تۇركسىب اۋدانىندا جول ينفراقۇلىمىن جاقسارتۋ جۇمىستارى جالعاسىپ جاتىر. وعان دالەل، تۇرعىنداردىڭ قاۋىپسىزدىگى مەن جايلىلىعى ءۇشىن 9 كوشەگە 7 كم تروتۋار سالىنۋى. بۇل تۋرالى قالا اكىمى ەربولات دوساەۆ اۋدان حالقىمەن كەزدەسۋىندە مالىمدەدى، دەپ حابارلايدى " ادىرنا" ءتىلشىسى.
قالا اكىمىنىڭ ايتۋىنشا، اۋدان تۇرعىندارىنىڭ ءوتىنىشى بويىنشا №13 اۆتوبۋس مارشرۋتى سپاسسكايا كوشەسىندەگى 77 ۇيگە دەيىن جانە №215 اۆتوبۋس مارشرۋتى شۋاقتى شاعىناۋدانىنا دەيىن ۇزارتىلدى.
سونداي-اق، قايرات شاعىناۋدانىنا كىرىپ-شىعۋ ارقىلى №138 اۆتوبۋس مارشرۋتىنىڭ سحەماسى وزگەرتىلدى.
"جولداعى قاۋىپسىزدىكتى قامتاماسىز ەتۋ ماقساتىندا ءسۇيىنباي داڭعىلىنا 4 رەتتەلەتىن جاياۋ جۇرگىنشىلەر وتكەلى ورناتىلدى. تۇرعىنداردىڭ ءوتىنىشى بويىنشا 70-رازەزدەگى باعدارشام اۋىستىرىلدى", - دەدى اكىم.
بيىلعى جىلدىڭ جەلتوقسان ايىندا رىسقۇلوۆ داڭعىلى «پاراسات» تۇرعىن كەشەنى جانىنداعى جانە ەرجانوۆ كوشەسىنەن شاتسكي كوشەسىنە تەمىرجول ارقىلى وتەتىن 2 جەر ءۇستى وتكەلىن جوبالاۋ اياقتالادى. قۇرىلىس 2023 جىلعى مامىردا باستالادى.
ەربولات دوساەۆتىڭ ايتۋىنشا، ءسۇيىنباي داڭعىلى مەن مايلين كوشەسىندەگى جاياۋ جۇرگىنشىلەردىڭ جەر ءۇستى وتكەلدەرىندەگى كوتەرگىش قۇرىلعىلارىن قالپىنا كەلتىرۋ ءۇشىن بيۋدجەتتەن قوسىمشا قاراجات ءبولىندى. جۇمىستار وسى جىلدىڭ قاراشا ايىنىڭ سوڭىندا اياقتالادى.
