Sybailas jemqorlyqqa qarsy küres agenttıgı Atyrau oblysy äkımınıŋ būrynǧy orynbasary Baqytgül Hamenovanyŋ "menı negızsız qudalady" degen mälımdemesıne jauap berdı, dep jazady "Adyrna" ūlttyq portaly.
«Äleumettık jelılerde sottaluşy Baqytgül Hamenovanyŋ Sybailas jemqorlyqqa qarsy qyzmet tarapynan ony negızsız qudalau turaly mälımdemesı bar aqparat taratyluda. Ötken jyldyŋ jeltoqsan aiynda Hamenova Mädeniet basqarmasynyŋ basşysy A.Rysqalievpen Memlekettık satyp alu turaly şart jasasqany jäne mındettemelerdı oryndau barysynda jalpy qamqorlyǧy üşın "Balqytu" JŞS direktory U. Adamovtan aldyn ala söz bailasu arqyly adamdar tobynda 4,5 mln. teŋge somasynda para alǧany üşın äşkerelengenın habarlaimyz», - delıngen habarlamada.
"Taǧylǧan aiyptyŋ negızdılıgı men zaŋdylyǧy prokurormen rastaldy. Hamenovanyŋ jäne basqa adamdardyŋ kınäsı turaly qorytyndy şeşımdı sot qabyldaidy", - dep habarlady agenttık.Hamenovanyŋ mälımdemesıne qatysty zaŋger, qoǧam belsendısı Aigül Orynbek te öz pıkırın bıldırdı.
"Otyz jyl jemqorlyq jasaǧandar — «halqymdy süigennen soŋ, osylai jasadyq», dep jylap-sūqtasa aqtap jıberetın türlerıŋ bar ǧoi! «Elbasyny süiedı eken, sözınde tūrdy», - dep aqtaudyŋ eş qajetı joq, tuǧan Elınıŋ aldynda qatelıkke boi aldyrǧanyna keşırım sūrap jylasa, ekı balapany üşın keşırımmen qarauǧa bolar edı... “Elbasyny süigenım üşın qamap jatyr”, dep eŋıreuı — adamdardyŋ janaşyrlyǧyn oiatyp, özınıŋ qylmystyq äreketın «saiasilandyru» bolyp tabylady! Būndai ıs-äreketı üşın aiyp taǧylǧan adamdy — qylmystyq jauapkerşılıkten bosatpau kerek! Jaŋa Qazaqstannyŋ ädıl Sot şeşımın kütemın!", - dep jazdy ol özınıŋ fb paraqşasynda.Esterıŋızge sala keteiık, 10 jeltoqsan künı Atyrau oblysy äkımınıŋ būrynǧy orynbasary ırı kölemde para aldy degen küdıkpen ūstaldy. 31 mamyrda Hamenovaǧa qatysty qylmystyq ıs Atyrau qalasynyŋ №2 sotyna berıldı. Sot prosesı 3 tamyzda bastalyp, älı de jalǧasyp jatyr. Kezektı sot otyrysynla Baqytgül Hamenova öz sözınde taǧy da kınäsın moiyndamai: “Qūrmettı sot! Qazır myqtylardyŋ uaqyty. Menı Nazarbaevtyŋ jaqtasy dep aita bersın. Men Elbasyn jaqsy köremın. Onyŋ elge qosqan ülesı turaly aitudy toqtatpaimyn”, – degen bolatyn.
"Adyrna" ūlttyq portaly
