توقاەۆ اقش-تا قازاق ەلىن دامىتۋ جايىن كەڭەسىپ ءجۇر

836

پرەزيدەنت اقش-قا ساپارى بارىسىندا تانىمال اناليتيك، كاسىبي ەكونوميست، پروفەسسور ريكاردو حاۋزمانمەن كەزدەستى. عالىم بىرنەشە جىل گارۆاردتاعى "حالىقارالىق دامۋ ورتالىعىنا" باسشىلىق ەتكەن، دەپ جازادى "ادىرنا" ۇلتتىق پورتالى.

گارۆارد پروفەسسورىمەن كەزدەسۋدە قازىرگى زاماننىڭ وزەكتى پروبلەمالارى، الەمدىك دامۋ مودەلدەرى مەن ەكونوميكا ۇردىستەرىنە قاتىستى اڭگىمە وربىگەن. قۇندىلىعى مول ەكى جاقتى كەزدەسۋگە ساياساتكەر، ەكونوميست شىڭعىس مۇقان:

- مەملەكەت باسشىسى نيۋ-يوركتە بىرقاتار كەزدەسۋ وتكىزىپتى. سولاردىڭ ىشىندە پروفەسسورىم ريكاردو حاۋزمانندى كورىپ قۋانىپ قالدىم. ونىڭ كۇردەلىلىك تەورياسى نەگىزىندە “قازاقستان دامىعان ەلدەر قاتارىنا قوسىلۋ ءۇشىن نە ىستەمەك كەرەك” دەگەن تاقىرىپتا تەزيس قورعاعام. وتە وزەكتى تاقىرىپ. دامىعىمىز كەلسە، جالعىز عانا جول بار، ول - كۇردەلىلىك تەورياسى باعىتتايتىن جول. وركەندەگەن كەز كەلگەن ەل دامۋدىڭ قۇپياسىن اشقان پروفەسسور حاۋزماننىڭ نۇسقاپ وتىرعان جولىمەن ءجۇرىپ وتكەن. ەكى اۋىز سوزبەن جەتكىزەر بولسام: ەكونوميكامىز ورنىقتى دامۋ ءۇشىن ءبىز كۇردەلى تاۋارلاردى شىعارۋىمىز كەرەك. ال كۇردەلى تاۋار شىعارۋ ءۇشىن قازاقتاردىڭ باسىندا كۇردەلى نوۋ-حاۋ (ىبىرايشا ايتساق، ونەر) بولۋ كەرەك. ول ونەردى قالاي قوندىرامىز، ءوز الدىنا بولەك اڭگىمە، - دەپ باعا بەرەدى.

ريكاردو حاۋزمان ەكونوميكالىق ءوسىم دياگنوستيكاسى، نارىق زاڭدىلىقتارى، ءونىم ءوندىرۋ ەرەجەسى سىندى تاقىرىپتارعا تۇرەن سالىپ جۇرگەن عالىم. ونىڭ كەڭەسىنە كوپتەگەن مەملەكەتتىڭ ليدەرلەرى، الپاۋىت كومپانيالار مەن پرەزيدەنتتەر ۇدايى جۇگىنىپ وتىرادى.

- وسى تۇرعىدان الساق، پرەزيدەنتتىڭ تەحنيكالىق ماماندىقتارعا دەن قويىپ وتىرعانى سول حاۋزماننىڭ كەڭەسى بولسا كەرەك دەپ توپشىلاپ وتىرمىن.... لي كۋان يۋ دە ءوز كىتابىندا عالىمدارمەن كوپ اقىلداسقانىن جازادى. پروفەسسورلاردان اقىل سۇراۋ ءۇشىن امەريكادا بىرنەشە اي جۇرەدى. قاسىم-جومارت كەمەلۇلىنىڭ عالىمدارمەن كەزدەسىپ جۇرگەنىن جاقسىلىققا بالايمىن، - دەپ جازدى شىڭعىس مۇقان.

"ادىرنا" ۇلتتىق پورتالى
پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket