جانبولات ماماي وزىنە قاستاندىق جاسالۋى مۇمكىن ەكەنىن ايتىپ، مالىمدەمە جاسادى. بەلسەندىنىڭ مالىمدەمەسىن Facebook جەلىسىندە ينگا يمانباي جاريالادى.
ايتا كەتەيىك، ول الماتىداعى قاڭتار وقيعاسى كەزىندەگى تارتىپسىزدىكتەرگە قاتىستى جانە جالعان اقپارات تاراتۋعا بايلانىستى قامالعان بولاتىن.
“ مەنىڭ، جارتى جىلدان استام، الماتىداعى تەرگەۋ يزولياتورىندا جاتقانىمدى بىلەسىزدەر. وسى ۋاقىت ىشىندە، وزىمە قارسى قانداي دا ءبىر قورقىتۋ بولماسا كۇش كورسەتكەن وقيعا بولعان ەمەس. الايدا، كەشە مەن وزىمە قاستاندىق جاسالماقشى بولىپ جاتىر دەگەن حابار الدىم. ماعان «ماماي ءوزى YouTube-تە جاريالاعان ءبىر ۆيدەو ءۇشىن باسىمەن جاۋاپ بەرەدى» دەپ جەتكىزدى. بۇل كىمنىڭ سالەمى دەپ سۇراعاندا، ولار ءوزى دە قاماۋدا وتىرعان «ديكي ارمان» – ارمان جۇماگەلديەۆتەن دەپ جاۋاپ بەردى. شىنىمەن-اق، ءوزىمنىڭ ءبىر سوزىمدە ونى سىناعانىم بار. مەنىڭ ويىمشا، بۇل «سالەمنىڭ» ارتىندا، ماعان قاستاندىق ۇيىمداستىرىپ جاتقان، ارنايى قىزمەتتەر تۇرۋى ابدەن مۇمكىن.
التىنبەك سارسەنبايۇلىنىڭ ءولىمى ەستەرىڭىزدە بولار؟ نامىسىنا تيگەن سوزدەر ايتتى-مىس، ەشكىمگە ءجابىرى جوق ۇتەمباەۆ تاپسىرىس بەرگەن بولىپ شىقپاپ پا ەدى؟ بالكىم، بيلىك ماعان قاستاندىق جاساپ، بار كىنانى قىلمىس الەمىنىڭ بەدەلدىسىنە ارتا سالماق تا شىعار. ءوزىم العان حابارعا قاتىستى مەنىڭ ويىم وسىنداي. ماعان قاتىستى قانداي دا ءبىر قاستاندىقتىڭ ارتىندا، قاشان دا، ارنايى قىزمەتتەر مەن قازاقستان بيلىگى تۇراتىن بولادى دەپ اشىق، رەسمي تۇردە مالىمدەيمىن! تۇرمەدە ەشكىممەن ءوزارا كيكىلجىڭىم جوق، ەشقاشان دا جانجالداسقان ەمەسپىن. قۇقىق قورعاۋشىلاردان، جۋرناليستەردەن، ديپلوماتتاردان جانە مۇددەلى بارلىق جانداردان باسىما تۇسكەن وسى جاعدايعا نازار اۋدارۋىن وتىنەمىن”، – دەدى ماماي.
”ادىرنا” ۇلتتىق پورتالى
