پرەمەر-مينيستر ولجاس بەكتەنوۆ قازاقستانعا جۇمىس ساپارىمەن كەلگەن رەسەي ۇكىمەتىنىڭ توراعاسى ميحايل ميشۋستين ەكىجاقتى كەلىسسوزدەر جۇرگىزدى. بۇل تۋرالى بۇگىن، 25 ناۋرىزدا ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
تاراپتار ساۋدا-ەكونوميكالىق، ينۆەستيتسيالىق ىنتىماقتاستىق، ونەركاسىپ، ەنەرگەتيكا جانە كولىك سالاسىنداعى جوبالاردى جۇزەگە اسىرۋ، سونداي-اق ەكولوگيا سالاسىنداعى ءوزارا ءىس-قيمىل ماسەلەلەرىن قارادى.
«مەملەكەت باسشىسى قاسىم-جومارت كەمەلۇلى توقاەۆ پەن ۆلاديمير ۆلاديميروۆيچ ءپۋتيننىڭ بىرلەسكەن كۇش-جىگەرىنىڭ ارقاسىندا قازاق-رەسەي قاتىناستارى ءوزارا ءىس-قيمىلدىڭ ساپالى جاڭا دەڭگەيىنە كوتەرىلدى. سوڭعى جىلدارى ءوزارا ساۋدا كولەمى $30 ملردتىق مەجەگە ەداۋىر جاقىندادى»،- دەپ اتاپ ءوتتى ولجاس بەكتەنوۆ.
رەسەي قازاقستان ەكونوميكاسىنا سالىنعان ينۆەستيتسيالار كولەمى بويىنشا كوشباسشى ەلدەر قاتارىندا. ماسەلەن، وتكەن جىلدىڭ 9 ايىندا كورشىمىزدەن $2,1 ملرد ينۆەستيتسيا تارتىلدى. ال 20 جىل ىشىندە رەسەيلىك تىكەلەي ينۆەستيتسيالار كولەمى $28,5 ملرد-قا جەتتى. قازاقستان رف ەكونوميكاسىنا $9 ملرد ينۆەستيتسيا سالدى.
ء«سىزدى جانە قازاقستاندىقتاردى تاريحي وقيعامەن، جاڭا كونستيتۋتسيالارىڭىزدىڭ قابىلدانۋىمەن شىن جۇرەكتەن قۇتتىقتايمىن. رەفەرەندۋم ناتيجەسى قازاقستان حالقىنىڭ ەل پرەزيدەنتى قاسىم-جومارت كەمەلۇلى توقاەۆتىڭ زاماناۋي ءارى وركەندەگەن مەملەكەت قۇرۋ، رەسپۋبليكا ازاماتتارىنىڭ ءال-اۋقاتىن ارتتىرۋ باعىتىن قولدايتىنىن ناقتىلاي ءتۇستى»،- دەپ اتاپ ءوتتى ميحايل ميشۋستين.
كەلىسسوزدەر بارىسىندا كاسپي تەڭىزىنىڭ ەكوجۇيەسىن ساقتاۋ جانە تابيعاتتى قورعاۋ باستامالارىن جۇزەگە اسىرۋ جونىندەگى بىرلەسكەن ءىس-قيمىلدارعا دا نازار اۋدارىلدى. قازاقستان كاسپي تەڭىزى دەڭگەيىنىڭ ودان ءارى تومەندەۋىن بولدىرماۋعا جانە ەكولوگيالىق جاعدايدى تۇراقتاندىرۋعا باعىتتالعان بارلىق كاسپي ماڭى مەملەكەتتەرىنىڭ جۇيەلى جانە كەلىسىلگەن ءوزارا ءىس-قيمىلىن قولدايدى. مەملەكەت باسشىسى قاسىم-جومارت توقاەۆتىڭ باستاماسىمەن كاسپيدىڭ سۋ رەسۋرستارىن ساقتاۋ جونىندەگى مەملەكەتارالىق باعدارلامانىڭ جوباسى ازىرلەنۋدە.
كەزدەسۋ قورىتىندىسى بويىنشا تاراپتار ساۋدا-ەكونوميكالىق ىنتىماقتاستىقتى ودان ءارى دامىتۋ نيەتىن راستادى.
