Prezıdent AQSh-qa sapary barysynda tanymal analıtık, kásibı ekonomıst, professor Rıkardo Haýzmanmen kezdesti. Ǵalym birneshe jyl Garvardtaǵy "Halyqaralyq damý ortalyǵyna" basshylyq etken, dep jazady "Adyrna" ulttyq portaly.
Garvard professorymen kezdesýde qazirgi zamannyń ózekti problemalary, álemdik damý modelderi men ekonomıka úrdisterine qatysty áńgime órbigen. Qundylyǵy mol eki jaqty kezdesýge saıasatker, ekonomıst Shyńǵys Muqan:
- Memleket basshysy Nıý-Iorkte birqatar kezdesý ótkizipti. Solardyń ishinde professorym Rıkardo Haýzmanndy kórip qýanyp qaldym. Onyń kúrdelilik teorııasy negizinde “Qazaqstan damyǵan elder qataryna qosylý úshin ne istemek kerek” degen taqyrypta tezıs qorǵaǵam. Óte ózekti taqyryp. Damyǵymyz kelse, jalǵyz ǵana jol bar, ol - kúrdelilik teorııasy baǵyttaıtyn jol. Órkendegen kez kelgen el damýdyń qupııasyn ashqan professor Haýzmannyń nusqap otyrǵan jolymen júrip ótken. Eki aýyz sózben jetkizer bolsam: Ekonomıkamyz ornyqty damý úshin biz kúrdeli taýarlardy shyǵarýymyz kerek. Al kúrdeli taýar shyǵarý úshin qazaqtardyń basynda kúrdeli noý-haý (Ybyraısha aıtsaq, óner) bolý kerek. Ol ónerdi qalaı qondyramyz, óz aldyna bólek áńgime, - dep baǵa beredi.
Rıkardo Haýzman ekonomıkalyq ósim dıagnostıkasy, naryq zańdylyqtary, ónim óndirý erejesi syndy taqyryptarǵa túren salyp júrgen ǵalym. Onyń keńesine kóptegen memlekettiń lıderleri, alpaýyt kompanııalar men prezıdentter udaıy júginip otyrady.
- Osy turǵydan alsaq, Prezıdenttiń tehnıkalyq mamandyqtarǵa den qoıyp otyrǵany sol Haýzmannyń keńesi bolsa kerek dep topshylap otyrmyn.... Lı Kýan Iý de óz kitabynda ǵalymdarmen kóp aqyldasqanyn jazady. Professorlardan aqyl suraý úshin Amerıkada birneshe aı júredi. Qasym-Jomart Kemelulynyń ǵalymdarmen kezdesip júrgenin jaqsylyqqa balaımyn, - dep jazdy Shyńǵys Muqan.
