Premer-ministr Oljas Bektenov «Samūryq-Qazyna» AQ basşylyǧyna qatysty soŋǧy oqiǧalarǧa bailanysty mälımdeme jasap, qordyŋ aldaǧy jūmysyna qatysty bırqatar mäselenı tüsındırdı, dep habarlaidy «Adyrna» tılşısı.
Aituynşa, qazırgı uaqytta qūqyq qorǧau organdary jekelegen lauazymdy tūlǧalarǧa qatysty tergeu amaldaryn jürgızıp jatyr. Istıŋ barlyq män-jaiy tergeu aiasynda anyqtaluda.
«Jaǧdai memleket basşysynyŋ baqylauynda. Qūzyrettı organdar zaŋnama talaptaryn qataŋ saqtai otyryp, obektivtı ärı jan-jaqty tergeu jürgızuge tiıs. Qazırgı kezeŋde söz naqty bır jaǧdai turaly bolyp otyr. Būl jaǧdai Qordyŋ bükıl kompaniialar tobynyŋ qyzmetıne kümän keltıruge negız bola almaidy», – dedı premer-ministr.
Oljas Bektenov jaqynda jaŋa töraǧa taǧaiyndalatynyn mälımdedı.
«Jaqyn arada «Samūryq-Qazyna» AQ Basqarmasynyŋ jaŋa töraǧasy taǧaiyndalady. Būl rette basqaru ısındegı sabaqtastyq pen Qor qyzmetınıŋ üzdıksızdıgı tolyq qamtamasyz etıledı. Qor tobyna kıretın barlyq kompaniialar ştattyq rejimde jūmysyn jalǧastyruda. Qordyŋ damu strategiiasy özgerıssız qalady. İnvestisiialyq jäne infraqūrylymdyq jobalardy ıske asyru bekıtılgen josparlarǧa säikes jalǧasady»,– dep tüsındırdı ol.
Bektenov ışkı baqylau, komplaens jäne ışkı audit tetıkterı qaita qaralyp, küşeitıletının jetkızdı. Onyŋ sözınşe, sybailas jemqorlyq qūqyq būzuşylyqtarynyŋ aldyn alu, müddeler qaqtyǧysyn anyqtau, qabyldanatyn şeşımderdıŋ aşyqtyǧyn arttyru jäne basşylardyŋ derbes jauapkerşılıgın küşeituge erekşe nazar audarylady.
«Bızdıŋ mındetımız tek naqty qūqyq būzuşylyqtarǧa den qoiumen şektelmeidı. Eŋ bastysy, mūndai jaǧdailardyŋ qaitalanuyna jol bermeitın tiımdı jüie qalyptastyru», – dep atap öttı premer-ministr.
