اقمولا وبلىسىندا رەسپۋبليكالىق «كىتاپ وقيتىن ۇلت» جوباسىن ىسكە اسىرۋ جونىندەگى ىنتىماقتاستىق تۋرالى مەموراندۋمعا قول قويىلدى. قۇجاتقا وبلىس اكىمدىگى مەن «كىتاپ وقيتىن ۇلت – چيتايۋششايا ناتسيا» قوعامدىق قورى قول قويىپ، ءوڭىر تۇرعىندارى اراسىندا كىتاپ وقۋ مادەنيەتىن دامىتۋعا جانە وقىرماندىق بەلسەندىلىكتى ارتتىرۋعا باعىتتالعان ءوزارا ىنتىماقتاستىقتىڭ نەگىزىن قالادى.
قول قويۋ ءراسىمى دوستىق ۇيىندە ءوتتى. ءىس-شاراعا مەملەكەتتىك ورگانداردىڭ، ءبىلىم بەرۋ جانە مادەنيەت ۇيىمدارىنىڭ، كىتاپحانا سالاسىنىڭ، قوعامدىق بىرلەستىكتەردىڭ، عىلىمي قاۋىمداستىقتىڭ جانە بۇقارالىق اقپارات قۇرالدارىنىڭ وكىلدەرى قاتىستى.
اقمولا وبلىسى اكىمىنىڭ ورىنباسارى دوسۇلان ايتباەۆ جوبانىڭ ءوڭىر ءۇشىن ماڭىزىنا توقتالىپ، ونىڭ وقىرمان قوعامىن قالىپتاستىرۋداعى ءرولىن ەرەكشە اتاپ ءوتتى.
«كىتاپ وقۋ مادەنيەتىن دامىتۋ – ءوڭىرىمىزدىڭ بولاشاعىنا سالىنعان ماڭىزدى ينۆەستيتسيا. بۇگىن ءبىز مەملەكەت، ءبىلىم بەرۋ جۇيەسى، كىتاپحانالار مەن قوعامدىق ۇيىمداردىڭ كۇش-جىگەرىن بىرىكتىرىپ، كىتاپتى بالالاردىڭ، جاستاردىڭ جانە جالپى اقمولا وبلىسى تۇرعىندارىنىڭ ءومىرىنىڭ اجىراماس بولىگىنە اينالدىرۋدى ماقسات ەتىپ وتىرمىز»، – دەدى دوسۇلان ايتباەۆ.
«كىتاپ وقيتىن ۇلت – چيتايۋششايا ناتسيا» قوعامدىق قورىنىڭ اتقارۋشى ديرەكتورى ايان ساقوشەۆ جوبانىڭ تۇجىرىمداماسىن تانىستىرىپ، ونى جۇزەگە اسىرۋ تەتىكتەرىنە توقتالدى.
ء«بىزدىڭ ماقساتىمىز – كىتاپ وقۋدى ناسيحاتتاۋمەن عانا شەكتەلمەي، ادامداردى كىتاپ وقۋعا، ونى تالقىلاۋعا ىنتالاندىراتىن جانە وقىرماندىق مادەنيەتتى قالىپتاستىراتىن تۇراقتى جۇيە قۇرۋ. اقمولا وبلىسى بۇل جوبانىڭ بەلسەندى قاتىسۋشىلارىنىڭ بىرىنە اينالادى دەپ سەنەمىن»، – دەدى ايان ساقوشەۆ.
كەزدەسۋ بارىسىندا عىلىمي جانە ساراپشىلىق قاۋىمداستىق وكىلدەرىنىڭ قاتىسۋىمەن جوبانى ىسكە اسىرۋدىڭ وزەكتى باعىتتارى تالقىلاندى.
ۇيىمداستىرۋشىلاردىڭ مالىمەتىنشە، وبلىستا «وقيتىن مەكتەپ» جوباسى اياسىندا 90 مىڭنان استام وقۋشىنىڭ، 6 مىڭعا جۋىق پەداگوگتىڭ جانە 3 مىڭنان استام اتا-انانىڭ قاتىسۋىمەن 50-دەن استام ءىس-شارا وتكىزىلگەن. ءوڭىر مەكتەپتەرىندە 480-گە جۋىق كوۆوركينگ-كەڭىستىك اشىلىپ، كىتاپحانا قورلارى 330 مىڭنان استام كوركەم ادەبيەت داناسىمەن تولىقتىرىلدى. سونىمەن قاتار 100 مەكتەپ پەن 20 كوللەدجدە اۆتوماتتاندىرىلعان كىتاپحانالىق اقپاراتتىق جۇيە ەنگىزىلدى.
مەموراندۋم اياسىندا تاراپتار كىتاپ وقۋ مادەنيەتىن دامىتۋعا، كىتاپحانا ينفراقۇرىلىمىن جەتىلدىرۋگە، جوبانى ادىستەمەلىك سۇيەمەلدەۋگە، اعارتۋشىلىق ءىس-شارالار وتكىزۋگە جانە اقپاراتتىق قولداۋ كورسەتۋگە باعىتتالعان بىرلەسكەن جۇمىستاردى جۇزەگە اسىرادى. سونداي-اق وڭىردە جوبانى ۇيلەستىرەتىن ارنايى جوبالىق كەڭسە قۇرىلاتىن بولادى.
قۇجاتقا اقمولا وبلىسى اكىمىنىڭ ورىنباسارى دوسۇلان ايتباەۆ پەن «كىتاپ وقيتىن ۇلت – چيتايۋششايا ناتسيا» قوعامدىق قورىنىڭ اتقارۋشى ديرەكتورى ايان ساقوشەۆ قول قويدى.
