كۇدىكتى جەڭگەتاي گرۋزيادان قازاقستانعا جەتكىزىلدى

قازاقستاندا ترانسۇلتتىق ۇيىمداسقان قىلمىستىق توپ قۇرامىندا جەڭگەتايلىقپەن اينالىسقان وزبەكستان ازاماتى گرۋزيادان ەكستراديتسيالاندى. بۇل تۋرالى باس پروكۋراتۋرانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسءى.

باس پروكۋراتۋرا مەن ىشكى ىستەر مينيسترلىگىنىڭ ينتەرپول قىزمەتكەرلەرى قازاقستاننىڭ گرۋزياداعى ەلشىلىگىنىڭ قولداۋىمەن كۇدىكتىنى ەلگە قايتارعان.

تەرگەۋ مالىمەتىنشە، كۇدىكتى ۇيىمداسقان قىلمىستىق توپتىڭ وزگە مۇشەلەرىمەن بىرگە جەزوكشەلىكپەن اينالىساتىن جانە سەكسۋالدىق سيپاتتاعى قىزمەتتەر كورسەتەتىن ادامداردىڭ «Kyzdar.net» ينتەرنەت-رەسۋرسىنداعى ساۋالنامالارىن اقىلى تۇردە تولىقتىرۋعا وتىنىمدەر قابىلداعان. وسى ارقىلى ولاردىڭ قىزمەتتەرىن جارنامالاپ، ىلگەرىلەتۋمەن اينالىسقان.

سونىمەن قاتار توپ مۇشەلەرى تۇسكەن قاراجاتتان كوميسسيالىق سىياقىنى ۇستاپ قالىپ، قالعان اقشانى سايت اكىمشىلەرىنە اۋدارىپ وتىرعان. وسىلايشا، زاڭسىز سحەمانىڭ تۇراقتى جۇمىس ىستەۋىن قامتاماسىز ەتكەن.

قازىرگى ۋاقىتتا ۇيىمداسقان قىلمىستىق توپتىڭ بىرنەشە مۇشەسى ءارتۇرلى مەرزىمگە باس بوستاندىعىنان ايىرىلعان. ال كۇدىكتى مەن توپتىڭ وزگە دە كەيبىر مۇشەلەرى تەرگەۋدەن جاسىرىنىپ، حالىقارالىق ىزدەۋگە جاريالانعان.

بيىل شىلدە ايىندا كۇدىكتى گرۋزيا اۋماعىندا ۇستالىپ، باس پروكۋراتۋرانىڭ سۇراۋى بويىنشا قازاقستانعا بەرىلدى. قازىر ول تەرگەۋ يزولياتورىنا قامالدى.

اتالعان قىلمىستاردى جاساعانى ءۇشىن كۇدىكتىگە مۇلكىن تاركىلەۋمەن بىرگە 10 جىلعا دەيىن باس بوستاندىعىنان ايىرۋ جازاسى كوزدەلگەن.

Kyzdar.net سايتى 2011 جىلدان بەرى جۇمىس ىستەپ كەلگەن. 2023 جىلدىڭ ناۋرىزىندا قۇقىق قورعاۋ ورگاندارى سايتتىڭ 11 توپ-مەنەدجەرىن ۇستاعان. الايدا 2024 جىلدىڭ قىركۇيەگىندە ىشكى ىستەر مينيسترلىگى قىلمىستىق ءىستى توقتاتتى. سول كەزدە مينيسترلىك سايتتى بۇعاتتاۋ مۇمكىن ەمەس ەكەنىن، سەبەبى ونىڭ امەريكالىق ينتەرنەت-پروۆايدەرلەرگە تيەسىلى حوستينگتەردە ورنالاسقانىن مالىمدەگەن.

بيىل 15 ماۋسىمدا الماتىدا Kyzdar.net سايتىنىڭ بولجامدى ۇيىمداستىرۋشىلارى ۇستالدى. تەرگەۋ مالىمەتىنشە، كۇدىكتىلەردىڭ زاڭسىز تابىسى 2 ميلليارد تەڭگەگە باعالانعان.

سايتتىڭ بولجامدى يەلەرىنە تيەسىلى الماتى قالاسى مەن وبلىسىنان قىمبات مۇلىك انىقتالدى. اتاپ ايتقاندا، كۇدىكتىلەردىڭ اتىنا شاعىن جانە ورتا بيزنەس سالاسىندا جۇمىس ىستەيتىن سەگىز كومپانيا، بەس پاتەر، التى كوممەرتسيالىق نىسان، التى كوتتەدج، 10 جەر ۋچاسكەسى، التى اۆتوتۇراق ورنى جانە 11 ليۋكس ساناتىنداعى اۆتوكولىك تىركەلگەن.