شەتەلدە تۇراتىن ەتنيكالىق قازاقتار قازاقستاننىڭ جوعارى وقۋ ورىندارىنا ءتۇسۋ ءۇشىن ۇلتتىق بىرىڭعاي تەستىلەۋگە (ۇبت) قاتىسا الادى، دەپ حابارلايدى “ادىرنا”.
ولار تەستىلەۋدى جىلىنا ءتورت رەت قاڭتار، ناۋرىز، نەگىزگى جانە تامىز ايلارىندا تاپسىرۋعا قۇقىلى.
ۇلتتىق تەستىلەۋ ورتالىعىنىڭ مالىمەتىنشە، شەتەل ازاماتتارى ۇبت-عا app.testcenter.kz سايتى ارقىلى تىركەلە الادى. تەستىلەۋ اقىسى – 5 640 تەڭگە.
اقىلى بولىمگە وقۋعا ءتۇسۋدى جوسپارلاعان تالاپكەرلەر ءۇشىن ۇبت تاپسىرۋ مىندەتتى ەمەس. ولار جوعارى وقۋ ورنىنا اڭگىمەلەسۋ ناتيجەسى بويىنشا قابىلدانا الادى. ال مەملەكەتتىك ءبىلىم گرانتى كونكۋرسىنا قاتىسۋ ءۇشىن نەگىزگى ۇبت-دان ءوتۋ قاجەت. گرانت كونكۋرسىنا وتىنىشتەر ءساۋىر ايىندا قابىلدانادى.
قازاقستان ازاماتىنىڭ جەكە سايكەستەندىرۋ ءنومىرى (جسن) بار تالاپكەرلەر تىركەلۋ كەزىندە ءتيىستى بولىمگە ءوز ءنومىرىن ەنگىزۋى كەرەك. ال 18 جاسقا تولماعاندار اتا-اناسىنىڭ نەمەسە زاڭدى وكىلىنىڭ دەرەكتەرىن كورسەتۋى ءتيىس.
جسن-ى جوق شەتەل ازاماتتارى «قر جسن جوق» ءبولىمىن تاڭداپ، جەكە مالىمەتتەرىن تولتىرادى. تىركەۋ اياقتالعان سوڭ ولارعا 12 تاڭبالى كود بەرىلەدى.
ۇبت پاندەرىنىڭ سانى تالاپكەر تاڭداعان ماماندىق پەن وقۋ مەرزىمىنە بايلانىستى.
