ۇستىمىزدەگى جىلدىڭ 12-13 تامىزىندا شۋ اۋدانىندا جامبىل وبلىسى قحا انالار كەڭەسىنىڭ كوشپەلى كەڭەيتىلگەن وتىرىسى ءوتتى.
ىس-شارا جامبىل وبلىسىنىڭ ارداگەرلەر كەڭەسى، انالار كەڭەسى، جانە قازاقستان رەسپۋبليكاسىنىڭ ۇلتتىق «قىزىل جارتى اي» قوعامىمەن بىرلەسىپ وتكىزىلدى. كوشپەلى وتىرىسقا قورداي، مويىنقۇم، مەركى، ت.رىسقۇلوۆ اۋداندارىنىڭ وكىلدەرى، داعدارىس ورتالىعىنىڭ ماماندارى قاتىستى.
وتىرىس بارىسىندا شۋ اۋدانىنىڭ انالار كەڭەسى وتكىزگەن جۇمىستارمەن تانىسىپ، حالىق پەداگوگيكاسى، جاستاردى تاربيەلەۋ، نەكەنى ساقتاۋ جانە ت.ب. ماسەلەلەر تالقىلاندى.
شۋ اۋدانىنىڭ اكىمى ساكەن ارۋباەۆتىڭ پىكىرىنشە، قوعام ءۇشىن جاستاردى تاربيەلەۋ سياقتى ماڭىزدى ماسەلەدە اعا ۇرپاقتىڭ تاجىريبەسىن، ۇلتتىق تاربيە قۇندىلىقتارىن باسشىلىققا الۋ ماڭىزدى.
ودان ءارى قحا انالار كەڭەسىنىڭ ءتورايىمى مۇحاببات ميراجاپوۆا «مادەنيەتتى ۇلت-مادەنيەتتى انا» جوباسىن تانىستىرىپ، وسى باعىتتاعى جۇمىستىڭ ماڭىزدىلىعىمەن ءبولىستى.
تالقىلاۋ بارىسىندا ارنايى وڭالتۋ ورتالىعىنا قاجەتتى زاتتار تۋرالى ماسەلەسى كوتەرىلدى. ويتكەنى، تۇرمىستىق زورلىق-زومبىلىق قوعامنىڭ وزەكتى پروبلەماسىنا اينالۋدا. قازىر شۋ اۋدانىندا وسىنداي جاعدايعا تاپ بولعان ايەلدەردى ۋاقىتشا پانالاۋ ءۇشىن 27 ورىنمەن جابدىقتالعان داعدارىس ورتالىعى بار.
شارا سوڭىندا وبلىستىق انالار كەڭەسىنىڭ مۇشەلەرى قوعامدىق قابىلداۋ وتكىزدى. ءوتىنىش بىلدىرگەندەردىڭ ماسەلەلەرىن شەشۋ ءۇشىن ماتەريالدىق جانە زاڭ تۇرعىسىنان لايىقتى كومەك كورسەتىلدى.
