Merekege oraı Oralda jańa áleýmettik nysandar ashylyp, el ıgiligine berilýde. Solardyń biri – Zashaǵan kentinde ashylǵan «Altyn Orda» mádenıet úıi.
Kentte alǵash ashylǵan 250 oryndyq mádenıet oshaǵy búginnen bastap óz qyzmetin bastady.Eki qabatty záýlim ǵımaratta aldaǵy ýaqytta konerttik baǵdarlamalarmen qatar balalarǵa ártúrli úıirmeler ótkiziletin bolady. Sonymen qatar sýret kórmelerin, qolóner jármeńkelerin ótkizýge tolyq múmkindik bar. Sondaı-aq ,munda 24 myń dana kitap qory bar №4 kitaphananyń fılıaly jumys jasaıdy.
Jańa nysannyń ashylý saltanatyna Oral qalasynyń ákimi Mırjan Satqanov qatysyp, kent turǵyndarynyń qýanyshymen bólisti.
– Sizderdi shaharamyzdyń tól merekesi – týǵan kúnimen shyn júrekten quttyqtaımyn. Zashaǵan kenti – qalamyzdaǵy eń iri aýdandardyń biri, munda 70 myńdaı halyq turady. Kent turǵyndarymen kezdesýlerde jergilikti halyq tarapynan jıi kóteriletin másele – mádenıet úıin salý qajettiligi edi. Mine, búgin turǵyndardyń tilegi oryndalyp, jańa 250 oryndyq «Altyn Orda» mádenıet úıi paıdalanýǵa berilýde. Zashaǵandyqtardy zaman talabyna saı salynǵan jańa nysannyń ashylýymen quttyqtaımyn. El óneriniń bıikteýi aldymen mádenıetiniń qalyptasýyna baılanysty ekeni anyq. Sondyqtan mádenıet úıi – rýhanı damýymyzdyń oshaǵy sanalady. Búgin ashylyp jatqan rýhanııat oshaǵy el ıgiligine uzaq jyldar boıy qyzmet ete bergeı. Mádenıet úıi ónerli órenderdi bir jerge toǵystyrsyn. Jańa nysan Zashaǵan kenti turǵyndarynyń rýhanı ómiriniń ortalyǵyna aınalaryna bek senemiz, – dedi shahar basshysy.
Qazaqstannyń eńbek sińirgen qaıratkeri, fılosofııa doktory, professor, belgili teatr rejısseri ustaz, Elordamyzdaǵy Mýzykalyq jas kórermen teatrynyń dırektory jáne kórkemdik jetekshisi, jerlesimiz Ashat Maemırov, tanymal kıno jáne teatr akteri, Qazaqstannyń eńbek sińirgen qaıratkeri, «Parasat» ordeniniń ıegeri, Astana ırkiniń dırektory Erik Joljaqsynov jáne tanymal kıno jáne teatr akteri, Qazaqstannyń eńbek sińirgen qaıratkeri, Memlekettik syılyqtyń laýreaty, el astanasyndaǵy «Jastar» teatrynyń dırektory Ádil Ahmetov ortalyqtyń ashylýymen quttyqtap, jumysyna sáttilik tiledi.
Ashylý saltanatynan keıin qala ákimi men jınalǵan qonaqtar ortalyqtyń ishin aralap, jumys barysymen tanysty. Aıta keteıik, «Altyn Orda» mádenıet úıi qalalyq «Jastar mádenıet saraıynyń» fılıaly retinde jumys jasamaq.
