Bıyl Ulytaý oblysynda jańa oqý jylyn 40663 bala qarsy alyp otyr. Onyń ishinde 4 440 oqýshy 1-synypqa qadam basty.
Bıylǵy oqý jylynda oblystaǵy 1-synyp oqýshylarynyń 81 paıyzy qazaq tilinde bilim alýdy tańdaǵan. Bilim kúninde óńirdiń barlyq mektepterinde "Mektebim — meıirim mekeni" taqyrybynda synyp saǵattary ótti.
Óńir oqýshylaryn bilim kúnimen alǵashqylardyń biri bolyp oblys basshysy Berik Ábdiǵalıuly quttyqtady.
“Bul kún sizderdiń jańa beleske qol sozyp, bıik shyńdardy baǵyndyra túsýlerińizge, taǵy da myńdaǵan múmkindikke jol ashady. Bilim nárin boıyna molynan sińirip, talaptanýdan sharshamaǵan jastar ǵana bolashaqtyń irgesin berik ustaıdy. Sol sebepti de qajyr-qaırattaryńyzdy aıamaı, bar kúsh-jigerlerińizdi keleshekke nyq qaraýǵa sarp etińizder!” — dedi ol óz quttyqtaýynda.
Oblys ortalyǵy Jezqazǵan qalasynyń ákimi Qaırat Shaıjanov № 3 JBBM-ge baryp, saltanatty jıynǵa qatysty. Inklıýzıvti bilim berýde kóshbasshy mektep sanalatyn atalǵan bilim ordasynyń oqýshylary men ustazdaryna jańa oqý jylynda sáttilik tilegen qala ákimi mekteptiń jóndeý jumystarymen de tanysty.
1 qyrkúıek — bilim ordasyna ımene qadam basqan 1-synyp oqýshylary úshin aıryqsha tolqynys pen esten ketpes estelikke toly kún. Búgin osyndaı erekshe sezimdi bastan ótkergen oqýshynyń biri — Sátbaev qalasyndaǵy № 25 mekteptiń 1-synyp oqýshysy Aısultan Alımov.
“Meni mektepke anam alyp keldi. Alǵashqy ustazymmen, synyptastarymmen tanystym. Men sabaqty jaqsy oqyp, úlgili oqýshy bolýǵa tyrysamyn”, — deıdi Aısultan.
Oblys boıynsha mektepterde 4500 pedagog qyzmet etedi. Bıylǵy oqý jylynda mektepterge kolledj ben ýnıversıtetti bitirgen 77 jas pedagog jumysqa qabyldanǵan. Olardyń qatarynda jergilikti Ó. Baıqońyrov atyndaǵy Jezqazǵan ýnıversıtetin jáne Arqalyq pedagogıkalyq ýnıversıtetin, Eýrazııa Ulttyq ýnıversıtetin, Qyzdar ulttyq pedagogıkalyq ýnıversıtetin támamdaǵan jas mamandar bar.
Jańa oqý jylynda jaqsy jańalyq kóp. Bıyldan bastap Jezqazǵan tehnologııa jáne servıs kolledji men Sátbaev ındýstrıaldyq kolledjinde pılottyq rejımde óqý-óndiristik kombınatynyń úlgisinde 10-synyptardyń 60 oqýshysyna jumysshy biliktilikteri, ıaǵnı tamaqtandyrýdy uıymdastyrý, avtoslesar, tigin isi, dánekerleý isi boıynsha kásiptik bilim beriletin bolady. Bul oqýshylarǵa mektep bitirgende jalpy orta bilim týraly attestatqa qosa jumysshy mamandyqtyń dıplomy birge beriledi.
Sondaı-aq, Jezqazǵan qalasyndaǵy túzetý mekemesi janynan № 1 kolledj ashyldy. Atalǵan kolledjde 75 jazasyn óteýshi jumysshy biliktiligin alatyn bolady. Mundaı sheshim jazasyn ótep otyrǵan azamattardyń bostandyqqa shyqqqanda áleýmettenýine, jumysqa ornalasýyna múmkindik týdyrady.
Sonymen qatar, óńirdi damytýdyń keshendi jospary sheńberinde qarastyrylǵan salalarǵa qajetti maman daıarlaý úshin Jezqazǵan gýmanıtarlyq kolledjinde "Shetel tili", Qarsaqpaı agroehnıkalyq kolledjinde "Veterınarııa", "Ekologııa jáne qorshaǵan orta" mamandyqtary ashyldy.
