Qazaqstanda transūlttyq ūiymdasqan qylmystyq top qūramynda jeŋgetailyqpen ainalysqan Özbekstan azamaty Gruziiadan ekstradisiialandy. Būl turaly Bas prokuraturanyŋ baspasöz qyzmetı aitty, dep habarlaidy «Adyrna» tılşısı.
Bas prokuratura men Işkı ıster ministrlıgınıŋ İnterpol qyzmetkerlerı Qazaqstannyŋ Gruziiadaǧy elşılıgınıŋ qoldauymen küdıktını elge qaitarǧan.
Tergeu mälımetınşe, küdıktı ūiymdasqan qylmystyq toptyŋ özge müşelerımen bırge jezökşelıkpen ainalysatyn jäne seksualdyq sipattaǧy qyzmetter körsetetın adamdardyŋ «Kyzdar.net» internet-resursyndaǧy saualnamalaryn aqyly türde tolyqtyruǧa ötınımder qabyldaǧan. Osy arqyly olardyŋ qyzmetterın jarnamalap, ılgerıletumen ainalysqan.
Sonymen qatar top müşelerı tüsken qarajattan komissiialyq syiaqyny ūstap qalyp, qalǧan aqşany sait äkımşılerıne audaryp otyrǧan. Osylaişa, zaŋsyz shemanyŋ tūraqty jūmys ısteuın qamtamasyz etken.
Qazırgı uaqytta ūiymdasqan qylmystyq toptyŋ bırneşe müşesı ärtürlı merzımge bas bostandyǧynan aiyrylǧan. Al küdıktı men toptyŋ özge de keibır müşelerı tergeuden jasyrynyp, halyqaralyq ızdeuge jariialanǧan.
Biyl şılde aiynda küdıktı Gruziia aumaǧynda ūstalyp, Bas prokuraturanyŋ sūrauy boiynşa Qazaqstanǧa berıldı. Qazır ol tergeu izoliatoryna qamaldy.
Atalǧan qylmystardy jasaǧany üşın küdıktıge mülkın tärkıleumen bırge 10 jylǧa deiın bas bostandyǧynan aiyru jazasy közdelgen.
Kyzdar.net saity 2011 jyldan berı jūmys ıstep kelgen. 2023 jyldyŋ nauryzynda qūqyq qorǧau organdary saittyŋ 11 top-menedjerın ūstaǧan. Alaida 2024 jyldyŋ qyrküiegınde Işkı ıster ministrlıgı qylmystyq ıstı toqtatty. Sol kezde ministrlık saitty būǧattau mümkın emes ekenın, sebebı onyŋ amerikalyq internet-provaiderlerge tiesılı hostingterde ornalasqanyn mälımdegen.
Biyl 15 mausymda Almatyda Kyzdar.net saitynyŋ boljamdy ūiymdastyruşylary ūstaldy. Tergeu mälımetınşe, küdıktılerdıŋ zaŋsyz tabysy 2 milliard teŋgege baǧalanǧan.
Saittyŋ boljamdy ielerıne tiesılı Almaty qalasy men oblysynan qymbat mülık anyqtaldy. Atap aitqanda, küdıktılerdıŋ atyna şaǧyn jäne orta biznes salasynda jūmys ısteitın segız kompaniia, bes päter, alty kommersiialyq nysan, alty kottedj, 10 jer uchaskesı, alty avtotūraq orny jäne 11 liuks sanatyndaǧy avtokölık tırkelgen.
