ۇلى وتان سوعىسى جىلدارىندا مايدان دالاسىندا قازا تاپقان قازاقستاندىق جاۋىنگەر قالەي دۇزباەۆتىڭ سۇيەگى ماسكەۋدەن نۇر-سۇلتان قالاسىنا جەتكىزىلدى. بۇل تۋرالى “ادىرنا” ۇلتتىق پورتالى قورعانىس مينيسترلىگىنە سىلتەمە جاساپ حابارلايدى.
ىزدەۋشىلەر جاساعى لەنينگراد تۇبىندەگى شايقاستا ەرلىكپەن قازا تاپقان باتىس قازاقستان وبلىسىنىڭ تۋماسى قالەي دۇزباەۆتىڭ سۇيەگىن وسى جازدا تاپقان بولاتىن.
نۇر-سۇلتان قالاسى اۋەجايىنىڭ اسكەري سەكتورىندا وتكەن قازاق ساربازىنىڭ سۇيەگىن كۇتىپ الۋ راسىمىنە قورعانىس مينيسترلىگىنىڭ باسشىلىعى، ورتالىق اسكەري وركەستر، قۇرمەت قاراۋىل روتاسى جانە قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ، اۋە قورعانىسى كۇشتەرىنىڭ، اسكەري-تەڭىز كۇشتەرىنىڭ اسكەري قىزمەتشىلەرى، «جاس سارباز» رەسپۋبليكالىق اسكەري-پاتريوتتىق قوزعالىسىنىڭ تاربيەلەنۋشىلەرى قاتىستى.
– قازاقستاندىقتاردىڭ مايدانداعى ەرلىگى ۇرپاقتىڭ جادىندا ماڭگى ساقتالادى. ولار بۇگىنگى وتان قورعاۋشىلار ءۇشىن مۇقالماس رۋحتىڭ، قاجىماس قايراتتىڭ، جانقيار ەرلىكتىڭ جانە وتانعا دەگەن سۇيىسپەنشىلىكتىڭ شىنايى ۇلگىسى، – دەدى قورعانىس ءمينيسترى گەنەرال-پولكوۆنيك رۋسلان جاقسىلىقوۆ. – ءبىزدىڭ بىرلەسىپ اتقارىپ جاتقان جۇمىستارىمىز باتىر بابالاردىڭ ەرلىگىن تاريحتا ساقتاۋعا، جاستارعا اسكەري-پاتريوتتىق تاربيە بەرۋگە ەداۋىر ۇلەس قوساتىنىنا سەنىمدىمىن.
" alt="" aria-hidden="true" />
1902 جىلى باتىس قازاقستان وبلىسىندا تۋعان جاۋىنگەردىڭ جەرلەنگەن جەرىن 9 شىلدەدە لەنينگراد وبلىسىنىڭ توسنەنسك اۋدانىنداعى «زاسلون» ىزدەۋ جاساعىنىڭ مۇشەلەرى تاپقان بولاتىن. مۇردەنىڭ كىمگە تيەسىلى ەكەنى سولدات مەدالونىندا ساقتالعان جازباسىنا قاراپ انىقتالدى.
«Atamnyn اmanaty» ىزدەستىرۋ جاساعىنىڭ باسقارما توراعاسى مۇرات مولداعاليەۆ اتاپ وتكەندەي، بۇل كۇندەرى كالۋجسك وبلىسىنداعى اسكەري-تاريحي ەكسپەديتسياعا قازاقستاندىق بىرىككەن جاساق قاتىسۋدا. ول، سونداي-اق، ەكى ەل ىزدەۋشىلەرىنىڭ بىرلەسكەن جۇمىسى جاڭا سەرپىن الاتىنىنا سەنىمدى.
ماۋسىم ايىندا قازاقستاندىق ءۇش جاۋىنگەر – تولەگەن ۇركەرباەۆتىڭ، پەتر ابراموۆيچ فومەنكونىڭ، نيكولاي ماتۆەەۆيچ گۋروۆتىڭ سۇيەكتەرىن ەلگە جەتكىزۋ مەن قايتا جەرلەۋ راسىمدەرى ۇيىمداستىرىلعان بولاتىن.
سوعىس جىلدارىندا حابار-وشارسىز كەتكەن قازاقستاندىق ساربازدار مەن وفيتسەرلەردىڭ تاعدىرىن انىقتاپ، ولاردىڭ ەسىمىن ماڭگى جادىمىزدا ساقتاۋ جۇمىستارى جالعاسىن تابا بەرمەك. ەلورداداعى «ەسكەرتكىش ايماعى» ىزدەستىرۋ جاساعى مەن ونىڭ جەتەكشىسى مايدان قۇسايىنوۆ وسىنداي يگى ىستەرگە ەلەۋلى ۇلەس قوسىپ كەلەدى. وسى ماقساتتا ىزدەستىرۋ قوزعالىسىنىڭ ارداگەرى قازاقستان قارۋلى كۇشتەرىنىڭ ۇلتتىق اسكەري-پاتريوتتىق ورتالىعىمەن تىعىز بايلانىس ورناتقان.
قالەي دۇزباەۆتىڭ سۇيەگىن قايتا جەرلەۋ ءراسىمى ونىڭ تۋعان جەرىندە اسكەري قۇرمەتكە ساي وتكىزىلمەك.
“ادىرنا” ۇلتتىق پورتالى
