Būrynǧy Mäjılıs deputat Samat Nūrtaza 123 künnen berı jūmyssyz jürgenın aitty, dep habarlaidy «Adyrna» tılşısı.
«Jūmyssyz jatqanyma 123 kün boldy. Būryn batareikasy tez otyratyn smartfonym, qazır läm-mim tynyş, 2 künge quattylyǧy jetıp jatyr. Häm adami keiıp saqtap qalǧan 7-8 adamnan basqa eşkım habarlaspaidy. Özım habarlassam, tūtqany köteretın ärıptester men şeneunıkter telefon kötermeitın boldy. Qyzyq bır jaǧynan. Solai bolatynyn da bılgem. Bıraq “kım özgerse de, däl osy adam özgermeid-au” degen adamdar özgerıp ketkenıne kuä bolyp otyrmyn. “Sem, bratan!”, “V liuboe vremia, Säke!”, “Vsegda na sviazi, Samat Ruslanovich!” dep qorqorǧa şaqyratyn vise-ministrler läm-mim ǧaiyp boldy»,–dedı ol.
Saiasatker mūndai jaǧdai qazırgı Qūryltaidyŋ 145 deputatynyŋ bärınıŋ basynan ötetının atap öttı. Onyŋ pıkırınşe, olar äzırge mūnyŋ ne ekenın tüsınbeidı.
«Ornyŋnan kettıŋ, deputat boldyŋ. Al deputattyqtan keiın qaitaiyn deseŋ, ornyŋda adam otyr. Tyǧyryq. Būiyrsa, jūmysqa şyǧamyn ǧoi. Bas aman bolsyn. Eldıŋ aldy bolmasam da, sory emespın, ekı qolǧa bır kürek tabylar. Bıraq būl 123 kün jaqsy ömırlık sabaq boldy»,–dedı Samat Nūrtaza.
Būdan bölek, ol memlekettık qyzmetkerlerdıŋ nelıkten öz oryntaǧyna sonşalyqty jabysyp qalatyny turaly filosofiialyq oilarymen bölıstı. Onyŋ pıkırınşe, lauazym degenımız – jai ǧana bilık, aqşa nemese jeke kabinet emes. Eŋ bastysy – qoǧamǧa qajet ekenın sezınu. Şeneunıkter üşın däl osy sezım negızgı yntalandyruşy küşke ainalady. Al äleumettık baspaldaqtaǧy ornyn joǧaltyp alu qorqynyşy olardy ünemı psihologiialyq küres jürgızuge mäjbür etedı. Saiasatkerdıŋ aituynşa, būl qūbylysty memlekettık qyzmette özı jūmys ıstep körgen adamdar ǧana tüsıne alady.
