Qazaqstanda elektrondy dauys beru jüiesın engızu sūraqtaryna sailau komissiiasy jauap berdı, dep habarlaidy "Adyrna" ūlttyq portaly Tengrinews.kz-ne sıltep.
Komissiianyŋ mälımetınşe, älemnıŋ şamamen 40 elınde elektrondy dauys beru qoldanylady. Alaida köp jaǧdaida būl jüie tek jekelegen öŋırlerde nemese pilottyq rejimde ıske asyrylady.
OSK ökılderı mūndai tehnologiialardy engızu bırqatar täuekeldermen bailanysty ekenın atap öttı. Atap aitqanda, serverlık infraqūrylymǧa kiberşabuyldar, üşınşı tūlǧalardyŋ aralasuy, alaiaqtyq äreketter, dauys berudıŋ qūpiialylyǧynyŋ būzyluy men sailauşylarǧa qysym körsetu nemese basqa adamnyŋ dauys beruı bar.
Qazaqstan qazırgı uaqytta halyqaralyq täjıribenı zerttep jatyr. Sonyŋ ışınde Estoniia täjıribesıne erekşe nazar audaryluda. Būl elde 2005 jyldan berı internet arqyly dauys beru dästürlı ädıspen qatar qoldanylady. 2023 jylǧy parlamenttık sailauda sailauşylardyŋ jartysynan astamy onlain dauys bergen.
Alaida sarapşylar elektrondy dauys berudıŋ tiımdılıgıne qatysty naqty dälelder joq ekenın aitady. EQYŪ-nyŋ Demokratiialyq instituttar jäne adam qūqyqtary biurosynyŋ sarapşysy David Duenas-Sid 2023 jylǧy konferensiiada internet arqyly dauys beru sailauşylar belsendılıgın arttyrady nemese şyǧyndy azaitady degen naqty dälel joq ekenın mälımdegen.
Keibır elder kerısınşe būl täjıribeden bas tartqan. Mysaly, Germaniianyŋ Konstitusiialyq soty 2009 jyly elektrondy dauys beru maşinalaryn qoldanuǧa tyiym saldy. Sebebı sailau prosesınıŋ aşyqtyǧy men jariialylyǧyn tolyq qamtamasyz etu mümkın emes dep tanylǧan. Sondai-aq Niderland pen İrlandiia da qauıpsızdık pen senım mäselesıne bailanysty qaǧaz biulletenderge qaita oralǧan.
