مادەنيەت جانە سپورت مينيسترلىگى ءتىل ساياساتى كوميتەتىنىڭ ۇيىمداستىرۋىمەن ونلاين رەجيمدە «قازاق ءتىلىن ۇلتارالىق قاتىناس تىلىنە اينالدىرۋدىڭ ءتيىمدى جولدارى» تاقىرىبىندا وتكەن سەمينار-كەڭەستە ەلىمىزدە تۇراتىن ەتنوس وكىلدەرى مەملەكەتتىك ءتىلدى دامىتۋعا بايلانىستى حالىققا ۇندەۋ جولدادى. بۇل تۋرالى وسى جيىنعا قاتىسقان پارلامەنت ءماجىلىسىنىڭ دەپۋتاتى قازىبەك يسا ايتتى، دەپ حابارلايدى “ادىرنا” ۇلتتىق پورتالى.
«كەزدەسۋدە «ۆاترا» ۋكراين مادەني ورتالىعىنىڭ توراعاسى تاراس چەرنەگا، «KAZAKH INVEST» ۇك» اق ءباسپاسوز حاتشىسى نيكولاي پۋتيلين، «احىسكا» تۇرىك ەتنو-مادەني ورتالىعىنىڭ توراعاسى اسكەر پيريەۆ پەن الماتىلىق جاس جىگىت ەۆگەني دەميدەنكو ەل تۇرعىندارىنىڭ جەتپىس پايىزدان استامى مەملەكەت قۇراۋشى ۇلت وكىلدەرى بولعان سوڭ، كوپشىلىك ازشىلىققا ۇلگى بولىپ، ەلىمىزدىڭ ءاربىر ازاماتى مەملەكەتتىك ءتىلدىڭ ماڭىزدىلىعىن تەرەڭدىگىن ءتۇسىنىپ، سوزدەن ناقتى ىسكە، ياعني ءتىلدى ۇيرەنۋگە كوشسە دەگەن ويلارىن ايتتى»، – دەدى ول.
ودان كەيىن ول كەڭەستە «احىسكا» تۇرىك ەتنو-مادەني ورتالىعىنىڭ توراعاسى اسكەر پيريەۆتىڭ ءبىر وقيعانى ەسكە العانىن ايتتى.
«اسكەر پيريەۆ مىناداي جان تەبىرەنتەرلىك وقيعانى ايتىپ بەردى. ىسكەر بايلانىس ورناتۋعا كەلگەن ەۋروپالىق ءبىر ازامات قازاق ءتىلىن بىلمەي تۇرعان كاسىپكەرمەن جۇمىستاس بولۋدان باس تارتىپتى. سەبەبىن سۇراسا، تۋعان ەلىن قادىرلەمەيتىن ادام ەشنارسەنىڭ قادىرىن ۇعا المايدى، قاسيەتسىز ادامدارمەن كاسىپ قۇرۋ قاۋىپتى دەگەن ەكەن.
اسكەر ءسوزىن: «قازاقتىڭ باۋىرساعى ءتاتتى، تابيعاتى سايا، اۋاسى شيپا، تاعامى ءدامدى بولعاندا، ءتىلى نەگە ءتاتتى بولمايدى؟!» – دەپ اياقتادى. كەزدەسۋ سوڭىندا ناقتى ۇسىنىستار مەن پىكىرلەر ەسكەرىلىپ، رەسپۋبليكا جۇرتشىلىعىنا ۇندەۋ جاريالاندى»، – دەدى ول.
ۇندەۋدىڭ تولىق ءماتىنىن جاريالاپ وتىرمىز.
ءۇ ن د ە ۋ
ءبىز ەتنومادەني بىرلەستىك باسشىلارى!
– ءتىل ساياساتىن جۇزەگە اسىراتىن 2020-2025 جىلدارعا ارنالعان مەملەكەتتىك باعدارلاماعا قازاق ءتىلىنىڭ قولدانىسىن مىندەتتەۋ نورماتيۆتەرىن بەكىتەتىن «مەملەكەتتىك ءتىل تۋرالى» زاڭ قابىلداۋعا; قازاقستان رەسپۋبليكاسىنداعى ءتىل تۋرالى زاڭىنداعى «مەملەكەتتiك تiلدi مەڭگەرۋ – قازاقستان رەسپۋبليكاسىنىڭ ءاربiر ازاماتىنىڭ پارىزى» – دەگەن 4-باپتى، «مەملەكەتتiك تiلدi مەڭگەرۋ – قازاقستان رەسپۋبليكاسىنىڭ ءاربiر ازاماتىنىڭ مىندەتى» دەپ اۋىستىرۋعا قاجەتتى شارالاردى ەنگىزۋ;
– قازاقستان رەسپۋبليكاسىنداعى كەز كەلگەن نورماتيۆتىك قۇجات، زاڭ ءماتىنىن الدىمەن مەملەكەتتىك تىلدە ازىرلەۋدى ۇيىمداستىراتىن قاناتقاقتى (پيلوتنىي) جوبانى ىسكە قوسۋ;
– قازاق ءتىلىن مەڭگەرۋ دەڭگەيىن باعالاۋدىڭ قازتەست جۇيەسىن قوعامنىڭ ءارتۇرلى سالاسىندا جۇمىسقا ورنالاسۋ، قىزمەتكە تۇرۋ بارىسىندا ىرىكتەۋ ەرەجەلەرىنە مىندەتتى ەنگىزۋدىڭ نورماتيۆتىك-قۇقىقتىق بازاسىن ازىرلەپ، قۇزىرەتتى مەكەمەلەرمەن كەلىسۋدى ۇيىمداستىرۋ;
– «قازاق ءتىلى»، «قازاقستان تاريحى» سياقتى وقۋ پاندەرىنىڭ مازمۇنىنا قازاق ءتىلىنىڭ ەتنوسارالىق قاتىناس ءتىلى قىزمەتى، ونىڭ سول مارتەبەدە قالىپتاسۋ تاريحىنا قاتىستى جۇيەلى اقپاراتتاردى ەنگىزۋ شارالارىن قولعا الۋ;
– سىرتتان كەلگەن ميگرانتتاردىڭ تىلدىك جانە مادەني بەيىمدەلۋى ءۇشىن مەملەكەتتىك ءتىلدى قاراپايىم دەڭگەيدە ءبىلۋىن مىندەتتەۋدى، سەرتيفيكاتتاۋدى قامتاماسىز ەتەتىن نورماتيۆتىك بازا ازىرلەۋ.
– قازاقتىلدى بيزنەس-كوممۋنيكاتسيا الاڭدارىن كەڭەيتۋگە جانە قۇرالدارىن جەتىلدىرۋگە باسىمدىق بەرۋ;
– مەملەكەتتىك ەمەس كومپانيا، جەكەمەنشىك مەكەمەلەر مەن قارجى، بانك سالاسىنىڭ ۇيىم قىزمەتكەرلەرىن مەملەكەتتىك تىلدە سويلەۋگە ىنتالاندىراتىن نورماتيۆتەر ازىرلەۋ جانە شارالار جۇيەسىن ۇيىمداستىرۋ;
– مەملەكەتتىك ءتىلدىڭ الەۋمەتتىك ءيميدجىن ارتتىرۋ ماقساتىندا جاستار اراسىندا قازاقشا سويلەۋگە شاقىراتىن پىكىر الاڭدارىن، ءتۇرلى اكتسيالار، لاتىنگرافيكالى ءالىپبيدى ەنگىزۋگە بايلانىستى ستريت-ارت بايقاۋلارىن وتكىزۋگە قولداۋ كورسەتۋ.
”ادىرنا” ۇلتتىق پورتالى
