ءانشى نۇرلان البان ءوزىنىڭ instagram پاراقشاسىندا قانداستارىمىزدىڭ ەل ازاماتتىعىن الۋعا قاتىستى وتكىر ماسەلەسىن كوتەردى، دەپ جازادى "ادىرنا" ۇلتتىق پورتالى.
- ءبىزدىڭ قولىمىزداعى ۇلكەن قارۋ - الەۋمەتتىك جەلى. وسى الەۋمەتتىك جەلىدە سوڭعى ۋاقىتتا توقتاۋسىز تالقىعا ءتۇسىپ جاتقان ماسەلە - شەتەلدەن كەلەتىن قانداستارعا بەس جىلسىز ازاماتتىق بەرمەۋ تۋرالى زاڭ. ونىڭ قابىلدانۋىنا ەل جۇرت نارازىلىق ءبىلدىرىپ جاتىر.... شەتەلدەن كەلەتىن كىم؟ قانداس. قانداس دەگەن كىم؟ قازاق. ءوزىمىز ات توبەلىندەي عانا ەلمىز... ەلىمىزدە ءوسىپ-ونەمىز دەپ جاتقاندا، نەگە شەتەلدەن كەلەتىن ءبىزدىڭ قازاق باۋىرلارىمىز بەس جىل ازاماتتىق الا الماۋى كەرەك؟ ونىڭ ورنىنا كۇنى كەشە شەتەلدەن كەلىپ جاتقان وزگە ۇلت وكىلدەرى ازاماتتىق الىپ جاتىر. بۇل ادامدى ءبولىپ-جارۋ ما؟- دەدى ءانشى.
سونىمەن قاتار، ءانشى ءوزىنىڭ ۆيدەو-ۇندەۋىندە بۇل پروبلەماعا جاۋاپتى مەكەمەلەردى ءتىزىپ، ءتۇيىننىڭ كوپ ۇزاماي شەشىلەتىنىنە سەنىم ءبىلدىردى. ءوزىنىڭ ازاماتتىق ۇستانىمىن تانىتتى.
- مەن تولىققاندى قر ازاماتى رەتىندە شەشىلمەي جاتقان ءتۇيىندى ءبىر قالىپقا سالىپ، ادەمىلەپ شەشىپ بەرەدى دەپ دەپۋتاتتارعا، ەلىمىزدىڭ پرەزيدەنتىنە، مينيسترلىككە جولدايمىن. مەن شەتەلدەن كەلەتىن قانداستارىمىزعا بەس جىلسىز ازاماتتىق بەرمەۋ تۋرالى زاڭ قابىلداۋعا قارسى ەكەنىمدى بىلدىرگىم كەلەدى! - دەپ تۇيىندەدى ءانشى ءوز ويىن.
"ادىرنا" ۇلتتىق پورتالى
