«التىن وردا» مادەنيەت ءۇيى ەل يگىلىگىنە بەرىلدى

2254
Adyrna.kz Telegram

مەرەكەگە وراي ورالدا جاڭا الەۋمەتتىك نىساندار اشىلىپ، ەل يگىلىگىنە بەرىلۋدە. سولاردىڭ ءبىرى – زاشاعان كەنتىندە اشىلعان «التىن وردا» مادەنيەت ءۇيى.

كەنتتە العاش اشىلعان 250 ورىندىق مادەنيەت وشاعى بۇگىننەن باستاپ ءوز قىزمەتىن باستادى.ەكى قاباتتى ءزاۋلىم عيماراتتا الداعى ۋاقىتتا كونتسەرتتىك باعدارلامالارمەن قاتار بالالارعا ءارتۇرلى ۇيىرمەلەر وتكىزىلەتىن بولادى. سونىمەن قاتار سۋرەت كورمەلەرىن، قولونەر جارمەڭكەلەرىن وتكىزۋگە تولىق مۇمكىندىك بار. سونداي-اق ،مۇندا 24 مىڭ دانا كىتاپ قورى بار №4 كىتاپحانانىڭ فيليالى جۇمىس جاسايدى.

جاڭا نىساننىڭ اشىلۋ سالتاناتىنا ورال قالاسىنىڭ اكىمى ميرجان ساتقانوۆ قاتىسىپ، كەنت تۇرعىندارىنىڭ قۋانىشىمەن ءبولىستى.

– سىزدەردى شاھارامىزدىڭ ءتول مەرەكەسى – تۋعان كۇنىمەن شىن جۇرەكتەن قۇتتىقتايمىن. زاشاعان كەنتى – قالامىزداعى ەڭ ءىرى اۋدانداردىڭ ءبىرى، مۇندا 70 مىڭداي حالىق تۇرادى. كەنت تۇرعىندارىمەن كەزدەسۋلەردە جەرگىلىكتى حالىق تاراپىنان ءجيى كوتەرىلەتىن ماسەلە – مادەنيەت ءۇيىن سالۋ قاجەتتىلىگى ەدى. مىنە، بۇگىن تۇرعىنداردىڭ تىلەگى ورىندالىپ، جاڭا 250 ورىندىق «التىن وردا» مادەنيەت ءۇيى پايدالانۋعا بەرىلۋدە. زاشاعاندىقتاردى زامان تالابىنا ساي سالىنعان جاڭا نىساننىڭ اشىلۋىمەن قۇتتىقتايمىن. ەل ونەرىنىڭ بيىكتەۋى الدىمەن مادەنيەتىنىڭ قالىپتاسۋىنا بايلانىستى ەكەنى انىق. سوندىقتان مادەنيەت ءۇيى – رۋحاني دامۋىمىزدىڭ وشاعى سانالادى. بۇگىن اشىلىپ جاتقان رۋحانيات وشاعى ەل يگىلىگىنە ۇزاق جىلدار بويى قىزمەت ەتە بەرگەي. مادەنيەت ءۇيى ونەرلى ورەندەردى ءبىر جەرگە توعىستىرسىن. جاڭا نىسان زاشاعان كەنتى تۇرعىندارىنىڭ رۋحاني ءومىرىنىڭ ورتالىعىنا اينالارىنا بەك سەنەمىز، – دەدى شاھار باسشىسى.

قازاقستاننىڭ ەڭبەك سىڭىرگەن قايراتكەرى، فيلوسوفيا دوكتورى، پروفەسسور، بەلگىلى تەاتر رەجيسسەرى ۇستاز، ەلوردامىزداعى مۋزىكالىق جاس كورەرمەن تەاترىنىڭ ديرەكتورى جانە كوركەمدىك جەتەكشىسى، جەرلەسىمىز اسحات ماەميروۆ، تانىمال كينو جانە تەاتر اكتەرى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى، استانا تسيركىنىڭ ديرەكتورى ەرىك جولجاقسىنوۆ جانە تانىمال كينو جانە تەاتر اكتەرى، قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ لاۋرەاتى، ەل استاناسىنداعى «جاستار» تەاترىنىڭ ديرەكتورى ءادىل احمەتوۆ ورتالىقتىڭ اشىلۋىمەن قۇتتىقتاپ، جۇمىسىنا ساتتىلىك تىلەدى.

اشىلۋ سالتاناتىنان كەيىن قالا اكىمى مەن جينالعان قوناقتار ورتالىقتىڭ ءىشىن ارالاپ، جۇمىس بارىسىمەن تانىستى. ايتا كەتەيىك، «التىن وردا» مادەنيەت ءۇيى قالالىق «جاستار مادەنيەت سارايىنىڭ» فيليالى رەتىندە جۇمىس جاساماق.

پىكىرلەر