الماتى اكىمدىگى جاتاقحانالار قۇرىلىسىنا كومەكتەسەدى. بۇل تۋرالى قر پارلامەنتى ءماجىلىسىنىڭ دەپۋتاتى ءمادي احمەتوۆ ءوزىنىڭ ينستاگرام پاراقشاسىندا حابارلادى، دەپ جازادى "ادىرنا" ۇلتتىق پورتالى.
بۇگىنگى كەڭەستە قالا اكىمى ەربولات دوساەۆ، عىلىم جانە جوعارى ءبىلىم ءمينيسترى ساياسات نۇربەك، جوعارى وقۋ ورىندارىنىڭ رەكتورلارى مەن قوعام وكىلدەرى جوعارى وقۋ ورىندارىنىڭ جاڭا وقۋ جىلىنا دايىندىعىن تالقىلادى.
"الماتىداعى ستۋدەنتتىك جاتاقحانا ماسەلەسىن شەشۋ اسا ماڭىزدى. بەرىلگەن ۋادە ءىس جۇزىندە ورىندالادى دەگەن ويدامىز", - دەپ جازدى دەپۋتات.
⠀
وتكەن وقۋ جىلىندا جاتاقحانادا 32 مىڭ ورىن جەتىسپەگەن ەدى. قالانىڭ 36 جوعارى وقۋ ورنىندا 182 مىڭ ستۋدەنت وقىدى، ونىڭ 112 مىڭى – باسقا وڭىردەن كەلگەندەر.
"قالا اكىمى ايتۋىنشا، ءبىلىم بەرۋ گرانتتارىنىڭ كوبەيۋىنە بايلانىستى سىرتتان كەلەتىن ستۋدەنتتەر 125 مىڭعا دەيىن جەتۋى مۇمكىن. وسى جىلى جاتاقحانا سالۋدى جوسپارلاعان ءتورت ۋنيۆەرسيتەتتىڭ ىشىنەن تەك گونچاروۆ اتىنداعى ۋنيۆەرسيتەت قۇرىلىس جۇمىستارىنا كىرىستى", -دەلىنگەن رەسمي حابارلامادا.
ەربولات دوساەۆتىڭ تاپسىرماسى بويىنشا جوعارى وقۋ ورىندارىنا كومەك كورسەتۋ ءۇشىن اكىمدىك قۇرىلىس كەزىندە تۋىندايتىن ماسەلەلەردى زەرتتەيدى. بۇعان قالا اكىمدىگىنىڭ بولىمشەلەرى، بەيىندى مينيسترلىك پەن جوو وكىلدەرى اتسالىسادى.
"ادىرنا" ۇلتتىق پورتالى
