باتىس قازاقستان وبلىسى جاڭاقالا اۋدانىندا كورنەكتى مەملەكەت جانە قوعام قايراتكەرى، اۆتونوميالى قازاق رەسپۋبليكاسى ورتالىق اتقارۋ كوميتەتىنىڭ تۇڭعىش توراعاسى، الاش تۇلعاسى سەيىتقالي مەڭدەشەۆتىڭ 140 جىلدىعىنا ارنالعان عىلىمي-پراكتيكالىق كونفەرەنتسيا ءوتتى، دەپ حابارلايدى «ادىرنا» ءتىلشىسى.
شاراعا استانادان پرەزيدەنت كەڭەسشىسى مالىك وتارباەۆ كەلىپ، مەملەكەت باسشىسى قاسىم-جومارت توقاەۆتىڭ قۇتتىقتاۋ ءسوزىن وقىدى.
«قۇرمەتتى جيىنعا قاتىسۋشىلار! سىزدەردى جاڭاقالا اۋدانىنىڭ قايتا قۇرىلعانىنا 50 جىل جانە وسى ءوڭىردىڭ ايگىلى پەرزەنتى سەيىتقالي مەڭدەشەۆتىڭ تۋعانىنا 140 جىل تولۋىمەن قۇتتىقتايمىن. جاڭاقالا اۋدانىنان كوپتەگەن ونەر ساڭلاقتارى مەن بەلگىلى تۇلعالار ءتورت كەڭەس وداعىنىڭ باتىرى، 17 سوتسياليستىك ەڭبەك ەرى شىققان. ولاردىڭ ىشىندە كورنەكتى مەملەكەت جانە قوعام قايراتكەرى سەيىتقالي مەڭدەشەۆتىڭ ورنى بولەك. ونىڭ اعارتۋشىلىق قىزمەتى ۇلتازاتتىق كوتەرىلىس جانە اشارشىلىق كەزىندەگى حالقىنا جاناشىرلىعى جۇرتىمىزدىڭ جادىندا ءاردايىم ساقتالادى. سەيىتقالي مەڭدەشەۆتىڭ تۋعان ەلىنە سىڭىرگەن ەڭبەگى ۇشان-تەڭىز. حالقىنىڭ بولاشاعى ءۇشىن ايانباي تەر توككەن وسىنداي تۇلعالارىمىزدى ۇلىقتاۋ بۇگىنگى بۋىننىڭ پەرزەنتتىك پارىزى. ۇلت مۇددەسىنە ادال قىزمەت ەتكەن سەيىتقالي مەڭدەشەۆ سياقتى ارداق ازاماتتاردىڭ ەسىمىن ەستە ساقتاۋ جاستاردى وتانشىلدىققا تاربيەلەۋ تۇرعىسىنان وتە ماڭىزدى. ونىڭ ءومىر جولى مەن قايراتكەرلىگى ۇرپاققا ۇلگى ونەگە بولا بىلەدى دەپ سەنەمىن. بارشاڭىزعا مىقتى دەنساۋلىق، باق-بەرەكە تىلەيمىن»،—دەلىنگەن قۇتتىقتاۋدا.
اۋدان اكىمى دارحان زاكارين، اقىن، قازاقستان جۋرناليستەر جانە جازۋشىلار وداعىنىڭ مۇشەسى زاكاريا سيسەنعالي باستاعان دەلەگاتسيا استانا، الماتى قالالارىنان كەلگەن قوناقتاردى قارسىلاپ، ۇلتتىق كيىم كيگەن جەرلەستەرىمىز قوناقتاردى ۇلتتىق اسپابىمىز دومبىرامەن ءان سالىپ، ۇلتتىق تاعام باۋىرساق پەن اق ۇسىندى.
ودان ءارى مامەن جانە تۇياقبەردى شامەلوۆتىڭ كەسەنەلەرىنە توقتاپ قۇران باعىشتادى.
بۇدان بولەك كونفەرەنتسياعا باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ، «ورتالىق مەملەكەتتىك ارحيۆ» رەسپۋبليكالىق مەملەكەتتىك مەكەمەسىنىڭ ديرەكتورى، تاريح عىلىمىنىڭ كانديداتى، قر جاستار وداعى «سەرپەر» سىيلىعىنىڭ لاۋرەاتى ءسابيت شىلدەباي، «جاھانشا دوسمۇحامەدوۆ» اتىنداعى قوعامدىق قوردىڭ پرەزيدەنتى، تاريح عىلىمىنىڭ كانديداتى، قاۋىمداستىرىلعان پروفەسسورى، الاشتانۋشى، سىرىم اۋدانىنىڭ قۇرمەتتى ازاماتى دامەتكەن سۇلەيمەنوۆا، باتىس قازاقستان وبلىستىق مادەنيەت، تىلدەردى دامىتۋ، ارحيۆ ءىسى باسقارماسىنىڭ باسشىسى سايران دۇيسەنوۆ، ماحامبەت وتەمىسوۆ اتىنداعى باتىس قازاقستان ۋنيۆەرسيتەتىنىڭ «رۋحاني جاڭعىرۋ» ينستيتۋتىنىڭ ديرەكتورى، پەداگوگيكا عىلىمدارىنىڭ دوكتورى، پروفەسسور، قازاقستان پەداگوگيكالىق عىلىمدار اكادەمياسىنىڭ اكادەميگى، حالىقارالىق ماحامبەت اتىنداعى سىيلىقتىڭ يەگەرى، «ماحامبەت» ادەبي، مادەني جانە تانىمدىق جۋرنالىنىڭ باس رەداكتورى، قازاقستان جۋرناليستەر وداعىنىڭ مۇشەسى ابات قىدىرشاەۆ، جاڭگىر حان اتىنداعى باتىس قازاقستان اگرالىق-تەحنيكالىق ۋنيۆەرسيتەتىنىڭ «رۋحاني جاڭعىرۋ» ورتالىعىنىڭ اعا وقىتۋشىسى، تاريح عىلىمدارىنىڭ كانديداتى – ەسقايرات حايداروۆ، اقىن، قوعام قايراتكەرى، قازاقستان جازۋشىلار جانە جۋرناليستەر وداعىنىڭ مۇشەسى زاكاريا سيسەنعالي قاتىستى.
