سىر ەلى قۇرىلىس سالاسى قارقىندى دامىعان ءوڭىر. سوڭعى جىلدارى قىزىلوردا قالاسىنىڭ وزىندە 12 شاعىن اۋدان بوي كوتەرىپ، 270 كوپقاباتتى تۇرعىن ءۇي سالىنعان. 7000-عا جۋىق ازامات جاڭا پاتەرگە يە بولىپ، قونىس تويىن تويلاعان. ال، بۇگىن قۇرىلىسشىلار كۇنىن قارساڭىندا قىزىلوردالىقتار ءۇشىن تاعى 3 نىساننىڭ ىرگەتاسى قالاندى. سونداي-اق، قارماقشى اۋدانىنداعى تورەتام كەنتى جانە اقاي اۋىلىندا، ارال اۋدانىنداعى سەكسەۋىل كەنتىندە اۋىل ىشىلىك گاز قۇبىرىن تارتۋ جانە شيەلى اۋدانىنا قاراستى تارتوعاي ەلدىمەكەنىندە اۆتوماتتاندىرىلعان گاز تاراتۋ ستانساسىنىڭ قۇرىلىسى باستالدى.
ەندى سىر وڭىرىندە وتباسىلىق ومىرگە قادام جاساعان جاستار زاماناۋي ۇلگىدەگى نەكە سارايىندا وتباسى اتانادى.
وبلىس اكىمى نۇرلىبەك نالىباەۆ جاس جۇبايلاردىڭ كيەلى شاڭىراعىنا اينالاتىن «نەكە سارايىنىڭ» حالىقارالىق جاستار كۇنى اياسىندا بوي كوتەرۋىنىڭ سيمۆوليكالىق ءمانى بار دەدى.
- ءبىر قۋانتارلىعى، ايماعىمىزدا دەموگرافيالىق ءوسىم جىلدان-جىلعا جاقسارىپ، شاڭىراق كوتەرگەن جاستاردىڭ قاتارى ارتىپ كەلەدى. بيىلعى جىلدىڭ 6 ايىندا 2276 جۇپ نەكەگە تۇرىپ، وتباسىلىق ومىرگە قادام باستى.
پرەزيدەنتىمىز قاسىم-جومارت كەمەلۇلى توقاەۆ: "باقىتتى ءارى بەرىك شاڭىراق - ەلىمىزدىڭ يگىلىگى مەن وركەندەۋىنىڭ كەپىلى. مىقتى وتباسى - مىقتى مەملەكەت" دەپ وتباسى قۇندىلىعىنىڭ ماڭىزدى ەكەنىن جەتكىزدى.
كەلەشەكتە نەكە سارايىندا وتباسى قۇندىلىقتارىن دارىپتەيتىن الەۋمەتتىك-مادەني ءىس-شارالار دا تۇراقتى تۇردە وتكىزىلەتىن بولادى، - دەدى نۇرلىبەك نالىباەۆ.
سونداي-اق، بۇگىن ونەرلى ولكەدە 1000 كەلۋشىگە ارنالعان جاڭا ونەر سارايىنىڭ العاشقى كىرپىشى قالاندى. قۇنى 3,7 ملرد.تەڭگەنى قۇرايتىن ەكى قاباتتى ونەر سارايىنىڭ قۇرىلىسى ءبىر جارىم جىلدا سالىنىپ بىتەدى. عيماراتتا سيمفونيالىق، ەسترادالىق جانە ۇلتتىق ونەر باعىتىنداعى كونتسەرتتىك باعدارلامالار مەن ءتۇرلى فورماتتاعى قوعامدىق ءىس-شارالار وتكىزىلەدى.
سىردىڭ سول جاعالاۋىندا تاعى ءبىر الەۋمەتتىك نىساننىڭ ىرگەتاسى قالاندى. قۇنى 2,7 ملرد. تەڭگەنى قۇرايتىن «قان ورتالىعى» جىلىنا قان مەن ونىڭ كومپونەنتتەرىن دوناتسيالاۋ كورسەتكىشىن 500-دەن 10 مىڭعا دەيىنگى جەتكىزەدى. ورتالىق ءوڭىر حالقىنا ساپالى قىزمەت كورسەتىپ، تۇرعىنداردىڭ دەنساۋلىعىن ارتتىرۋعا مۇمكىندىك بەرمەك.
سونداي-اق، سول جاعالاۋدا قاسبەتتەرى زاماناۋي تالاپتارعا ساي كەلەتىن 7-9 قاباتتى تۇرعىن ءۇي، فيزيكا-ماتەماتيكالىق مەكتەپ عيماراتى بوي كوتەرمەك. ال، بالالار جىلىنا تارتۋ رەتىندە وقۋشىلار سارايى سالىنادى.
ايماق باسشىسى نۇرلىبەك نالىباەۆ از ۋاقىتتىڭ ىشىندە وڭىرگە قوماقتى ينۆەستيتسيا تارتىلىپ، دەمەۋشىلەر ەسەبىنەن جاڭا جوبالاردى باستاۋعا مۇمكىندىك بولعانىن جەتكىزدى.
- ءبىز ءاردايىم جەرلەستەرىمىزدىڭ تالاپ-تىلەكتەرىن، ۇسىنىستارىن ەسكەرۋگە دايىنبىز. وبلىس اكىمى قىزمەتىنە تاعايىندالعاننان باستاپ، حالىقپەن كەزدەسكەن ءار ساتتە ايماقتا زاماناۋي ساۋلەتتىك ۇلگىدەگى جاڭا نىسانداردى سالۋعا ۋادە ەتتىك.
تۋعان جەردىڭ دامۋىنا شىنايى جاناشىرلىقپەن قارايتىن مەتسەنات ازاماتتاردى ورتاق ىسكە بىرىكتىرىپ، قۇنى 45 ملرد. تەڭگەنى قۇرايتىن، 391 نىسانعا جوبا ازىرلەدىك. كەلەسى جىلدان باستاپ بۇل جوبالار ىسكە اسا باستايدى. از ۋاقىتتىڭ ىشىندە، وڭىرگە 20 ملرد.تەڭگە ينۆەستيتسيا تارتىلدى.
وسى يگىلىكتى ىستەردىڭ ناتيجەسىندە بۇگىن بىرنەشە نىساننىڭ ىرگەتاسىن قالاۋ راسىمىنە جەرلەستەرىمىز كۋا بولدى، - دەدى نۇرلىبەك نالىباەۆ.
ايماقتا بولات وتەمۇراتوۆ قورىمەن بىرگە 11 ملرد. تەڭگەنى قۇرايتىن زاماناۋي جولاۋشىلار تەرمينالىنىڭ قۇرىلىسىن باستالىپ، 2024 جىلى ەل يگىلىگىنە بەرىلمەك. سونداي-اق، قۋاتتىلىعى 240 مەگاۆاتقا جەتەتىن جاڭا جىلۋ ەلەكتر ستانتسياسىن سالىنباق.
بۇگىن وڭىردەگى شاعىن اۋدانداردىڭ ءبىرى - “بايتەرەكتە” جاڭا سۋ جيناعىش قۇرىلعى قۇرىلىسىن باستاۋ ءراسىمى دە ءوتتى.
قۇنى 1 ملرد.تەڭگەدەن استام جوبا «بايتەرەك» تۇرعىن اۋدانىندا ورنالاسقان جەكە تۇرعىن ۇيلەردى تۇراقتى قىسىمدا ساپالى اۋىز سۋمەن قامتۋعا مۇمكىندىك بەرەدى. جوبا اياسىندا 7 دانا ۇڭعىما بۇرعىلانىپ، 3 دانا رەزەرۆۋار سالىناتىن بولادى.
ايتا كەتەيىك، قىزىلوردادا قۇرىلىسشىلار كۇنى مەرەكەسى گالا-كونتسەرتپەن قورىتىندىلاندى. ءوز سالاسىنىڭ ناعىز شەبەرلەرىنە ارنايى توسبەلگىلەر مەن ماراپاتتار تابىستالدى.
