Syr elı qūrylys salasy qarqyndy damyǧan öŋır. Soŋǧy jyldary Qyzylorda qalasynyŋ özınde 12 şaǧyn audan boi köterıp, 270 köpqabatty tūrǧyn üi salynǧan. 7000-ǧa juyq azamat jaŋa päterge ie bolyp, qonys toiyn toilaǧan. Al, bügın qūrylysşylar künın qarsaŋynda qyzylordalyqtar üşın taǧy 3 nysannyŋ ırgetasy qalandy. Sondai-aq, Qarmaqşy audanyndaǧy Töretam kentı jäne Aqai auylynda, Aral audanyndaǧy Sekseuıl kentınde auyl ışılık gaz qūbyryn tartu jäne Şielı audanyna qarasty Tartoǧai eldımekenınde avtomattandyrylǧan gaz taratu stansasynyŋ qūrylysy bastaldy.
Endı Syr öŋırınde otbasylyq ömırge qadam jasaǧan jastar zamanaui ülgıdegı neke saraiynda otbasy atanady.
Oblys äkımı Nūrlybek Nälıbaev jas jūbailardyŋ kielı şaŋyraǧyna ainalatyn «Neke saraiynyŋ» Halyqaralyq jastar künı aiasynda boi köteruınıŋ simvolikalyq mänı bar dedı.
- Bır quantarlyǧy, aimaǧymyzda demografiialyq ösım jyldan-jylǧa jaqsaryp, şaŋyraq kötergen jastardyŋ qatary artyp keledı. Biylǧy jyldyŋ 6 aiynda 2276 jūp nekege tūryp, otbasylyq ömırge qadam basty. Prezidentımız Qasym-Jomart Kemelūly Toqaev: "Baqytty ärı berık şaŋyraq - elımızdıŋ igılıgı men örkendeuınıŋ kepılı. Myqty otbasy - myqty memleket" dep otbasy qūndylyǧynyŋ maŋyzdy ekenın jetkızdı. Keleşekte neke saraiynda otbasy qūndylyqtaryn därıpteitın äleumettık-mädeni ıs-şaralar da tūraqty türde ötkızıletın bolady, - dedı Nūrlybek Nälıbaev.Sondai-aq, bügın önerlı ölkede 1000 keluşıge arnalǧan jaŋa öner saraiynyŋ alǧaşqy kırpışı qalandy. Qūny 3,7 mlrd.teŋgenı qūraityn ekı qabatty öner saraiynyŋ qūrylysy bır jarym jylda salynyp bıtedı. Ǧimaratta simfoniialyq, estradalyq jäne ūlttyq öner baǧytyndaǧy konserttık baǧdarlamalar men türlı formattaǧy qoǧamdyq ıs-şaralar ötkızıledı. Syrdyŋ sol jaǧalauynda taǧy bır äleumettık nysannyŋ ırgetasy qalandy. Qūny 2,7 mlrd. teŋgenı qūraityn «Qan ortalyǧy» jylyna qan men onyŋ komponentterın donasiialau körsetkışın 500-den 10 myŋǧa deiıngı jetkızedı. Ortalyq öŋır halqyna sapaly qyzmet körsetıp, tūrǧyndardyŋ densaulyǧyn arttyruǧa mümkındık bermek. Sondai-aq, sol jaǧalauda qasbetterı zamanaui talaptarǧa sai keletın 7-9 qabatty tūrǧyn üi, fizika-matematikalyq mektep ǧimaraty boi kötermek. Al, balalar jylyna tartu retınde Oquşylar saraiy salynady. Aimaq basşysy Nūrlybek Nälıbaev az uaqyttyŋ ışınde öŋırge qomaqty investisiia tartylyp, demeuşıler esebınen jaŋa jobalardy bastauǧa mümkındık bolǧanyn jetkızdı.
- Bız ärdaiym jerlesterımızdıŋ talap-tılekterın, ūsynystaryn eskeruge daiynbyz. Oblys äkımı qyzmetıne taǧaiyndalǧannan bastap, halyqpen kezdesken är sätte aimaqta zamanaui säulettık ülgıdegı jaŋa nysandardy saluǧa uäde ettık. Tuǧan jerdıŋ damuyna şynaiy janaşyrlyqpen qaraityn mesenat azamattardy ortaq ıske bırıktırıp, qūny 45 mlrd. teŋgenı qūraityn, 391 nysanǧa joba äzırledık. Kelesı jyldan bastap būl jobalar ıske asa bastaidy. Az uaqyttyŋ ışınde, öŋırge 20 mlrd.teŋge investisiia tartyldy. Osy igılıktı ısterdıŋ nätijesınde bügın bırneşe nysannyŋ ırgetasyn qalau räsımıne jerlesterımız kuä boldy, - dedı Nūrlybek Nälıbaev.Aimaqta Bolat Ötemūratov qorymen bırge 11 mlrd. teŋgenı qūraityn zamanaui jolauşylar terminalynyŋ qūrylysyn bastalyp, 2024 jyly el igılıgıne berılmek. Sondai-aq, quattylyǧy 240 megavatqa jetetın jaŋa jylu elektr stansiiasyn salynbaq. Bügın öŋırdegı şaǧyn audandardyŋ bırı - “Bäiterekte” jaŋa su jinaǧyş qūrylǧy qūrylysyn bastau räsımı de öttı. Qūny 1 mlrd.teŋgeden astam joba «Bäiterek» tūrǧyn audanynda ornalasqan jeke tūrǧyn üilerdı tūraqty qysymda sapaly auyz sumen qamtuǧa mümkındık beredı. Joba aiasynda 7 dana ūŋǧyma būrǧylanyp, 3 dana rezervuar salynatyn bolady. Aita keteiık, Qyzylordada qūrylysşylar künı merekesı gala-konsertpen qorytyndylandy. Öz salasynyŋ naǧyz şeberlerıne arnaiy tösbelgıler men marapattar tabystaldy.
