توقاەۆ قىرعىزستان پرەزيدەنتى سادىر جاپاروۆقا كوڭىل ايتۋ جەدەلحاتىن جولدادى. بۇل تۋرالى اقوردانىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
قاسىم-جومارت توقاەۆ سادىر جاپاروۆقا جانە قىرعىز حالقىنا بارشا قازاقستاندىقتاردىڭ جانە جەكە ءوزىنىڭ اتىنان قىرعىز-تاجىك شەكاراسىندا بولعان قايعىلى وقيعا سالدارىنان كوپتەگەن جاۋىنگەر مەن بەيبىت تۇرعىنداردىڭ قازا تابۋىنا بايلانىستى كوڭىل ايتتى.
– بەرىك دوستىق جانە تاتۋ كورشىلىك قاتىناستاردى ساقتاۋ – ءبىزدىڭ ورتاق ءارى ماڭىزدى مىندەتىمىز، سونداي-اق ءوڭىردىڭ تۇراقتىلىعى مەن قاۋىپسىزدىگى، بەيبىت ءومىر قۇرۋ جولىنداعى ورتالىق ازياداعى بارشا باۋىرلاس حالىقتىڭ تۇبەگەيلى مۇددەسى. قازاقستان كەز كەلگەن داۋلى ماسەلەنى تەك قانا بەيبىت جولمەن جانە ساياسي ديپلوماتيالىق ادىستەرمەن شەشۋدى جاقتايدى، – دەلىنگەن جەدەلحاتتا.
قازاقستان پرەزيدەنتى قىرعىز حالقىنا مىقتى رۋح، بەيبىتشىلىك جانە باق-بەرەكە تىلەدى.
"ادىرنا" ۇلتتىق پورتالى