شىڭعىس مۇقان: پرەزيدەنتتىڭ عالىمدارمەن كەزدەسىپ جۇرگەنىن جاقسىلىققا بالايمىن

1387
Adyrna.kz Telegram

مەملەكەت باسشىسى نيۋ-يوركتە بىرقاتار كەزدەسۋ وتكىزىپتى. سولاردىڭ ىشىندە پروفەسسورىم ريكاردو حاۋزمانندى كورىپ قۋانىپ قالدىم. ونىڭ كۇردەلىلىك تەورياسى نەگىزىندە "قازاقستان دامىعان ەلدەر قاتارىنا قوسىلۋ ءۇشىن نە ىستەمەك كەرەك" دەگەن تاقىرىپتا تەزيس قورعاعام. وتە وزەكتى تاقىرىپ. دامىعىمىز كەلسە، جالعىز عانا جول بار، ول - كۇردەلىلىك تەورياسى باعىتتايتىن جول.

وركەندەگەن كەز كەلگەن ەل دامۋدىڭ قۇپياسىن اشقان پروفەسسور حاۋزماننىڭ نۇسقاپ وتىرعان جولىمەن ءجۇرىپ وتكەن.

ەكى اۋىز سوزبەن جەتكىزەر بولسام: ەكونوميكامىز ورنىقتى دامۋ ءۇشىن ءبىز كۇردەلى تاۋارلاردى شىعارۋىمىز كەرەك. ال كۇردەلى تاۋار شىعارۋ ءۇشىن قازاقتاردىڭ باسىندا كۇردەلى نوۋ-حاۋ (ىبىرايشا ايتساق، ونەر) بولۋ كەرەك. ول ونەردى قالاي قوندىرامىز، ءوز الدىنا بولەك اڭگىمە.

وسى تۇرعىدان الساق، پرەزيدەنتتىڭ تەحنيكالىق ماماندىقتارعا دەن قويىپ وتىرعانى سول حاۋزماننىڭ كەڭەسى بولسا كەرەك دەپ توپشىلاپ وتىرمىن.


امەريكادان ورالعانىمدا وسى تەوريا نەگىزىندە تالداۋ ورتالىعىن اشىپ، قازاقستاندى قايتسەك دامىتامىز دەگەن تاقىرىپتى ودان ءارى زەرتتەپ، كوپ سۇراققا جاۋاپ ىزدەسەم بە دەگەن ەدىم. بۇل جوسپارىم ءالى ورىندالماي تۇر. مەملەكەتتىك قىزمەتتەن كەتكەن سوڭ، وسى جوسپارعا قايتا ورالام.

جالپى، حاۋزمانن وتە قاراپايىم ادام. كەز كەلگەن ۋاقىتتا ەسىگى اشىق. ۇيگە كەلىپ، ازاتتىڭ تۇساۋىن كەسىپ بەردى. قازاقستاننىڭ ەكونوميكاسىن بەس ساۋساقتاي بىلەدى.

لي كۋان يۋ دە ءوز كىتابىندا عالىمدارمەن كوپ اقىلداسقانىن جازادى. پروفەسسورلاردان اقىل سۇراۋ ءۇشىن امەريكادا بىرنەشە اي جۇرەدى. قاسىم-جومارت كەمەلۇلىنىڭ عالىمدارمەن كەزدەسىپ جۇرگەنىن جاقسىلىققا بالايمىن.

شىڭعىس مۇقان instagram پاراقشاسىنان

پىكىرلەر