الماتى وبلىسىندا جانساقتاۋ بولىمىنە تۇسكەن ناۋقاس اۋرۋحانادا جاراقات العان، دەپ حابارلايدى «ادىرنا» ءتىلشىسى Almaty.tv-گە سىلتەمە جاساپ.
ەپيلەپسياعا شالدىققان ازاماتقا ىستىق سۇيىقتىق توگىلگەن. 20 جاستاعى سۇلتان بۇل دەنە جاراقاتىن اۋرۋحانادا العان. سول ساتتە ناۋقاس ەس-ءتۇسسىز جاتقاندىقتان، وقيعانىڭ قالاي بولعانىن ءوزى ءجوندى بىلمەيدى.
«ويانىپ، قاراسام وڭ جاعىم، اشيدى. نە بولدى دەپ قاراسام كۇيىپ قالىپتى. «شايعا ءوزىڭ كۇيىپ قالدىڭ، جىلى ءشاي اكەلگەندە، ىستىعىن سۇرادىڭ» دەپ ءتۇسىندىردى»، – دەدى اباي اۋىلىنىڭ تۇرعىنى سۇلتان ورشابەكوۆ.
الايدا سۇلتاننىڭ اناسى دارىگەرلەرگە سەنبەيدى. وقيعا بولعان ساتتە بىردەن حابار بەرمەگەنىنە نارازى.
«قالاي ول ىستىق شايعا كۇيدىرىپ الادى؟ نەگە ونىڭ اۋزى مەن قولى كۇيمەيدى؟ قالاي تەك ءىشى كۇيدى؟! ءشاي توگىلسە، 3-دارەجەلى كۇيىك الادى دەگەن ميعا سيمايتىن اڭگىمە سياقتى. بىلمەيمىن. قورقىپ قالدىق. جانساقتاۋ بولىمىندە وسىلاي ىستەسە، باسقا ءبولىم نە ىستەمەيدى»، – دەدى سۇلتاننىڭ اناسى باقىتگۇل ورشابەكوۆا.
ايتا كەتسەك، بۇل - قاراساي اۋدانى بويىنشا اۋىر حالدەگى ناۋقاستاردى قابىلدايتىن جالعىز اۋرۋحانا. ەپيلەپسياعا شالدىققان 20 جاستاعى سۇلتان 1 تامىز تۇندە وسىندا جەتكىزىلىپ، مۇنداعى جانساقتاۋ بولىمىنە جاتقىزىلعان. اناسىنىڭ ايتۋىنشا، ۇلىنىڭ تالما اۋرۋى وسىدان 10 جىل بۇرىن انىقتالعان. سودان بەرى سۇلتان دارىگەرلەر باقىلاۋىندا. 1 تامىزدا تۇنگە قاراي دەرتى اياق استى اسقىنىپ، ءۇي ماڭىندا ەسىنەن تانىپ قۇلاعان. دارىگەرلەردىڭ ايتۋىنشا، جەدەل جاردەممەن جەتكىزىلگەننەن ناۋقاسقا ءتيىستى مەديتسينالىق كومەك كورسەتىلگەن.
«ناۋقاس جانساقتاۋ بولىمىندە جاتقاندا دەنەسىن كۇيدىردى. ۇستىنە ىستىق ءشاي توگىلگەن. قازىر تەكسەرۋ ءجۇرىپ جاتىر. وقيعاعا قاتىستى دارىگەرمەن سويلەستىك. ەرتەڭ مەديتسينالىق قىزمەت كورسەتۋ سالاسىنداعى باقىلاۋ كوميتەتىنىڭ تەكسەرۋ توبى كەلۋى ءتيىس. ولار تولىق تەكسەرىس جاساپ، كىمنىڭ كىنالى ەكەنىن انىقتايدى»، – دەدى قاراساي اۋدانارالىق كوپسالالى اۋرۋحاناسى باس دارىگەرىنىڭ ورىنباسارى ماكسيم ستادنيكوۆ.
سۇلتاننىڭ اناسى بۇل وقيعادان كەيىن ەكسپەرتيزا جاساۋدى تالاپ ەتكەن. ونىڭ ايتۋىنشا، سول ساتتە دارىگەرلەر قارسى بولعان كورىنەدى. سوندىقتان ۇلىن اۋرۋحانادان شىعارىپ العان. كەيىن پوليتسياعا ارىز جازىپ قالدىردى.
«بۇل دەرەك پوليتسيا باسقارماسىندا تىركەلدى. ماتەريالدار جيناقتالىپ، ەكسپەرتيزا تاعايىندالدى. وقيعا اۋرۋحانادا بولعاندىقتان ءىس الماتى وبلىستىق دەنساۋلىق ساقتاۋ باسقارماسىنا جولداندى. ءىستىڭ تولىق ءمان-جايى تەكسەرۋ جۇمىستارىنىڭ ناتيجەسى شىققاندا عانا انىقتالماق. ازىرگە سۇلتان جاراسىن ءوزى تانىپ، ەم-دومدى ۇيىندە الىپ جاتىر»، – دەدى قاراساي اپب جەرگىلىكتى پوليتسيا قىزمەتى ءبولىمىنىڭ باستىعى ارمان تالقامباەۆ.
