ۇلىتاۋ وبلىسىندا 1-سىنىپ وقۋشىلارىنىڭ 81 پايىزى قازاق تىلىندە ءبىلىم الادى

1948
Adyrna.kz Telegram

بيىل ۇلىتاۋ وبلىسىندا جاڭا وقۋ جىلىن 40663 بالا قارسى الىپ وتىر. ونىڭ ىشىندە 4 440 وقۋشى 1-سىنىپقا قادام باستى. 

بيىلعى وقۋ جىلىندا وبلىستاعى 1-سىنىپ وقۋشىلارىنىڭ 81 پايىزى قازاق تىلىندە ءبىلىم الۋدى تاڭداعان. ءبىلىم كۇنىندە ءوڭىردىڭ بارلىق مەكتەپتەرىندە "مەكتەبىم — مەيىرىم مەكەنى" تاقىرىبىندا سىنىپ ساعاتتارى ءوتتى.

ءوڭىر وقۋشىلارىن ءبىلىم كۇنىمەن العاشقىلاردىڭ ءبىرى بولىپ وبلىس باسشىسى بەرىك ابدىعاليۇلى قۇتتىقتادى. 

“بۇل كۇن  سىزدەردىڭ جاڭا بەلەسكە قول سوزىپ، بيىك شىڭداردى باعىندىرا تۇسۋلەرىڭىزگە، تاعى دا مىڭداعان مۇمكىندىككە جول اشادى. ءبىلىم ءنارىن بويىنا مولىنان ءسىڭىرىپ، تالاپتانۋدان شارشاماعان جاستار عانا بولاشاقتىڭ ىرگەسىن بەرىك ۇستايدى. سول سەبەپتى دە قاجىر-قايراتتارىڭىزدى اياماي، بار كۇش-جىگەرلەرىڭىزدى كەلەشەككە نىق قاراۋعا سارپ ەتىڭىزدەر!”  —  دەدى ول ءوز قۇتتىقتاۋىندا. 

وبلىس ورتالىعى جەزقازعان قالاسىنىڭ اكىمى قايرات شايجانوۆ № 3 جببم-گە بارىپ، سالتاناتتى جيىنعا قاتىستى. ينكليۋزيۆتى ءبىلىم بەرۋدە كوشباسشى مەكتەپ سانالاتىن اتالعان ءبىلىم ورداسىنىڭ وقۋشىلارى مەن ۇستازدارىنا جاڭا وقۋ جىلىندا ساتتىلىك تىلەگەن قالا اكىمى مەكتەپتىڭ جوندەۋ جۇمىستارىمەن دە تانىستى. 

1 قىركۇيەك — ءبىلىم ورداسىنا يمەنە قادام باسقان 1-سىنىپ وقۋشىلارى ءۇشىن ايرىقشا تولقىنىس پەن ەستەن كەتپەس ەستەلىككە تولى كۇن.  بۇگىن وسىنداي ەرەكشە سەزىمدى باستان وتكەرگەن وقۋشىنىڭ ءبىرى — ساتباەۆ قالاسىنداعى № 25 مەكتەپتىڭ 1-سىنىپ وقۋشىسى ايسۇلتان اليموۆ. 

“مەنى مەكتەپكە انام الىپ كەلدى. العاشقى ۇستازىممەن، سىنىپتاستارىممەن تانىستىم. مەن ساباقتى جاقسى وقىپ، ۇلگىلى وقۋشى بولۋعا تىرىسامىن”، — دەيدى ايسۇلتان.  

وبلىس بويىنشا مەكتەپتەردە 4500 پەداگوگ قىزمەت ەتەدى. بيىلعى وقۋ جىلىندا مەكتەپتەرگە كوللەدج بەن ۋنيۆەرسيتەتتى بىتىرگەن 77 جاس پەداگوگ جۇمىسقا قابىلدانعان. ولاردىڭ قاتارىندا جەرگىلىكتى ءو. بايقوڭىروۆ اتىنداعى جەزقازعان ۋنيۆەرسيتەتىن جانە ارقالىق پەداگوگيكالىق ۋنيۆەرسيتەتىن، ەۋرازيا ۇلتتىق ۋنيۆەرسيتەتىن، قىزدار ۇلتتىق پەداگوگيكالىق ۋنيۆەرسيتەتىن تامامداعان جاس ماماندار بار. 

جاڭا وقۋ جىلىندا جاقسى جاڭالىق كوپ. بيىلدان باستاپ جەزقازعان تەحنولوگيا جانە سەرۆيس كوللەدجى مەن ساتباەۆ يندۋستريالدىق كوللەدجىندە پيلوتتىق رەجيمدە وقۋ-وندىرىستىك كومبيناتىنىڭ ۇلگىسىندە 10-سىنىپتاردىڭ 60 وقۋشىسىنا جۇمىسشى بىلىكتىلىكتەرى، ياعني تاماقتاندىرۋدى ۇيىمداستىرۋ، اۆتوسلەسار، تىگىن ءىسى، دانەكەرلەۋ ءىسى بويىنشا كاسىپتىك ءبىلىم بەرىلەتىن بولادى. بۇل وقۋشىلارعا مەكتەپ بىتىرگەندە جالپى ورتا ءبىلىم تۋرالى اتتەستاتقا قوسا جۇمىسشى ماماندىقتىڭ ديپلومى بىرگە بەرىلەدى. 

سونداي-اق، جەزقازعان قالاسىنداعى تۇزەتۋ مەكەمەسى جانىنان № 1 كوللەدج اشىلدى. اتالعان كوللەدجدە 75 جازاسىن وتەۋشى جۇمىسشى بىلىكتىلىگىن الاتىن بولادى. مۇنداي شەشىم جازاسىن وتەپ وتىرعان ازاماتتاردىڭ بوستاندىققا شىقققاندا الەۋمەتتەنۋىنە، جۇمىسقا ورنالاسۋىنا مۇمكىندىك تۋدىرادى.

سونىمەن قاتار، ءوڭىردى دامىتۋدىڭ كەشەندى جوسپارى شەڭبەرىندە قاراستىرىلعان سالالارعا قاجەتتى مامان دايارلاۋ ءۇشىن جەزقازعان گۋمانيتارلىق كوللەدجىندە "شەتەل ءتىلى", قارساقپاي اگروەحنيكالىق كوللەدجىندە "ۆەتەريناريا", "ەكولوگيا جانە قورشاعان ورتا" ماماندىقتارى اشىلدى.

پىكىرلەر