ءاليحان بوكەيحان. ۇلاعاتتى ويلار.

ءتىرى بولسام، حان بالاسىندا قازاقتىڭ حاقىسى بار ەدى، قازاققا قىزمەت قىلماي قويمايمىن.

 * * *

بوستاندىققا اپاتارىن جالعىز جول – ۇلتتىق ىنتىماق قانا.

 * * *

قازاقتىڭ وقىعان ازاماتتارى، قازاققا وسىندايدا قىزمەت ەتپەگەندە قاشان قىزمەت ەتىپ، پايدامىزدى تيگىزەمىز.

* * *

 الىسپاعان، جۇلىسپاعان – بوستاندىق اتىنا مىنبەيدى، بۇعاۋدان بوسامايدى، ەرى – قۇلدىقتان، ايەلى – كۇڭدىكتەن شىقپايدى، مالىنا دا، باسىنا دا يە بولمايدى.

* * *

مەن التايدان ورالعا، ءسىبىر تەمىر جولى تورابىنان ومبىعا دەيىنگى كەڭ كەڭىستىكتى مەكەندەگەن 4 ميلليون قازاق حالقىنىڭ وكىلىمىن. قازاقتىڭ بۇگىنگى اسقان مۇڭى – انا ءتىلىن قولدانۋ بوستاندىعى، ونىڭ قاجەتتىلىگى سايلاۋ قارساڭىندا ۇگىت-ناسيحات جۇمىسىن جۇرگىزۋ بارىسىندا ەرەكشە ارتىپ وتىر جانە وسىعان بايلانىستى مەنىڭ قۇرىلتايدان وتىنەرىم – جەرگىلىكتى تىلدەردىڭ قۇقىن شەكتەيتىن زاڭنىڭ تەز ارادا قايتا قارالۋى تالاپ ەتىلسىن.

* * *

رۋحاني مادەنيەتتىڭ ءبىر بەلگىسى – جالپى وقۋ، گازەتا، كىتاپ وقىپ، عىلىم جولىن تانۋ، قول جەتكەنى عىلىم جولىندا ىزدەنىپ، ادام بالاسىنا جاقسىلىق جول اشۋ.

* * *

 بىزدە بىرلىك بولىپ، ءىس قىلا بىلەتىن شەبەر تابىلسا، الاشتىڭ بالاسى باقىت-ماحاببات جولىنا ءتۇستى!

* * *

 بايلىق ءتۇبى – اقىل ءھام قول ۇستالىعى. وسى ەكەۋى قوسىلماي ادام بالاسى قازىناعا جارىمايدى.

* * *

 قازاق حالقىنىڭ ءبىر جاقسى مۇراسى «جىلۋ»... وسى كۇندە وزگەرىپ كەتتى، قازاق حالقىنىڭ نە ادەتى وزگەرمەدى!؟ قازاق حالقىنىڭ ءبىر كوڭىلدى كوتەرەتىن ادەتى – قوناق كۇتۋى دە جىلدان جىلعا بۇرىنعىداي بولماي بارادى. بۇرىن قوناقتاردى تاڭداماي قوندىرادى ەكەن، تەك جولاۋشىمەنەن بولسا. وسى كۇندە قوناقتاردى تاڭداپ سىيلايدى. جاقسىلاردى، كۇمىس ەر-توقىمدىلاردى، بولەك اتشى الىپ جۇرگەندەردى عانا قوندىرادى. قوندىرعان ۋاقىتتا كوپ ارامدىق-قۋلىق، الداۋشىلىقتار بار – بۇرىنعى ۋاقىتتا بولماعان. بۇ كۇندە قوناق – بايدى الداپ، باي – قوناعىن الدايدى.

* * *

 ادام بالاسى وزگە حايۋاننان ايىرىلعاندا – بۇلاردان اقىلدى بولىپ، قولى شەبەر بولىپ ايىرىلادى.