قر عىلىم جانە جوعارى ءبىلىم مينيسترلىگى "الماتىداعى ستۋدەنتتەر دالادا قونىپ ءجۇر" دەگەن اقپاراتتى جوققا شىعاردى، دەپ جازادى "ادىرنا" ۇلتتىق پورتالى جازادى.
"الماتىداعى ستۋدەنتتەر دالادا قونىپ ءجۇر" دەگەن سارىنداعى حابارلامالار سوڭعى كۇندەرى بىرقاتار اقپاراتتىق سايت پەن الەۋمەتتىك جەلىدە تاراعان ەدى. عىلىم جانە جوعارى ءبىلىم مينيسترلىگى ولاردى مۇقيات زەردەلەپ، كوپشىلىگى ءبىر پاراقشادان الىنعانىن جانە ونداعى مالىمەتتىڭ راستالماعانىن حابارلايدى. باق وكىلدەرى مەن الەۋمەتتىك جەلىدەگى پاراقشا يەلەرى مينيسترلىكتىڭ ءباسپاسوز قىزمەتىنە ول ستۋدەنتتەر جايلى ناقتى دەرەكتەردى ۇسىنا المادى. وسىعان وراي قوعام وكىلدەرى مەن بۇقارالىق اقپارات قۇرالدارىن تەك رەسمي اقپاراتقا سەنۋگە شاقىرامىز", - دەلىنگەن حابارلامادا.
ستۋدەنتتەردىڭ جاتاقحاناعا ورنالاسۋىنا قاتىستى سۇراقتار تۋىنداسا جوعارى وقۋ ورىندارىنىڭ اكىمشىلىگىنە حابارلاسۋ سۇرالادى.
"ال، ۋنيۆەرسيتەتتەر شاكىرتتەردى جاتاقحاناداعى ورىندارمەن قامتاماسىز ەتۋدە. سونداي-اق، قاجەت بولعان جاعدايدا ورىن جەتپەگەن ستۋدەنتتەر حوستەلدەر مەن قوناقۇيلەرگە ورنالاستىرىلادى. ايتا كەتۋ كەرەك، عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ ستۋدەنتتەردى جاتاقحانامەن قامتۋ ماسەلەسى تولىق شەشىلگەنشە الماتىدا بولادى. ول جاعدايدى تىكەلەي باقىلاۋىندا ۇستايدى", - دەپ حابارلادى مينيسترلىك.
