«سامۇرىق-قازىنانىڭ» جاڭا توراعاسى تاعايىندالادى – بەكتەنوۆ

179
Adyrna.kz Telegram
https://www.adyrna.kz/storage/uploads/IagYJe5ov92Tfrs4jEsjtn83ezeMnEILY89J31mE.jpg

پرەمەر-مينيستر ولجاس بەكتەنوۆ «سامۇرىق-قازىنا» اق باسشىلىعىنا قاتىستى سوڭعى وقيعالارعا بايلانىستى مالىمدەمە جاساپ، قوردىڭ الداعى جۇمىسىنا قاتىستى بىرقاتار ماسەلەنى ءتۇسىندىردى، دەپ حابارلايدى «ادىرنا» ءتىلشىسى.

ايتۋىنشا، قازىرگى ۋاقىتتا قۇقىق قورعاۋ ورگاندارى جەكەلەگەن لاۋازىمدى تۇلعالارعا قاتىستى تەرگەۋ امالدارىن جۇرگىزىپ جاتىر. ءىستىڭ بارلىق ءمان-جايى تەرگەۋ اياسىندا انىقتالۋدا.

«جاعداي مەملەكەت باسشىسىنىڭ باقىلاۋىندا. قۇزىرەتتى ورگاندار زاڭناما تالاپتارىن قاتاڭ ساقتاي وتىرىپ، وبەكتيۆتى ءارى جان-جاقتى تەرگەۋ جۇرگىزۋگە ءتيىس. قازىرگى كەزەڭدە ءسوز ناقتى ءبىر جاعداي تۋرالى بولىپ وتىر. بۇل جاعداي قوردىڭ بۇكىل كومپانيالار توبىنىڭ قىزمەتىنە كۇمان كەلتىرۋگە نەگىز بولا المايدى»، – دەدى پرەمەر-مينيستر.

ولجاس بەكتەنوۆ جاقىندا جاڭا توراعا تاعايىندالاتىنىن مالىمدەدى.

«جاقىن ارادا «سامۇرىق-قازىنا» اق باسقارماسىنىڭ جاڭا توراعاسى تاعايىندالادى. بۇل رەتتە باسقارۋ ىسىندەگى ساباقتاستىق پەن قور قىزمەتىنىڭ ۇزدىكسىزدىگى تولىق قامتاماسىز ەتىلەدى. قور توبىنا كىرەتىن بارلىق كومپانيالار شتاتتىق رەجيمدە جۇمىسىن جالعاستىرۋدا. قوردىڭ دامۋ ستراتەگياسى وزگەرىسسىز قالادى. ينۆەستيتسيالىق جانە ينفراقۇرىلىمدىق جوبالاردى ىسكە اسىرۋ بەكىتىلگەن جوسپارلارعا سايكەس جالعاسادى»،– دەپ ءتۇسىندىردى ول.

بەكتەنوۆ ىشكى باقىلاۋ، كومپلاەنس جانە ىشكى اۋديت تەتىكتەرى قايتا قارالىپ، كۇشەيتىلەتىنىن جەتكىزدى. ونىڭ سوزىنشە، سىبايلاس جەمقورلىق قۇقىق بۇزۋشىلىقتارىنىڭ الدىن الۋ، مۇددەلەر قاقتىعىسىن انىقتاۋ، قابىلداناتىن شەشىمدەردىڭ اشىقتىعىن ارتتىرۋ جانە باسشىلاردىڭ دەربەس جاۋاپكەرشىلىگىن كۇشەيتۋگە ەرەكشە نازار اۋدارىلادى.

ء«بىزدىڭ مىندەتىمىز تەك ناقتى قۇقىق بۇزۋشىلىقتارعا دەن قويۋمەن شەكتەلمەيدى. ەڭ باستىسى، مۇنداي جاعدايلاردىڭ قايتالانۋىنا جول بەرمەيتىن ءتيىمدى جۇيە قالىپتاستىرۋ»، – دەپ اتاپ ءوتتى پرەمەر-مينيستر.

پىكىرلەر