"حامەنوۆا ءىسى": ەلباسىنى سۇيەدى ەكەن، سوزىندە تۇردى دەپ اقتاۋدىڭ قاجەتى جوق!

13280
Adyrna.kz Telegram

سىبايلاس جەمقورلىققا قارسى كۇرەس اگەنتتىگى اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ "مەنى نەگىزسىز قۋدالادى" دەگەن مالىمدەمەسىنە جاۋاپ بەردى، دەپ جازادى "ادىرنا" ۇلتتىق پورتالى. 

«الەۋمەتتىك جەلىلەردە سوتتالۋشى باقىتگۇل حامەنوۆانىڭ سىبايلاس جەمقورلىققا قارسى قىزمەت تاراپىنان ونى نەگىزسىز قۋدالاۋ تۋرالى مالىمدەمەسى بار اقپارات تاراتىلۋدا. وتكەن جىلدىڭ جەلتوقسان ايىندا حامەنوۆا مادەنيەت باسقارماسىنىڭ باسشىسى ا.رىسقاليەۆپەن مەملەكەتتىك ساتىپ الۋ تۋرالى شارت جاساسقانى جانە مىندەتتەمەلەردى ورىنداۋ بارىسىندا جالپى قامقورلىعى ءۇشىن "بالقىتۋ" جشس ديرەكتورى ۋ. اداموۆتان الدىن الا ءسوز بايلاسۋ ارقىلى ادامدار توبىندا 4,5 ملن. تەڭگە سوماسىندا پارا العانى ءۇشىن اشكەرەلەنگەنىن حابارلايمىز»، - دەلىنگەن حابارلامادا. 

انتيكوردىڭ حابارلاۋىنشا، ونىڭ ارەكەتتەرى جينالعان دالەلدەمەلەردى، ونىڭ ىشىندە جاسىرىن تەرگەۋ ارەكەتتەرىنىڭ ناتيجەلەرىن، سونداي-اق كۇدىكتىلەر مەن كۋالاردىڭ تىكەلەي ايعاقتارىن ەسكەرە وتىرىپ سارالانادى.

"تاعىلعان ايىپتىڭ نەگىزدىلىگى مەن زاڭدىلىعى پروكۋرورمەن راستالدى. حامەنوۆانىڭ جانە باسقا ادامداردىڭ كىناسى تۋرالى قورىتىندى شەشىمدى سوت قابىلدايدى", - دەپ حابارلادى اگەنتتىك.

حامەنوۆانىڭ مالىمدەمەسىنە قاتىستى زاڭگەر، قوعام بەلسەندىسى ايگۇل ورىنبەك تە ءوز پىكىرىن ءبىلدىردى.

"وتىز جىل جەمقورلىق جاساعاندار — «حالقىمدى سۇيگەننەن سوڭ، وسىلاي جاسادىق»، دەپ جىلاپ-سۇقتاسا اقتاپ جىبەرەتىن تۇرلەرىڭ بار عوي! «ەلباسىنى سۇيەدى ەكەن، سوزىندە تۇردى»، - دەپ اقتاۋدىڭ ەش قاجەتى جوق، تۋعان ەلىنىڭ الدىندا قاتەلىككە بوي الدىرعانىنا كەشىرىم سۇراپ جىلاسا، ەكى بالاپانى ءۇشىن كەشىرىممەن قاراۋعا بولار ەدى... “ەلباسىنى سۇيگەنىم ءۇشىن قاماپ جاتىر”، دەپ ەڭىرەۋى — ادامداردىڭ جاناشىرلىعىن وياتىپ، ءوزىنىڭ قىلمىستىق ارەكەتىن «ساياسيلاندىرۋ» بولىپ تابىلادى! بۇنداي ءىس-ارەكەتى ءۇشىن ايىپ تاعىلعان ادامدى — قىلمىستىق جاۋاپكەرشىلىكتەن بوساتپاۋ كەرەك! جاڭا قازاقستاننىڭ ءادىل سوت شەشىمىن كۇتەمىن!", - دەپ جازدى ول ءوزىنىڭ فب پاراقشاسىندا. 

ەستەرىڭىزگە سالا كەتەيىك، 10 جەلتوقسان كۇنى اتىراۋ وبلىسى اكىمىنىڭ بۇرىنعى ورىنباسارى ءىرى كولەمدە پارا الدى دەگەن كۇدىكپەن ۇستالدى. 31 مامىردا حامەنوۆاعا قاتىستى قىلمىستىق ءىس اتىراۋ قالاسىنىڭ №2 سوتىنا بەرىلدى. سوت پروتسەسى 3 تامىزدا باستالىپ، ءالى دە جالعاسىپ جاتىر. كەزەكتى سوت وتىرىسىنلا باقىتگۇل حامەنوۆا  ءوز سوزىندە تاعى دا كىناسىن مويىنداماي: “قۇرمەتتى سوت! قازىر مىقتىلاردىڭ ۋاقىتى. مەنى نازارباەۆتىڭ جاقتاسى دەپ ايتا بەرسىن. مەن ەلباسىن جاقسى كورەمىن. ونىڭ ەلگە قوسقان ۇلەسى تۋرالى ايتۋدى توقتاتپايمىن”، – دەگەن بولاتىن.

"ادىرنا" ۇلتتىق پورتالى

پىكىرلەر