«ورال قالاسىنىڭ قۇرمەتتى پەداگوگى» انىقتالىپ، ۇزدىك ۇستازدار ماراپاتتالدى

1826
Adyrna.kz Telegram

بۇگىن ح.بوكەەۆا اتىنداعى قازاق دراما تەاترىندا وتكەن «ۇستازىم، سەنىڭ ءار كۇنىڭ، ءار ءساتىڭ تۇرعان ءبىر ەرلىك» اتتى مەرەكەلىك شارادا «ورال قالاسىنىڭ قۇرمەتتى پەداگوگى» انىقتالىپ، ۇزدىك ۇستازدار ماراپاتتالدى.

ورال قالالىق ءبىلىم بەرۋ ءبولىمى ۇيىمداستىرعان شارادا تەاتر فويەسىنە ءبىلىم بەرۋ ۇيىمدارىنىڭ دايىنداعان كومپوزيتسيالارى مەن رەسپۋبليكالىق وليمپيادا جۇلدەگەرلەرىن دايىنداعان ۇستازداردىڭ سۋرەتتەرى قويىلدى.
ۇلت ۇستازى احمەت بايتۇرسىنۇلىنىڭ 150 جىلدىعىمەن تۇسپا-تۇس كەلگەن مەرەكەلىك جيىن اعارتۋشىعا ارنالعان قويىلىممەن باستاۋ الدى. قالا اكىمى ميرجان ساتقانوۆ پەداگوگتەر مەن سالا ارداگەرلەرىن كاسىبي مەرەكەمەن قۇتتىقتادى.

- قۇرمەتتى پەداگوگتەر، ارداگەر-ۇستازدار!
سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن. ۇستازدىق – كەز كەلگەن ازاماتتىڭ تۇلعا بولىپ قالىپتاسۋىنا ولشەۋسىز ۇلەس قوساتىن ماماندىقتىڭ تورەسى، قاستەرلى ەسىم. ۇستازدار – بالالارعا ءبىلىم بەرىپ، ۇرپاعىمىزدى وتانشىلدىق رۋحىندا تاربيەلەيتىن ەڭ مىقتى جاندار.
قالامىزداعى ءبىلىم بەرۋ ۇيىمدارىندا 7 مىڭعا جۋىق ۇستاز قىزمەت ەتەدى. ولاردىڭ الدىندا كەلەشەكتە ەلىمىزدىڭ دامۋى جولىندا ەڭبەك ەتەر 58 مىڭداي شاكىرت ءبىلىم مەن تاربيە الۋدا. ۇستازداردىڭ ەڭبەگىنىڭ ناتيجەسىندە ءبىلىم سالاسىنىڭ تابىستارى جىل ساناپ ارتۋدا. وقۋشىلارىمىز ءتۇرلى دودالاردا ۇزدىك اتانۋدا. قالا كومانداسى پاندىك وليمپيادادا وبلىس كوماندالارى اراسىندا تۇراقتى ءبىرىنشى ورىندا. №38 ءا.مولداعۇلوۆا اتىنداعى مەكتەپ-ليتسەيى رەسپۋبليكاداعى ۇزدىك 100 مەكتەپتىڭ قاتارىندا. م.مامەتوۆا اتىنداعى №27 مەكتەپ-ليتسەيى ۇلتتىق بىرىڭعاي تەستىلەۋ ناتيجەسىندە ۇزدىك 100-دىكتە. قازاقستاننىڭ تالانتتى بالالارى «ەل ءۇمىتى» ەنتسيكلوپەدياسىنا ورال قالاسى مەكتەپتەرىنەن 75 ۇزدىك وقۋشى ەندى.
رەسپۋبليكالىق، حالىقارالىق جارىستاردا ورالدىڭ، باتىس قازاقستاننىڭ اتىنان قاتىسىپ، ۇزدىك اتانىپ جۇرگەن شاكىرتتەرىمىز كوپ. وسىنداي شاكىرتتەرىمىزدىڭ بىلىمگە قۇشتارلىعىن وياتىپ، تالانتىن شىڭداپ، بيىككە جەتەلەپ جۇرگەن ۇستازدارىمىز – سىزدەردىڭ ەڭبەكتەرىڭىز زور.
ۇلتىمىزدىڭ بولاشاعىن قالىپتاستىراتىن ماماندىق يەلەرىن قولداۋ ءاردايىم مەملەكەت نازارىندا. «پەداگوگ مارتەبەسى» زاڭى اياسىندا مۇعالىمدەردى شامادان تىس ەسەپ بەرۋدەن، مىندەتىنە جاتپايتىن فۋنكتسيالاردان بوساتۋعا جاعداي جاسالدى. مۇعالىمدەردىڭ جالاقىسى بىرنەشە جىلدان بەرى جىل سايىن 25 پايىزعا كوتەرىلىپ كەلەدى.
2023 جىلدىڭ قاڭتار ايىنان باستاپ مەكتەپ پەن قوسىمشا ءبىلىم بەرۋ ۇيىمدارىنداعى بارلىق پەداگوگتىڭ جالاقىسى تاعى 25 پايىزعا وسەدى. سونداي-اق پرەزيدەنت تاپسىرماسى بويىنشا تاربيەشىلەردىڭ الەۋمەتتىك مارتەبەسىن ارتتىرۋعا كوڭىل ءبولىنىپ، جالاقىسى ارتاتىن بولادى.
قاسىم-جومارت كەمەلۇلى «بولاشاققا جول سىلتەيتىن مۇعالىمنىڭ ەڭبەگىن لايىقتى باعالاۋ – وتە ماڭىزدى مىندەت» دەپ مارتەبەلى ماماندىق يەسى بەدەلىنىڭ جوعارى بولۋى كەرەكتىگىن ايتتى. قوعامدا مۇعالىمنىڭ مارتەبەسىن ودان ءارى بيىكتەتۋگە باعىتتالعان شارالار، جەرگىلىكتى اتقارۋشى ورگان تاراپىنان ىنتالاندىرۋ جۇمىستارى جالعاسىن تاباتىن بولادى.
مەرەكەلەرىڭىزبەن، قادىرلى ۇستازدار!
وزدەرىڭىزگە ايتار العىسىمىز شەكسىز!
ەل بولاشاعى جاس ۇرپاققا ءبىلىم مەن تاربيە بەرۋ جولىنداعى ەڭبەكتەرىڭىزدىڭ جەمىسى ەسەلەنە بەرسىن، - دەدى ميرجان مۇنايدارۇلى.

جەرگىلىكتى اتقارۋشى ورگان تاراپىنان پەداگوگتاردى ىنتالاندىرۋ ماقساتىمەن ءۇشىنشى رەت وتكىزىلگەن «ورال قالاسىنىڭ قۇرمەتتى پەداگوگى» بايقاۋىنا بيىل 40-تان استام پەداگوگ قاتىستى. كاسىبي شەبەرلىكتەرى، جەتىستىكتەرىنىڭ نەگىزىندە ەستەتيكالىق باعىتتاعى مەكتەپ-گيمنازيانىڭ باستاۋىش سىنىپ مۇعالىمى اقگۇل راحمەتوۆا «ورال قالاسىنىڭ قۇرمەتتى پەداگوگى» اتاعىنا لايىق دەپ تانىلدى. قالا باسشىسى توسبەلگى مەن كۋالىگىن ۇسىنىپ، 954 مىڭ تەڭگە سىياقى سەرتيفيكاتىن تابىستادى. سونىمەن قاتار قالا اكىمدىگى جانىنداعى كوميسسيا شەشىمىمەن 6 قاتىسۋشى جۇلدەگەر اتانىپ، 100 مىڭ تەڭگە سەرتيفيكاتقا يە بولدى.
2012 جىلدان ءداستۇرلى تۇردە وتىكىزىلىپ كەلە جاتقان رەسپۋبليكالىق «ۇزدىك ۇستاز» بايقاۋىنىڭ قالالىق كەزەڭىنە 18 پەداگوگ قاتىسىپ، ولاردىڭ ىشىندە №42 «اق نيەت» گيمنازياسىنىڭ ماتەماتيكا ءپانىنىڭ مۇعالىمى داميرا كاناتباەۆا ۇزدىك شىقتى.
قازاقستاندىق سالالىق ءبىلىم جانە عىلىم قىزمەتكەرلەرىنىڭ كاسىپتىك وداعى، باتىس قازاقستان وبلىستىق ءبىلىم جانە عىلىم قىزمەتكەرلەرى كاسىپوداعى اتىنان 7 پەداگوگ «قۇرمەت گراموتاسىنا» يە بولدى.
مەرەكەگە وراي سالادا ۇزاق جىلدار قىزمەت ەتىپ، ءبىلىم سالاسىنىڭ دامۋىنا ەلەۋى ۇلەس قوسقان ۇستازدارعا ارنايى نوميناتسيالار بەرىلدى. اتاپ ايتقاندا، 28 جىلدىق پەداگوگيكالىق ەڭبەك ءوتىلىنىڭ 25 جىلىندا ۇجىمعا باسشىلىق ەتكەن قازىرگى ۋاقىتتا №47 جوببم ديرەكتورى نۇرلان ساتتىقوۆ «ەڭ تاجىريبەلى باسشى» نوميناتسياسى بويىنشا ماراپاتتالدى. «ۇلاعاتتى ۇستاز» نوميناتسياسى بيىل ەڭبەك وتىلىنە 37 جىل تولعان ءا.مولداعۇلوۆا اتىنداعى №38 مەكتەپ-ليتسەي مۇعالىمى، پەداگوگ-شەبەر گۇلزيھان تاسقاريناعا، «ۇزدىك ادىستەمە كوشباسشىسى» نوميناتسياسى 22 جىل بويى ۇزدىكسىز ديرەكتوردىڭ ورىنباسارى لاۋازىمىن د.قوناەۆ اتىنداعى №44 مەكتەپ-گيمنازيا ديرەكتورىنىڭ ورىنباسارى گۇلبانۋ كاراگويشيناعا، «زەردەلى تالىمگەر ۇستاز» نوميناتسياسى 30 جىلدىق ەڭبەك ءوتىلى بار كرۋگلووزەرنىي ورتا مەكتەبىنىڭ فيزيكا ءپانى مۇعالىمى حاتيرا ايتقاليەۆاعا، «زاماناۋي شىعارماشىل تاربيەشى» نوميناتسياسى 36 جىلدىق ەڭبەك ءوتىلى بار پەداگوگ-زەرتتەۋشى، №22 «كولوبوك» بوبەكجايىنىڭ تاربيەشىسى بايانسۇلۋ ساقىپوۆاعا، «قوسىمشا ءبىلىم بەرۋ شەبەرى» نوميناتسياسى پەداگوگيكالىق ەڭبەك وتىلىنە 30 جىل تولعان مەكتەپتەن تىس جۇمىس ورتالىعىنىڭ پەداگوگى لي ولەگ كونستانتينوۆيچكە بەرىلدى. سونىمەن قاتار «جۇلدىز جاققان» نوميناتسياسىمەن №19 جالپى ورتا ءبىلىم بەرەتىن مەكتەبىنىڭ حورەوگراف-مۇعالىمى گۋلدەن كاناتوۆا ماراپاتتالدى.

شارا ءبىلىم بەرۋ ۇيىمدارى ونەرپازدارىنىڭ كونتسەرتتىك قۇتتىقتاۋىمەن جالعاسىن تاپتى. «عىلىم يەسى عالىم دا، ەل قورعاعان باتىر دا ۇستازدان ءتالىم العان» دەگەندەي، بارلىعى دا ءارىپ تانىتىپ، جارقىن ومىرگە ساۋلە ۇستاتقان ۇستازعا قارىزدار. مەرەكەلىك باعدارلاما اياسىندا شاراعا ارنايى قاتىسقان ءار سالانىڭ وزات ماماندارى – مەديتسينا، توتەنشە جاعداي، قۇقىق قورعاۋ، قۇرىلىس سالاسىنىڭ وكىلدەرى ۇستازدارعا العىستارىن ءبىلدىردى.

پىكىرلەر