«اقتوبە» فۋتبول كلۋبىنىڭ جانكۇيەرلەرى تارازدىق تورەشى ساكەن بايىمبەتتىڭ جەكە تەلەفون ءنومىرىن جاريالاپ، ونىڭ بانك كارتوچكاسىنا اقشا جىبەرىپ جاتىر، دەپ حابارلايدى “ادىرنا” ۇلتتىق پورتالى bassport.kz سايتىنا سىلتەمە جاساپ.
ءار جىبەرىلگەن 100 تەڭگەگە «ساداقا»، «سايقىمازاق» دەگەن سياقتى حابارلاما جازىلعان. جانكۇيەرلەردىڭ پىكىرىنشە، «توبىلمەن» بولعان ويىننىڭ ەسەبىنە ءدال وسى تارازدىق تورەشى كىنالى كورىنەدى.
ايتا كەتەيىك، «توبىل» مەن «اقتوبە» اراسىنداعى فۋتبولدان قازاقستان پرەمەر-ليگاسى 23-تۋرىنىڭ ورتالىق كەزدەسۋى داۋمەن اياقتالدى. وسى ويىندا «توبىل» 1:0 ەسەبىمەن جەڭىسكە جەتتى. شەشۋشى گول ماتچتىڭ 87-مينۋتىندا پەنالتيدەن سوعىلدى. ونىڭ اۆتورى – سەرىكجان مۇجىقوۆ. العاشقى سوققىنى ستاس پوكاتيلوۆ قايتارادى. الايدا تورەشى VAR-دىڭ كومەگىنە جۇگىنىپ، پەنالتيدى قايتا سوقتىرادى.
سونىمەن قاتار، جانكۇيەرلەردىڭ پىكىرىنشە «توبىل» ويىنشىسىنىڭ ءوز ايىپ الاڭىندا قولىمەن ويناعانىنا تورەشى نازار اۋدارماي، ولاردىڭ قاقپاسىنا 11 مەترلىك ايىپ سوققىسىن بەرمەگەن.
وسى جەڭىلىستەن كەيىن «اقتوبە»، «استانا» كومانداسىنىڭ اراسى ءبىر عانا ۇپاي بولدى. ەلوردالىقتار «قايراتتى» 4:0 ەسەبىمەن جەڭىپ، ءتورت ۇپايلىق ايىرمانى قىسقارتا الدى.
