر مۇنداي جاعداي قازىرگى قۇرىلتايدىڭ 145 دەپۋتاتىنىڭ ءبارىنىڭ باسىنان وتەتىنىن اتاپ ءوتتى. ونىڭ پىكىرىنشە، ولار ازىرگە مۇنىڭ نە ەكەنىن تۇسىنبەيدى.
«ورنىڭنان كەتتىڭ، دەپۋتات بولدىڭ. ال دەپۋتاتتىقتان كەيىن قايتايىن دەسەڭ، ورنىڭدا ادام وتىر. تىعىرىق. بۇيىرسا، جۇمىسقا شىعامىن عوي. باس امان بولسىن. ەلدىڭ الدى بولماسام دا، سورى ەمەسپىن، ەكى قولعا ءبىر كۇرەك تابىلار. بىراق بۇل 123 كۇن جاقسى ومىرلىك ساباق بولدى»،–دەدى سامات نۇرتازا.
بۇدان بولەك، ول مەملەكەتتىك قىزمەتكەرلەردىڭ نەلىكتەن ءوز ورىنتاعىنا سونشالىقتى جابىسىپ قالاتىنى تۋرالى فيلوسوفيالىق ويلارىمەن ءبولىستى. ونىڭ پىكىرىنشە، لاۋازىم دەگەنىمىز – جاي عانا بيلىك، اقشا نەمەسە جەكە كابينەت ەمەس. ەڭ باستىسى – قوعامعا قاجەت ەكەنىن سەزىنۋ. شەنەۋنىكتەر ءۇشىن ءدال وسى سەزىم نەگىزگى ىنتالاندىرۋشى كۇشكە اينالادى. ال الەۋمەتتىك باسپالداقتاعى ورنىن جوعالتىپ الۋ قورقىنىشى ولاردى ۇنەمى پسيحولوگيالىق كۇرەس جۇرگىزۋگە ءماجبۇر ەتەدى. ساياساتكەردىڭ ايتۋىنشا، بۇل قۇبىلىستى مەملەكەتتىك قىزمەتتە ءوزى جۇمىس ىستەپ كورگەن ادامدار عانا تۇسىنە الادى.
