نۇر-سۇلتاندا جۇرگەن 40 قايىرشى ەلدەن شىعارىلدى

2884
Adyrna.kz Telegram

ەلوردادا 8 تامىز بەن 8 قىركۇيەك ارالىعىندا قالا اۋماعىندا قۇقىق بۇزۋشىلىقتىڭ الدىن الۋ جانە ەسكەرتۋ ماقساتىندا «ۋچاسكە» جەدەل الدىن الۋ ءىس-شاراسى ءوتىپ جاتىر. بۇل تۋرالى پد ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.

شارانى وتكىزۋ بارىسىندا نۇر-سۇلتان قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن ەلوردا كوشەلەرىندە قايىرشىلىقپەن اينالىساتىن 40 شەتەلدىك ازامات ەلدەن شىعارىلدى. ونىڭ 30-ىن پوليتسيا وزبەكستانمەن شەكتەسەتىن مەملەكەتتىك شەكاراعا دەيىن ماجبۇرلەپ شىعارۋدى ۇيىمداستىردى، - دەلىنگەن قالالىق پد ءباسپاسوز قىزمەتىنىڭ حابارلاماسىندا.

ال قالعان 10 شەتەلدىك ازامات قازاقستاننان ءوز بەتىنشە كەتكەن.

جالپى، وسى جەدەل الدىن الۋ ءىس-شاراسى باستالعان ءبىر اپتا ىشىندە كوشى-قون تۋرالى زاڭنامانىڭ ءتۇرلى بۇزۋشىلىقتارى ءۇشىن 288 شەتەلدىك ازامات اكىمشىلىك جاۋاپكەرشىلىككە تارتىلعان.

”ادىرنا” ۇلتتىق پورتالى 

پىكىرلەر