تامىزدىڭ 25-ىنەن 26-سىنا قاراعان ءتۇنى تۇركىستان وبلىسى جەتىساي قالاسىنداعى «كۇلپارشىن انا» بازارىندا ءىرى ءورت شىقتى. بۇل ساۋداگەرلەردى نارازىلىق بىلدىرۋگە يتەرمەلەدى. بۇل تۋرالى جەلىدە ۆيدەو تارادى، دەپ حابارلايدى “ادىرنا” ۇلتتىق پورتالى.
ەرەۋىلشىلەر بازار ورنالاسقان كوشەنى جاۋىپ تاستادى. ولار ورتەنگەن تاۋارلار ءۇشىن وتەماقى تالاپ ەتتى.
ازاماتتار بازار اكىمشىلىگىنىڭ مەڭگەرۋشىسىنىڭ شىعۋىن كۇتىپ تۇرعانىمەن، ولاردىڭ ورنىنا ءماسليحات دەپۋتاتى قايرات بالابيەۆ شىقتى. ول «ولاردىڭ ماسەلەسىن جاقسى تۇسىنەتىنىن» اتاپ ءوتىپ، ەرەۋىلشىلەردى تىنىشتاندىرۋعا تىرىستى.
ارا-تۇرا دەپۋتاتتىڭ قولىنان ميكروفون تارتىپ الىپ، شىعىننىڭ ورنىن تولتىرۋدى تالاپ ەتتى. ويتكەنى ساتۋشىلاردىڭ نەسيەسى بار. ال بالابيەۆ ساتۋشىلاردان جالداۋ اقىسى الىنبايدى دەپ ۋادە بەردى.
ساتۋشىلار جەرگىلىكتى بيلىكتەن ورتكە بايلانىستى شىعىندى وتەۋ تۋرالى ۋادەلەرىن قۇجاتتاۋدى تالاپ ەتتى. ازىرگە بۇل ورىندالعان جوق.
اكىمدىك الدىمەن زارداپ شەككەندەردىڭ سانىن انىقتاپ، ماتەريالدىق شىعىندى باعالاۋ كەرەكتىگىن اتاپ وتەدى . وبلىستا وقيعانىڭ سەبەپتەرىن انىقتاۋ ءۇشىن كوميسسيا قۇرىلدى.
”ادىرنا” ۇلتتىق پورتالى
